ރެއާލް މެޑްރިޑަށް ކުޅެމުން އަންނަ ސްޕެއިންގެ އަލްވަރޯ މޮރާޓާ ހޯދުމުގެ މަސައްކަތް ޗެލްސީން ފަށައިފި ކަމަށް ރިޕޯޓްތައް ބުނެފި އެވެ.
މަޝްހޫރު ކުޅިވަރު ނޫހެއްކަމަށްވާ ދަ ސަން އިން ބުނީ މޮރާޓާ ހޯދުމަށް ޗެލްސީން މަސައްކަތް ކުރަމުން އަންނަ ކަމަށާއި، އެގޮތުން 70 މިލިއަން ޕައުންޑު އޭނާ ހޯދުމަށް ޗެލްސީން ހުށަހަޅާފައިވާ ކަމަށެވެ.
ޗެލްސީގެ ކޯޗު އެންޓޯނިއޯ ކޮންޓޭގެ ފެވަރިޓް ކުޅުންތެރިޔެއް ކަމަށްވާ މޮރާޓާ ހޯދުމަށް ޗެލްސީން މަސައްކަތްކުރަމުން އަންނަ އިރު، ދުނިޔޭގެ ނަން މަޝްހޫރު އެހެން ގިނަ ކްލަބްތަކުންވެސް ދަނީ އޭނާ ހޯދުމަށް މަސައްކަތްކުރަމުންނެވެ.
މީގެއިތުރުން ރިޕޯޓްތައް ބުނާގޮތުން ޗެލްސީން ހޯދުމަށް ފުރަތަމަ މަސައްކަތްކުރަމުން އައީ ރޮމެލޫ ލުކާކޫ ހޯދުމަށެވެ. އެހެންނަމަވެސް ރިޕޯޓްތައްބުނާގޮތުން ލުކާކޫ ހޯދުމުގެ މަސައްކަތް ޗެލްސީން މަޑުޖައްސާފައިވާއިރު، އޭނާ ހުށަހަޅާ އަގުވެސް ބޮޑުކަމަށް ރިޕޯޓްތައްބުނެއެވެ.
ރެއާލް މެޑްރިޑް ޔޫތް ޓީމުން ކެރިޔަރު ފެށި މޮރާޓާ އެ ކްލަބްގެ ސީނިއާ ޓީމަށް ކުޅެން ފެށީ 2010 ވަނަ އަހަރެވެ. އެގޮތުން އޭނާ ވަނީ އެ ކްލަބުގައި ހަތަރު ސީޒަން ހޭދަކޮށް ކުޅުނު 52 މެޗުގައި 11 ލަނޑު ކާމިޔާބުކޮށްފައެވެ.
ރެއާލް ދޫކޮށްލުމަށްފަހު މޮޮރާޓާ ޔުވަންޓަސް އަށް 2014 ވަނަ އަހަރު ބަދަލުވެފައިވާއިރު، އެ ކްލަބުގައި ދެ ސީޒަން ވަނީ ހޭދަކޮށްފައެވެ. އެގޮތުން އޭނާ ވަނީ އެޓީމަށް ކުޅުނު 93 މެޗުގައި 27 ލަނޑު ކާމިޔާބުކޮށް، އެޓީމާއެކު އިޓާލިއަން ލީގު ދެފަހަރު، އިޓާލިއަން ކަޕް ދެފަހަރު ކާމިޔާބުކޮށްފައެވެ. މީގެއިތުރުން އޭނާ ވަނީ އިޓާލިއަން ސުޕާކަޕްގެ ދެވަނަ އަދި ޔުއެފާ ޗެމްޕިއަންސް ލިގުގެ ދެވަނަ ވެސް ޔުވަންޓަސްއާއެކު ކާމިޔާބުކޮށްފައެވެ.
