ސިޓީ ބަލިކޮށް، އާސެނަލް އިން ކޮމިއުނިޓީ ޝީލްޑު ކާމިޔާބުކޮށްފި
17 އޯގަސްޓު 2026 | ހޯމަ 03:22މީގެ ކުރިން 2023 ވަނަ އަހަރުގެ ކޮމިއުނިޓީ ޝީލްޑު މެޗުގައި ވެސް ބައްދަލުކޮށްފައި ވަނީ އާސެނަލް އާއި ސިޓީ. އެފަހަރު އާސެނަލް އިން ވަނީ ޕެނަލްޓީ ޖަހައިގެން ސިޓީ ބަލިކޮށް، ކޮމިއުނިޓީ ޝީލްޑު ކާމިޔާބު ކޮށްފައި
އާސެނަލް އިން ކޮމިއުނިޓީ ޝީލްޑު އުފުލާލަނީ | ގެޓީ އިމޭޖަސް
އައު ސީޒަން ފެށުމުގެ ގޮތުން ކުޅުނު ކޮމިއުނިޓީ ޝީލްޑު މެޗުގައި ވާދަވެރި މެންޗެސްޓަރ ސިޓީ ބަލިކޮށް، އާސެނަލް އިން ކޮމިއުނިޓީ ޝީލްޑު ކާމިޔާބުކޮށްފި އެވެ.
އާދިއްތަ ދުވަހުގެރޭ މިލޭނިއަމް ސްޓޭޑިއަމްގައި ކުޅުނު މެޗު އާސެނަލް އިން ކާމިޔާބުކޮށްފައި ވަނީ 3-0 އިންނެވެ. މެޗުގެ ފުރަތަމަ ހާފުގައި އާސެނަލް އިން ދެ ލަނޑު ޖެހިއިރު، އަނެއް ލަނޑު އެ ޓީމުން ޖެހީ ދެ ވަނަ ހާފުގައި އެވެ.
މެޗު ފަށައިގެން ފަސް ވަނަ މިނެޓުގައި އާސެނަލް އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އާސެނަލް އަށް ޖަހައިދިނީ ރިކާޑޯ ކަލަފިއޯރީ އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ މީލްސް ލެވިސް ސްކެލީ އެވެ. އެ ލަނޑަށް ފަހު ވެސް މެޗުގައި އާސެނަލް އިން ވަނީ ރަނގަޅަށް ކުޅެފައި އެވެ.
ނަތީޖާއެއްގެ ގޮތުން މެޗުގެ 28 ވަނަ މިނެޓުގައި އާސެނަލް އިން ވަނީ ދެ ވަނަ ލަނޑު ޖަހައި ލީޑު ފުޅާކޮށްފައި އެވެ. އެއީ ކައި ހަވާޓްޒް ޖެހި ލަނޑެކެވެ. އެ ލަނޑު ޖަހަން ހަވާޓްޒް އަށް ފުރުސަތު ތަނަވަސްކޮށްދިނީ ކްރިސްޓޮސް ޒޮލިސް އެވެ. އެއާ އެކު އާސެނަލް އިން ފުރަތަމަ ހާފު ނިންމާާލީ ދެ ލަނޑުގެ ލީޑެއްގައި އޮވެގެންނެވެ.
މެޗުގެ ދެ ވަނަ ހާފު ފަށައިގެން ތިން ވަނަ މިނެޓުގައި އާސެނަލްގެ ތިން ވަނަ ލަނޑު ޖަހައި އިތުރަށް ލީޑު ފުޅާ ކޮށްދިނީ މާޓިން އޮޑެގާޑް އެވެ. އެ ލަނޑު ޖަހަން އޮޑެގާޑް އަށް ވެސް ފުރުސަތު ތަނަވަސްކޮށްދިނީ ޒޮލިސް އެވެ.
މީގެ ކުރިން 2023 ވަނަ އަހަރުގެ ކޮމިއުނިޓީ ޝީލްޑު މެޗުގައި ވެސް ބައްދަލުކޮށްފައި ވަނީ އާސެނަލް އާއި ސިޓީ އެވެ. އެފަހަރު އާސެނަލް އިން ވަނީ ޕެނަލްޓީ ޖަހައިގެން ސިޓީ ބަލިކޮށް، ކޮމިއުނިޓީ ޝީލްޑު ކާމިޔާބުކޮށްފައި އެވެ. އާސެނަލް އަކީ މިދިޔަ ސީޒަންގެ އިނގިރޭސި ޕްރިމިއާ ލީގު ވެސް ކާމިޔާބުކޮށްފައިވާ ޓީމެވެ.
