ތިން ޕޮއިންޓު ލިބުނީ އެންމެ ފަހު ވަގުތާ ޖެހެންދެން މަސައްކަތް ކުރުމުން: ބެންގަލޫރު އެފްސީގެ އެސިސްޓަންޓް ކޯޗް
ކުޅުންތެރިން ކުރި ބުރަ މަސައްކަތަށް ޝުކުރު އަދާކުރަން
މާޒިޔާ އާއި ދެކޮޅަށް ކުޅުނު މެޗަށްފަހު ބޭއްވި ނޫސްވެރިންގެ ބައްދަލުވުމުގެ ތެރެއިން
މާޒިޔާ އަތުން ތިން ޕޮއިންޓް ލިބުނީ އެންމެ ފަހު ވަގުތާ ޖެހެންދެން ކުޅުންތެރިން ކުރި ބުރަ މަސައްކަތުން ކަމަށް ބެންގަލޫރު އެފްސީގެ އެސިސްޓަންޓް ކޯޗް ބުނެފި.
އެސިސްޓަންޓް ކޯޗް މިހެން ބުނެފައިވަނީ އަންގާރަ ދުވަހު އޭއެފްސީ ކަޕްގެ ގުރޫޕް ސްޓޭޖުގައި މާޒިޔާއާއި ދެކޮޅަށް ކުޅުނު މެޗައްފަހު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަމުންނެވެ. އެސިސްޓަންޓް ކޯޗް ބުނެފައިވަނީ މާޒިޔާ އާއި ދެކޮޅަށް ކުޅެން އެއްގޮތަކަށްވެސް ފަސޭހަ ނުވި ކަމަށާ މެޗަށް ނިކުތީވެސް އެވަރު ދަނެގެން ކަމަށެވެ. ފާއިތުވި އަހަރުތަކުގެ ތެރޭގައި މާޒިޔާ އާއި ދެކޮޅަށް ކުޅުނު ތިން މެޗުންވެސް އެޓީމަށް މޮޅު ވެވުނީ އެންމެ ލަނޑެއްގެ ތަފާތުން ކަމަށާ މާޒިޔާއަކީ ވަރުގަދަ ޓީމެއްކަން ތިންމެޗުގެ ނަތީޖާއިންވެސް ހާމަކޮށްދީފި ކަމަށްވެސް ކޯޗް ބުންޏެވެ.
ޕްރެސްގައި ވާހަކަ ދައްކަމުން މާޒިޔާގެ ކޯޗެކޭވެސް އެއްފަދައިން ބެންގަލޫރުގެ އެސިސްޓަންޓް ކޯޗުވެސް ވަނީ ރެފްރީގެ ނިންމުންތަކާމެދު ކޮންމެވެސް ވަރަކަށް ނުރުހުން ފާޅުކޮއްފައެވެ. އޭނާ ބުނީ މެޗްގައި އެޓީމަށް ލިބެންޖެހޭ ޕެނަލްޓީއެށް ދީފައި ނުވާ ކަމަށާ މެޗުގެ ފަހު ވަގުތު އެޓީމުގެ ކޯޗަށް ދެއްކި ރަތް ކާޑަކީ ގަބޫލު ކުރެވޭނެ ކާޑެއް ނޫން ކަމަށެވެ. އޭނާ ބުނީ މެޗްގެ ފަހު ވަގުތު އޮއެވަރު ހުރިގޮތުން ކޯޗު ހުރީ ވަރަށް ބޮޑަށް ޕްރެޝަރުގައި ކަމަށާ އެވަގުތު ކޯޗުގެ އަމަލުތަށް ގޯސްވި ނަމަވެސް އެއީ ރަތްކާޑެއް އަންނަން ޖެހޭވަރު ދަނޑިވަޅެއް ކަމަށް ގަބޫލު ނުކުރެވޭ ކަމަށެވެ.
އިތުރަށް ވާހަކަ ދައްކަމުން ބެންގަލޫރުގެ އެސިސްޓަންޓް ކޯޗް ބުނީ މެޗުން މި ލިބުނީ ވަރަށް މުހިންމު ތިން ޕްއިންޓް ކަމަށާ މުބާރާތް ރޭވިފައި ވާގޮތުން ގުރޫޕުގެ ކުރި ހޯދުން ވަރަށް މުހިންމުކަމަށެވެ. މުބާރާތުގެ އޮނިގަނޑު ރޭވިފައިވާގޮތުން، ދެވަނަ ބުރަށް ދާނީ ކޮންމެ ގުރޫޕަކުންވެސް އެންމެ ގިނަ ޕޮއިންޓް ހޯދާ ޓީމެވެ.
މުބާރާތުގެ ގުރޫޕް އީގައި މިވަގުތު ބެންގަލޫރު އެފްސީ އޮތީ ހަޕޮއިންޓާއެކު ތާވަލުގެ އެއްވަނާގައެވެ. ދެވަނާގައި ޖުމްލަ ތިން ޕޮއިންޓާއެކު އޮތީ އަންގާރަދުވަހުގެ މެޗުން ބަލިވި މަޒިޔާ އެވެ.
