ކޯސްޓާ އަށް ޗެލްސީން އާ އެއްބަސްވުމެއް ހުށަހަޅައިފި

ޗެލްސީގެ ފޯވާޑް ޑިއެގޯ ކޯސްޓާ އަށް ޗެލްސީން އާ އެއްބަސްވުމެއް ހުށަހަޅައިފި ކަމަށް ރިޕޯޓްތައް ބުނެފި އެވެ.

ދަ ސަން އިން ބުނީ ކޯސްޓާ އަށް ޗެލްސީން އާ އެއްބަސްވުމެއް ހުށަހަޅާފައިވާ ކަމަށާއި، އެ އެއްބަސްވުމާއެކު އޭނާ ކްލަބުގައި އިތުރު ފަސް އަހަރު މަޑު ކުރަންޖެހޭ ކަމަށެވެ.

މީގެ އިތުރުން ރިޕޯޓްތައް ބުނާ ގޮތުން ކޯސްޓާގެ އާ އެއްބަސްވުމާ އެކު އޭނާ އަށް ހަފްތާއަކު 220،00 ޕައުންޑު ލިބޭނެއެވެ. އަދި މި އެއްބަސްވުން ކޯސްޓާ ބަލައިގަނެފައިވާ ކަމަށް ވެސް ރިޕޯޓްތައް ވަނީ ބުނެފައެވެ.

ޗައިނާގެ ކްލަބެއް ކަމަށްވާ ޓިއާން ގުއަންޖިއަން އިން އަހަރެއްގެ މައްޗަށް ލިބޭ 30 މިލިއަން ޕައުންޑްގެ ރަނގަޅު ހުށަހެޅުމެއް ކޯސްޓާ އަށް ހުށަހަޅާފައިވާ ކަމަށް ދާދި ފަހުން ގޯލްޑޮޓްކޮމް އިން ވަނީ ރިޕޯޓްކޮށްފައެވެ. މީގެ އިތުރުން ވެސް ޗައިނާގެ ބައެއް ކްލަބްތަކުން އަންނަނީ އޭނާ ހޯދުމަށް މަސައްކަތްކުރަމުންނެވެ. އަދި ބާސާ އާއި އެޓްލެޓިކޯ މެޑްރިޑުން ވެސް ކޯސްޓާ ހޯދުމަށް މަސައްކަތްކުރާ ކަމަށް ރިޕޯޓްތައް ބުނެއެވެ.

މި ސީޒަނުގައި ކޮސްޓާގެ ފަރާތުން މޮޅު ކުޅުމެއް ފެންނަމުންދާއިރު، އޭނާ ވަނީ ލީގުގައި މިހާތަނަށް ކުޅުނު 19 މެޗުގައި 14 ގޯލް ކާމިޔާބުކޮށްފަ އެވެ.

ކޮސްޓާ ބުނީ މި ސީޒަނުގައި ކަންތައްތައް ދަނީ ވަރަށް ރަނގަޅަށް ކަމަށާއި އޭނާގެ އިތުރުން މުޅި ޓީމަށް ވެސް ބަދަލުތަކެއް މި ސީޒަނުގައި އައިސްފައިވާ ކަމަށެވެ.