ފްރާންސް ލީގުގައި މާސޭއާ ދެކޮޅަށް ކުޅުނު މެޗުން މޮޅުވެ، އެންމެ ފަހުގެ ޗެމްޕިއަން ޕެރިސް ސެއިންޓް ޖާމަން (ޕީއެސްޖީ) އިން އެއް ވަނަ މަގާމު ދަމަހައްޓައިފި އެވެ.

މާސޭގެ އަމިއްލަ ދަނޑުގައި ކުޅުނު މެޗު ޕީއެސްޖީން ކާމިޔާބު ކުރީ 3-0ންނެވެ. މެޗުގައި ޕީއެސްޖީން ތިން ލަނޑު ވެސް ޖެހީ ފުރަތަމަ ހާފުގަ އެވެ.

މެޗު ފަށައިގެން ހަތް ވަނަ މިނެޓުގައި ޕީއެސްޖީ އަށް ލީޑު ނަގައިދިނީ ޔާއޯ ނެވެސް އެވެ. މެޗުގައި މާސޭ އަށް އެންމެ ބޮޑު ގެއްލުމެއް ދެއްކީ އެ ޓީމުގެ އަމީން ހަރިތު އަށް ސީދާ ރަތް ކާޑު ދައްކައި ދަނޑުން ފޮނުވާލުމުންނެވެ. އޭގެ ނުވަ މިނެޓު ފަހުން ޕީއެސްޖީގެ ދެ ވަނަ ލަނޑަކީ މާސޭގެ ލިއޮނާޑޯ ބަލާޑީ އަތުން ބައި ކޮޅަށް ވަތް ލަނޑެކެވެ. މެޗުގައި ޕީއެސްޖީގެ ތިން ވަނަ ލަނޑު 40 ވަނަ މިނެޓުގައި ޖެހީ ބްރާޑްލޭ ބާކޮލާ އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ އޮސްމާން ޑެމްބެލޭ އެވެ.

މޮޅާއެކު ޕީއެސްޖީން ވަނީ އެއް ވަނައިގައި ތިން ޕޮއިންޓުގެ ލީޑެއް ނަގައިފަ އެވެ. މިހާތަނަށް ކުޅުނު ނުވަ މެޗުން އެ ޓީމަށް ލިބެނީ 23 ޕޮއިންޓެވެ. ހަމަ އެ އަދަދަށް މެޗު ކުޅެގެން ދެ ވަނައިގައި އޮތް މޮނާކޯ އަށް 20 ޕޮއިންޓު ލިބޭއިރު، ތިން ވަނައިގައި މާސޭ އޮތީ 17 ޕޮއިންޓާ އެކު އެވެ.