ވެރާޓީ ހޯދުމަށް ޗެލްސީން 30 މިލިއަން ޕައުންޑު ހުށަހަޅައިފި

ޕެރިސް ސެއިންޓް ޖާމަން (ޕީއެސްޖީ) އަށް ކުޅެމުން އަންނަ އިޓަލީގެ މިޑް ފިލްޑަރު މާކޯ ވެރާޓީ ހޯދުމަށް ޗެލްސީން 30 މިލިއަން ޕައުންޑު ހުށަހަޅައިފި އެވެ. ޑެއިލީ މެއިލް އިން ބުނީ ވެރާޓީ ހޯދުމަށް ޗެލްސީން ޝައުގުވެރިކަން ފާޅުކޮށްފައިވާ ކަމަށާއި، އެގޮތުން އެ ކްލަބުން އޭނާ ހޯދުމަށް 30 މިލިއަން ޕައުންޑުގެ ބިޑެއް ޕީއެސްޖީ އަށް ހުށަހަޅާފައިވާ ކަމަށެވެ. އަންނަ ޖެނުއަރީ ޓްރާންސްފާއާ ދިމާކޮށް ވެރާޓީ ޗެލްސީއަށް ގެނައުމަށް އެ ކްލަބުން މަސައްކަތްކުރަމުން އަންނަ އިރު، އޭނާ ހޯދުމަށް އިންޓަމިލާނުން ވެސް ވަނީ 65 މިލިއަން ޔޫރޯ ހުށަހަޅާފައިވާ ކަމަށް ރިޕޯޓްތައް ބުނެއެވެ. އިޓަލީގެ މޮޅުކުޅުންތެރިޔާގެ މަގާމު ހޯދާފައިވާ ވެރާޓީ އެ ކްލަބުގައި މަޑުކުރުމަށް ފެބްރުއަރީ މަހު ވަނީ ނިންމާފަ އެވެ. އެގޮތުން އޭނާ ވަނީ 2020 ވަނަ އަހަރު ކްލަބުގައި މަޑުކުރުމަށް ނިންމާ އެއްބަސްވުމުގައި ސޮއި ވެސް ކޮށްފަ އެވެ. ދާދި ފަހުން ނޫސްވެރިންނާ ބައްދަލުކޮށް ވާހަކަދައްކަމުން ވެރާޓީ ބުނީ މީގެ ހަތަރު އަހަރު ކުރިން އޭނާ ޕީއެސްޖީ އަށް ބަދަލުވީ ދުނިޔޭގެ އެންމެ ޝަރަފުވެރި އެއް މުބާރާތް ކާމިޔާބުކުރުމުގެ އަޒުމުގައި ކަމަށާއި، އަދިވެސް އެ ހުވަފެން ހަގީގަތަކަށް ހަދަން އޭނާ ބޭނުންވާ ކަމަށެވެ. ޕީއެސްޖީއާ 2012 ވަނަ އަހަރު ގުޅުނު ވެރާޓީ ވަނީ އެ ކްލަބާއެކު ހޭދަކުރި ހަތަރު ސީޒަނުގައި 173 މެޗު ކުޅެދީ ފަސް ލަނޑު ކާމިޔާބުކޮށްފަ އެވެ. މީގެ އިތުރުން އޭނާ ވަނީ އިޓަލީ ގައުމީ ޓީމަށް ކުޅުނު 17 މެޗުގައި އެއް ލަނޑު ކާމިޔާބުކޮށްފަ އެވެ. ޕީއެސްޖީއާ އެކު އޭނާ ވަނީ ހަތަރު ލީގު ތަށި، ދެ ލީގް ކަޕް، ހަތަރު ފްރެންޗް ސުޕާކަޕް ކާމިޔާބުކޮށްފަ އެވެ. މީގެއިތުރުން އޭނާ ވަނީ ސެރީއާ ބީގެ ޕެސްކާރާއާ އެކުވެސް ގިނަ ކާމިޔާބީތައް ހޯދާފަ އެވެ.