ދުނިޔޭގައި އެންމެ ގިނައިން ނޫސްވެރިން މަރާ ގައުމު ގެ ރެކޯޑް ޖެހިޖެހިގެން ތިންވަނަ އަހަރު އިޒްރޭލަށް!

އިޒްރޭލަކީ ދުނިޔޭގައި ނޫސްވެރިން އެންމެ ގިނައިން މަރާ ޤައުމު ކަމަށް ރިޕޯޓަރުސް ވިތައުޓް ބޯޑަރސް އިން ޖެހިޖެހިގެން ތިންވަނަ އަހަރަށް ކަނޑައަޅައިފި އެވެ.

ރިޕޯޓަރުސް ވިތައުޓް ބޯޑަރސް (އާރުއެސްއެފް) އިން ހާމަކޮށްފައިވާ ރިޕޯޓުގައިވާ ގޮތުގައި، 2025 ވަނަ އަހަރު ދުނިޔޭގެ އެކި ކަންކޮޅުތަކުން މަރުވި ނޫސްވެރިންގެ ތެރެއިން ގާތްގަނޑަކަށް ދެބައިކުޅަ އެއްބައި ނޫސްވެރިން މަރުވެފައިވަނީ އިޒްރޭލުން ހަނގުރާމަ ކުރަމުންދާ ޣައްޒާގައެވެ.

އަންގާރަ ދުވަހު ނެރުނު އަހަރީ ރިޕޯޓު ގައި އާރުއެސްއެފް އިން ބުނެފައިވަނީ، މި އަހަރު ދުނިޔެއިން މަރުވި 67 ނޫސްވެރިންގެ ތެރެއިން ގާތްގަނޑަކަށް ދެބައިކުޅަ އެއްބައި ކަމަށްވާ 29 ފަރާތަކީ ފަލަސްތީނުގެ ނޫސްވެރިން ކަމަށާއި އެއީ ޣައްޒާ ގައި އިޒްރޭލުގެ ސިފައިން ގެ ޝިކާރައަކަށްވީ މީހުން ކަމަށެވެ.

ޕެރިސް ގައި މައި ހެޑްކުއާޓާރސް ހުންނަ ނޫސްވެރިކަމުގެ މިނިވަންކަމަށް ވަކާލާތުކުރާ މި ޖަމިއްޔާއިން އިތުރަށް ބުނެފައިވަނީ، ޣައްޒާ ހިސޯރު ކޮށްގެން އުޅޭ އިޒްރޭލަކީ ފާއިތުވި ތިން އަހަރު ވެސް ނޫސްވެރިންނަށް ދުނިޔޭގައިވާ އެންމެ ނުރައްކާތެރި ބާރު ކަމަށެވެ.

އިޒްރޭލުން ޣައްޒާގައި ނަސްލު ނައްތާލުމުގެ ހަނގުރާމަ 2023 ވަނަ އަހަރުގެ އޮކްޓޯބަރު މަހު ފެށި ފަހުން، ގާތްގަނޑަކަށް 220 ނޫސްވެރިން މަރުވެފައިވެއެވެ.

އާރުއެސްއެފް ގެ ރިޕޯޓުގައި، 2024 ވަނަ އަހަރުގެ ޑިސެމްބަރު މަހުން ފެށިގެން 12 މަސް ދުވަހުގެ ތެރޭގައި މަރުވި ނޫސްވެރިންގެ މައުލޫމާތު ހިމަނާފައިވާއިރު، އިޒްރޭލު ސިފައިން ސިފަކޮށްފައި ވަނީ "ނޫސްވެރިންގެ އެންމެ ބޮޑު ދުޝްމަން" ގެ ގޮތުގައެވެ.

އެ ރިޕޯޓުގައި ބުނެފައިވަނީ، "ފާއިތުވި 12 މަސް ދުވަހު މަރުވި ނޫސްވެރިންގެ ގާތްގަނޑަކަށް ދެބައިކުޅަ އެއްބައި (43%) މީހުން ޣައްޒާގައި އިޒްރޭލުގެ ސިފައިންގެ އަތްދަށުވި" ކަމަށެވެ.

އެންމެ ގިނަ ނޫސްވެރިން މަރުވި ހަމަލާ ދީފައިވަނީ އޮގަސްޓު 25 ގައެވެ. އެ ދުވަހު ޣައްޒާގެ ދެކުނުގައި ހުންނަ ހޮސްޕިޓަލަކަށް ދިން ހަމަލާއެއްގައި ފަސް ނޫސްވެރިން މަރުވެފައިވެއެވެ.

އިސްރާއީލުން ވަނީ ފަލަސްޠީނުގެ ގިނަ ނޫސްވެރިންނަކީ "ޓެރަރިސްޓުން" ކަމަށް ލޭބަލް ކޮށްފަ އެވެ.

ހަނގުރާމައިގެ ސަބަބުން ސުންނާފަތިވެފައިވާ ފަލަސްތީނުގެ ސަރަހައްދަށް ބޭރުގެ ނޫސްވެރިންނަށް ވަނުން މަނާ ކޮށްފައި ވުމުގެ ސަބަބުން، ނޫސްވެރިކަމުގެ މިނިވަންކަމަށް ވަކާލާތުކުރާ ޖަމިއްޔާތަކުން މިނިވަންކަމާއެކު އެ ސަރަހައްދަށް ވަނުމުގެ ހުއްދަ ދިނުމަށް ތަކުރާރުކޮށް ގޮވާލާފައިވީ ނަމަވެސް، ނޫސްވެރިންނަށް ވަދެވޭނީ އިޒްރޭލުގެ ސިފައިން އިންތިޒާމުކުރާ ކޮންޓްރޯލް ކުރެވިފައިވާ ދަތުރުތަކުގައި އެކަންޏެވެ.

އޮކްޓޯބަރު 1 ގައި އާރުއެސްއެފް އިން ބުނެފައިވަނީ، އިޒްރޭލުގެ ވެރިކަމުން ޣައްޒާގައި ނޫސްވެރިންނަށް ދެމުންދާ ހަމަލާތަކާ ގުޅިގެން، އިންޓަނޭޝަނަލް ކްރިމިނަލް ކޯޓު (އައިސީސީ) އަށް، ފަސްވަނަ ފަހަރަށް އާ މައްސަލަ އެއް ހުށަހަޅާފައިވާ ކަމަށެވެ.