ހަތް މަސް ދުވަހަށް ވުރެ ގިނަ ދުވަހު އިޒްރޭލުން ޖަލުގައި ބަންދު ކޮށްގެން ގެންގުޅުމަށް ފަހު ގާޒާ ގެ އަލް-ޝިފާ ހޮސްޕިޓަލްގެ އެންމެ އިސް ވެރިޔާ ޑރ. މުހައްމަދު އަބޫ ސަލްމިޔާ ދޫކޮށްލައިފިއެވެ.

އޭނާ ދޫކޮށްލުމުން އިޒްރޭލުގެ ސަރުކާރުގެ ބައެއް ވަޒީރުން ވަނީ ނުރުހުން ފާޅު ކޮށްފައެވެ.

ޖަލުގެ އޮފިޝަލުން ބުނެފައިވާ ގޮތުގައި ޑރ. އަބޫ ސަލްމިޔާ ދޫކޮށްލީ، އޭނާގެ ފަރާތުން އޮތް ނުރައްކާ ވަޒަން ކުރުމަށް ފަހު ޖަލުގައި ތޮއްޖެހުން ބޮޑުވެފައިވާތީއެވެ.

ޖަލުން މިނިވަން ވުމުން އިޒްރޭލުން ޖަލުގައި ބަންދު ކޮށްގެން ގެންގުޅޭ ފަލަސްތީނު މީހުންނާ މެދު ކަންތައް ކުރަމުންދާ ލާ އިންސާނީ ގޮތުގެ ވާހަކަ ވަނީ ޑރ. އަބޫ ސަލްމިޔާ މީޑިއާ އާ ހިއްސާ ކޮށްފައެވެ.

ޑރ. އަބޫ ސަލްމިޔާ ހައްޔަރު ކުރި އިރު އިޒްރޭލު ސިފައިން ދެއްކި ބަހާނަޔަކީ އަލް ޝިފާ ހޮސްޕިޓަލަކީ، އޭނާގެ މެނޭޖްމަންޓްގެ ދަށުން، ހަމާސް ހަނގުރާމަވެރިން ކޮމާންޑް އެންޑް ކޮންޓްރޯލް ސެންޓަރެއްގެ ގޮތުގައި ބޭނުން ކުރާ ތަނެއް ކަމަށް ބުނެއެވެ.

ޑރ. އަބޫ ސަލްމިޔާ ބުނި ގޮތުގައި އިޒްރޭލުގެ ޖަލުތަކުގެ ހާލަތު ހުރީ ދުވަހަކުވެސް ތަނެއް ގޯސްވާނެ އެންމެ ބޮޑަށް ގޯސްވެފައެވެ.

ޑރ. އަބޫ ސަލްމިޔާ ބުނިގޮތުގައި ޖަލުގައި ބަންދު ކޮށްފައި ތިބި އެތައް މެޑިކަލް ސްޓާފުން ވަނީ އިޒްރޭލް ސިފައިން އަނިޔާ ކުރުމުގެ ސަބަބުން މަރުވެފައެވެ.

އިޒްރޭލް ސިފައިން ޖަލުގައި ބަންދު ކޮށްގެން ގެންގުޅު އަލް ޝިޕާ ހޮސްޕިޓަލްގެ އޮތޮޕީޑިކްސް ގެ އިސް ވެރިޔާ މި އަހަރުގެ އޭޕްރީލް މަހު ޖަލުގައި ވަނީ މަރުވެފައެވެ.

ޑރ. އަބޫ ސަލްމިޔާ ހާމަ ކުރި ގޮތުގައި ޖަލުގައި ތިބި ފަލަސްތީން މީހުންނަށް އެކި ބާވަތުގެ ގޯނާ ކުރުމުގެ އިތުރުން އެމީހުންނަށް ކާނާ އާއި ބޯފެންވެސް ލިބެނީ ކިރިޔާ ދުނިޔޭގައި ތިބޭ މިންވަރަކަށެވެ.

"އަހަރެމެންނަށް އިންތިހާ އަނިޔާ ކުރި، އަހަރެންގެ ކުޑަވައި އިނގިލިވެސް ބިންދާލި، ބޮލުގައި ޖަހާ ބޯ ފަޅާލި،" ޑރ. ޑރ. އަބޫ ސަލްމިޔާ ޖަލުގެ އަނިޔާތަކުގެ ވާހަކަ ކިޔައިދެމުން ބުނެފައިވެއެވެ.

"ޖަލުގައި ކޮންމެ ދުވަހަކީ ވެސް އަނިޔާ ކުރާ ދުވަހެއް، ކޮންމެ ދުވަހަކު ގައިގާ ތަޅާ."

އިޒްރޭލުގެ ޖަލު ތަކުގައި ބަންދުކޮށްގެން ގެންގުޅޭ ފަލަސްތީން މީހުންނަށް ލާ އިންސާނީ އަނިޔާ ދޭ ވާހަކަ ޖަލުތަކުގައި ބަންދު ކުރި އެތައް ހާސް މީހުން ވަނީ މީގެ ކުރިން ވެސް ހާމަ ކޮށްފައެވެ.

ގާޒާގެ މީޑިއާ އޮފީހުން ހާމަ ކޮށްފައިވާ ގޮތުގައި 2023 ގެ އޮކްޓޯބަރުގެ ފަހުން ޔަހޫދީ ދައުލަތުން ފަލަސްތީނުގެ 5000ށް ވުރެ ގިނަ މީހުން ވަނީ ރަހީނު ކޮށްފައެވެ.

އެމީހުންނާ ބެހޭ މައުލޫމާތެއް އެމީހުން ތިބި ހާލަތެއްވެސް ނޭނގޭ ކަމަށް ގާޒާގެ އޮފިޝަލުން ބުނެފައިވެއެވެ.