ޔުނައިޓެޑު ބަލިކޮށް، ސިޓީގެ ރެކޯޑު ކުރިއަށް

އިނގިރޭސި ޕްރިމިއާ ލީގުގައި ވާދަވެރި މެންޗެސްޓަރ ޔުނައިޓެޑާ ދެކޮޅަށް ކުޅުނު މެޗުން މޮޅުވެ، މެންޗެސްޓަރ ސިޓީ އިން އެ ޓީމުގެ މޮޅުވުމުގެ ރެކޯޑު ދަމަހައްޓައިފި އެވެ.

ޔުނައިޓެޑުގެ އަމިއްލަ ދަނޑުގައި އާދީއްތަ ދުވަހުގެރޭ ކުޅުނު މެޗު ސިޓީ އިން ކާމިޔާބު ކުރީ 1-0 އިންނެވެ. މެޗުގައި ސިޓީ އިން ލަނޑު ޖެހީ ވެސް ދެ ވަނަ ހާފުގަ އެވެ.

މެޗު ފަށައިގެން ދެ ޓީމުގެ ފަރާތުން ވެސް ވާދަވެރި ކުޅުމެއް ފެނިގެން ދިޔައިރު، ދެ ޓީމުން ވެސް ވަނީ ލަނޑު ޖަހަން ހަމަލާތަކެއް އުފައްދަން މަސައްކަތްކޮށްފަ އެވެ. މެޗުގެ 23 ވަނަ މިނެޓުގައި ސިޓީގެ ފިލް ފޮޑެން، ޔުނައިޓެޑުގެ ބްރޫނޯ ފެނާންޑޭސް އަށް ހަމަލާ ދިނުމުން، އޭނާ އަށް ވަނީ ސީދާ ރަތް ކާޑު ދައްކައިފަ އެވެ. މެޗުގެ ބާކީ ބައި ސިޓީ އިން ފުރިހަމަ ކުރަން ޖެހުނީ އެއް ކުޅުންތެރިޔަކު މަދުކޮށެވެ.

މެޗުގެ ދެ ވަނަ ހާާފުގެ 60 ވަނަ މިނެޓުގައި ސިޓީ އިން ވަނީ ޔުނައިޓެޑު ކޮޅަށް ލަނޑު ޖަހައި ލީޑު ނަގައިފަ އެވެ. އެ ލަނޑު ސިޓީ އަށް ޖަހައިދިނީ ނޯވޭގެ ފޯވާޑު އާލިން ހާލަންޑު އެވެ. މި ލަނޑު އޮފްސައިޑު ކަމަށް ނިންމުމަށް ފަހު، ވީޑިއޯ އެސިސްޓެންޓް ރެފްރީ (ވީއޭއާރު)ގެ އެހީތެރިކަމާ އެކު ފަހުން ވަނީ ބަަލައިގެންފައި އެވެ. އޭގެ ފަހުން ސިޓީ އިން ވަނީ ލީޑު ފުޅާ ކުރާނެ ފުރުސަތު ވެސް ހޯދައިފަ އެވެ.

މޮޅާ އެކު ސިޓީ އިން މި ވަނީ ޕްރިމިއާ ލީގުގައި މިހާތަނަށް ކުޅެފައިވާ ހަތަރު މެޗުން ވެސް މޮޅުވެފަ އެވެ. ހަތަރު މެޗުން 12 ޕޮއިންޓާ އެކު ސިޓީ ދެ ވަނައިގައި އޮތްއިރު، ހަމަ އެ އަދަދަށް ޕޮއިންޓު ހޯދައިގެން އެއް ވަނައިގައި އޮތީ އެންމެ ފަހުގެ ޗެމްޕިއަން އާސެނަލް އެވެ.