މިއީ ބޭނުންވި ނަތީޖާއެއް ނޫން، ޓީމު ތެރޭގައި ކަންތައްތަކެއް އެބަހުރި: ފެސްކޯ

މިއީ ބޭނުންވި ނަތީޖާ ނޫން ކަމަށާއި، ޓީމު ތެރޭގައި ކަންތައްތަކެއް އެބަހުރި ކަމަށް ވެލެންސިއާގެ ކޯޗު އަހުމަދު މުޖުތަބާ (ފެސްކޯ) ބުނެފި އެވެ.

މާލޭ ލީގުގައި ޓީސީ އަތުން 0-3 ގެ ނަތީޖާއިން ވެލެންސިއާ ބަލިވި މެޗަށް ފަހު ނޫސްވެރިންނަށް މައުލޫމާތު ދެމުން ފެސްކޯ ބުނީ މިއީ ވެލެންސިއާ ބޭނުންވި ވަރުގެ ނަތީޖާއެއް ނޫން ކަމަށާއި، ޓީމު ތެރޭގައި އަދިވެސް ކަންތައްތަކެއް ގޯސްކޮށް އެބަހުރި ކަމަށެވެ.

އެގޮތުން އޭނާ ބުނީ ގޯސްކޮށް ހުރި ކަންތައްތައް ދެނަގަންނަން ޖެހޭ ކަމަށާއި، މިއަށް ވުރެ ރަނގަޅު ނަތީޖާއެއް ވެލެންސިއާ އަށް ނެރެވެންޖެހޭނެ ކަމަށް ދެކޭ ކަމަށެވެ. މީގެ އިތުރުން ފެސްކޯ ބުނީ ތަމްރީންތައް ކުރިޔަށްގެންދާއިރު ކުޅުންތެރިން ދައްކާ ކުޅުން މެޗުގައި ނުދެއްކޭ ކަމަށާއި، އެހެންނަމަވެސް ޓީސީ މެޗުގައި ގްރީން ސްޓްރީޓާ ދެކޮޅަށް އެންމެ ފަހުން ކުޅުނު މެޗަށް ވުރެ ރަނގަޅަށް ކުޅެފައިވާ ކަމަށެވެ.

ޓީމަށް ދިމާވެގެން އުޅޭ މައްސަލަ ނޭނގޭ ކަމަށް ފާހަގަކުރަމުން ފެސްކޯ ބުނީ އެކަން ދެނަގަންނަން ވަގުތު ބޭނުންވާ ކަމަށެވެ.

ފެސްކޯ ބުނީ އޭއެފްސީ ކަޕްގައި ޓީމު ދެއްކި ކުޅުން ވަރަށް ރަނގަޅު ކަމަށާއި، އެހެން ނަމަވެސް ލީގުގައި އެ ކުޅުން ނުދެއްކޭ ކަމަށެވެ. އެގޮތުން އެކަންތައް ރަނގަޅު ކުރުމަށް މަސައްކަތްކުރަމުން އަންނަ ކަމަށެވެ.

މީގެ އިތުރުން ފެސްކޯ ބުނީ ވެލެންސިއާ މުބާރާތުގައި ބައިވެރިވީ ހުރިހާ މެޗަކުން ބަލިވާން ނޫން ކަމަށާއި، ވެލެންސިއާ މިހާރު އޮތީ ވަރަށް ބަލި ހާލަތެއްގައި ކަމަށެވެ.