ސިޓީގެ މޮޅުވުމަށް، ބޯންމައުތުން ނިމުމެއް ގެނެސްފި

އިނގިރޭސި ޕްރިމިއާ ލީގުގައި ބޯންމައުތާ ދެކޮޅަށް ކުޅުނު މެޗުން ބަލިވެ، ޗެމްޕިއަން މެންޗެސްްޓަރ ސިޓީ އަށް އެއް ވަނަ އަށް ޖެހިލަން ލިބުނު ފުރުސަތު ނަގާލައިފި އެވެ.

ބޯންމައުުތުގެ އަމިއްލަ ދަނޑުގައި ކުޅުނު މެޗުގައި އެ ޓީމުން ސިޓީގެ މައްޗަށް ކުރި ހޯދީ 2-1 އިންނެވެ. މެޗުގެ ފުރަތަމަ ހާފުގައި ބޯންމައުތުން ވަނީ ލަނޑު ޖަހައި ލީޑު ނަގައިފަ އެވެ. ދެ ވަނަ ހާފުގައި ދެ ވަނަ ލަނޑެއް ޖަހައި އެ ޓީމުން ލީޑު ފުޅާ ކޮށްފައިވާއިރު، މި ހާފުގައި ސިޓީން ވެސް ވަނީ ލަނޑެއް ޖަހައިފަ އެވެ.

މެޗު ފަށައިގެން ނުވަ ވަނަ މިނެޓުގައި ސިޓީ ކޮޅަށް ލަނޑު ޖަހައި ބޯންމައުތަށް ލީޑު ނަގައިދިނީ އެންޓޮއިން ސެމެންޔޯ އެވެ. އޭނާ އެ ލަނޑު ޖެހީ މިލޯސް ކާކެޒް ތަނަވަސްކޮށްދިން ފުރުސަތެއްގަ އެވެ. ސިޓީން ނަތީޖާ ހަމަހަަމަ ކުރުމަށް މަސައްކަތް ކުރަމުން ދަނިކޮށް، މެޗުގެ 68 ވަނަ މިނެޓުގައި ބޯންމައުތުން ވަނީ ދެ ވަނަ ލަނޑެއް ވެސް ޖަހައިފަ އެވެ. ކާކެޒް ތަނަވަސްކޮށްދިން ފުރުސަތެއްގައި މި ލަނޑު ޖެހީ އެވަނިލްސަން އެވެ. މެޗުގެ ފަހު ދިހަ މިނެޓުގެ ތެރޭގައި ސިޓީގެ ހަމައެކަނި ލަނޑު ޖެހީ ޖޮސްކޯ ގްވާޑިއޯލް އެވެ. އެއީ އިލްކާއީ ގުންޑޮގާން ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

މިއީ މި ސީޒަންގެ ޕްރިމިއާ ލީގުގައި އެންމެ ފަހުގެ ޗެމްޕިއަން ސިޓީ ބަލިވި ފުރަތަމަ މެޗެވެ. މިހާތަނަށް ކުޅުނު 10 މެޗުގެ ތެރެއިން އެ ޓީމު ވަނީ ހަތް މެޗުން މޮޅުވެފަ އެވެ. ދެ މެޗު އެއްވަރުވެފައިވާއިރު، ބަލިވެފައި ވަނީ އެއް މެޗުންނެވެ. 10 މެޗުން 23 ޕޮއިންޓާ އެކު ސިޓީ އޮތީ ދެ ވަނައިގަ އެވެ.