ހާލަންޑުގެ ދެ ލަނޑުން ޕޯޓޯ ބަލިކޮށް، ސިޓީގެ ފެށުން ވަރުގަދަކޮށްފި
9 ސެޕްޓެމްބަރު 2026 | ބުދަ 04:51މި ސީޒަންގެ ޕްރިމިއާ ލީގުގައި މިހާތަނަށް ކުޅެފައިވާ ތިން މެޗުން ވެސް ސިޓީ މޮޅުވެފައިވާއިރު، އެ ޓީމުގެ ފޯމު ފެންނަނީ ރަނގަޅަށް
މެޗުގައި ލަނޑު ޖެހުމަށް ފަހު ސިޓީގެ ހާލަންޑު އުފާ ފާޅުކުރަނީ | ރޮއިޓާސް
އައު ސީޒަންގެ ޔުއެފާ ޗެމްޕިއަންސް ލީގުގެ ލީގު ބުރުގައި ޕޯޓޯއާ ދެކޮޅަށް ކުޅުނު މެޗުން މޮޅުވެ، މެންޗެސްޓަރ ސިޓީ އިން މުބާރާތުގެ ފެށުން ވަރުގަދަކޮށްފި އެވެ.
ޕޯޓޯގެ އަމިއްލަ ދަނޑުގައި އަންގާރަ ދުވަހުގެރޭ ދަންވަރު ކުޅުނު މެޗު ސިޓީ އިން ކާމިޔާބުކޮށްފައި ވަނީ 2-0 އިންނެވެ. މެޗުގައި ސިޓީ އިން އެ ޓީމުގެ ދެ ލަނޑު ވެސް ޖެހީ މެޗުގެ ދެ ވަނަ ހާފުގަ އެވެ.
މެޗު ފަށައިގެން ސިޓީ އިން ރަނގަޅަށް ކުޅެމުން ދިޔައިރު، ފުރަތަމަ ހާާފުގައި ވެސް އެ ޓީމަށް ވަނީ ލަނޑު ޖަހަން ފުރުސަތު ލިބިފައި އެވެ. ނަމަވެސް، އެ ޓީމަށް އެއްވެސް ފުރުސަތެއްގެ ބޭނުން ކުރެވޭ ގޮތެއް ނުވި އެވެ.
މެޗުގެ ދެ ވަނަ ހާފު ފަށައިގެން ދެ ވަނަ މިނެޓުގައި ސިޓީ އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ނޯވޭގެ އާލިން ހާލަންޑު އެވެ. އެ ލަނޑު ޖަހަން ހާާލަންޑަށް ފުރުސަތު ތަނަވަސްކޮށްދިނީ މި ސީޒަންގައި ސިޓީ އަށް ބަދަލުވި އާޖެންޓީނާގެ އެންޒޯ ފެނާންޑޭސް އެވެ.
އޭގެ ފަހުން މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ހާލަންޑު ވަނީ ސިޓީގެ ދެ ވަނަ ލަނޑު ޖަހައި ލީޑު ފުޅާ ކޮށްފައި އެވެ. އެއީ ރަޔަން އައިޓް ނޫރީ ތަނަވަސްކޮށްދިން ފުރުސަތެއްގައި ހާލަންޑު ޖެހި ލަނޑެކެވެ.
މޮޅާ އެކު ސިޓީ އިން ޗެމްޕިއަންސް ލީގުގެ ފެށުން ރަނގަޅު ކޮށްފައިވާއިރު، ޗެމްޕިއަންސް ލީގުގައި ދެން އެ ޓީމަށް އޮންނާނީ އެންމެ ފަހުގެ ޗެމްޕިއަން ޕެރިސް ސެއިންޓް ޖާާމަން (ޕީއެސްޖީ)އާ ދެކޮޅަށް ކުޅޭ މެޗެވެ. މި ސީޒަންގެ ޕްރިމިއާ ލީގުގައި މިހާތަނަށް ކުޅެފައިވާ ތިން މެޗުން ވެސް ސިޓީ މޮޅުވެފައިވާއިރު، އެ ޓީމުގެ ފޯމު ފެންނަނީ ރަނގަޅަށެވެ.
