ހަމޭސް ހޯދުމަށް ޗެލްސީން ކުރާ މަސައްކަތް އަދިވެސް ނުހުއްޓާ

ރެއާލް މެޑްރިޑަށް ކުޅެމުން އަންނަ ކޮލަމްބިއާގެ އެޓޭކިން މިޑްފިލްޑަރު ހަމޭސް ރޮޑްރިގޭޒް ހޯދުމަށް ޗެލްސީން ކުރަމުންދާ މަސައްކަތް އެ ކްލަބުން ހުއްޓާނުލާ ކަމަށް ރިޕޯޓްތައް ބުނެފި އެވެ.

ޖެނުއަރީ ޓްރާންސްފާގައި ހަމޭސް ރެއާލް ދޫކޮށްލާނެކަމަށް ބެލެވުނު ނަމަވެސް އޭނާ ވަނީ އެހެން ކްލަބަކަށް ބަދަލުނުވެ މަޑުކޮށްފައެވެ. އެހެންނަމަވެސް މި ސީޒަނަށްފަހު އޭނާ އެ ކްލަބް ދޫކޮށްލާނެ ކަމަށް ރިޕޯޓްތައް އަންނަނީ ބުނަމުންނެވެ.

ޕެރިސް ސެއިންޓް ޖާމަން (ޕީއެސްޖީ) އަދި ޗެލްސީންވެސް ހޯދުމަށް މަސައްކަތްކުރަމުން އަންނަ ހަމޭސް ހޯދުމަށް އިޓަލީގެ ޔުވަންޓަސް އިން ވެސް އަންނަނީ މަސައްކަތްކުރަމުންނެވެ.

މިފަހަރުގެ ސީޒަނުގެ ކުރީކޮޅު ރެއާލްގެ ފުރަތަމަ 11 ގައި ހިމެނިގެން ހަމޭސް ކުޅުނު ކަމުގައިވީ ނަމަވެސް ފަހަކައް އައިސް އޭނާއަށް ވަނީ ރެއާލްގެ ފުރަތަމަ 11 އިން ޖާގަ ލިބޭ ގޮތް ނުވެފައެވެ.

ރެއާލް މެޑްރިޑާއި 2014 ވަނަ އަހަރު ގުޅުނު ހަމޭސް ރޮޑްރިގޭޒް ވަނީ މިހާތަނަށް ރެއާލް މެޑްރިޑަށް 96 މެޗު ކުޅެދީ 29 ގޯލް ކާމިޔާބު ކޮށްދީފައެވެ. މީގެއިތުރުން އޭނާ ވަނީ ރެއާލްއާއެކު ޔުއެފާ ޗެމްޕިއަންސް ލީގު، ޔުއެފާ ސުޕާ ކަޕް ދެފަހަރު އަދި ފީފާ ކްލަބް ވޯލްޑްކަޕް އެއްފަހަރު ކާމިޔާބުކޮށްފައެވެ