މެޗު ކޮންޓްރޯލްކޮށްގެން ކުޅުނީ މާޒިޔާ، ކުޅުންތެރިންގެ ކުޅުމަށް ސާބަސް: މާޒިޔާ ކޯޗު

މެޗު ކޮންޓްރޯލްކޮށްގެން ކުޅުނީ މާޒިޔާ ކަމަށާއި، ކުޅުންތެރިންގެ ކުޅުމަށް ސާބަސް ކިޔަން ޖެހޭ ކަމަށް މާޒިޔާގެ ކޯޗު މަރްޖާން ސެކުލޮވްސްކީ ބުނެފި އެވެ.

މެޗަށްފަހު ނޫސްވެރިންނަށް މައުލޫމާތު ދެމުން ސެކުލޮވްސްކީ ބުނީ މެޗުން މޮޅުވުމުން ވަރަށް އުފާވާ ކަމަށާއި، ވަކިން ހާއްސަކޮށް ކުޅުންތެރިން ދެއްކި ކުޅުން ވަރަށް ރަނގަޅު ކަމަށެވެ. އެގޮތުން ވެލެންސިއާ އަށް ހަމަލާއެއް އެފައްދަން ފުރުސަތު ނުދީ މާޒިޔާ އިން ނުރައްކާތެރި ދެ ހަމަލާ އުފެއްދިކަންވެސް އޭނާ ވަނީ ބުނެފައެވެ.

ސެކުލޮވްސްކީ ބުނީ ކޯޗެއްގެ ހައިސިއްޔަތުން މެޗުން މޮޅުވުމުން އުފާވާން ޖެހޭ ކަމަށެވެ. އެހެންނަމަވެސް އޭނާ ބުނީ ކުރިޔަށް އޮތް މެޗުގައި މާޒިޔާ ނިކުންނަން ޖެހޭނީ ރަނގަޅު ސްކޯ ލައިނަކަށް ވިސްނައިގެން ކަމަށާއި، އެކަމަށް މަސައްކަތް ކުރަން ޖެހޭ ކަމަށެވެ.

މާޒިޔާ އިން ކުޅުނީ ޑިފެންސިވް ފުޓުބޯޅައެއްކަން ފާހަގަކުރަމުން ސެކުލޮވްސްކީ ބުނީ މުޅި ޓީމު ކުރިޔަށް އެއްކޮށް އަރުވަން ޖެހިލުންވި ކަމަށެވެ. އެގޮތުން މާޒިޔާ އިން ވަނީ މެޗު ކޮންޓްރޯލްކޮށްގެން ކުޅެފަކަމަށާއި، ފުރަތަމަ ހާފްގައި ދެ ލަނޑުވަރު ޖެހުނު ނަމަ މެޗު ވަރަށް ފަސޭހަވާނެ ކަމަށްވެސް އޭނާ ވަނީ ބުނެފައެވެ.

ސެކުލޮވްސްކީ ބުނީ ކުރިޔަށް އޮތް މެޗުގައި އަސަދުﷲ ވެސް ލިބޭ ފުރުސަތުގެ ބޭނުން ހިފާނެކަމަށް އުންމީދު ކުރާ ކަމަށާއި، ލަނޑު ޖެހުމުގެ މައްސަލަ މުޅިން ހައްލުކުރާނެ ކަމަށެވެ.