ދިވެހިބަހަށް އިސްކަންދީގެން ލިއުންތައް އުފެއްދުމާއި ބޭރު ބަސްތައް މަދުކުރުމުގައި ޖުޑީޝަރީއަށްވުރެ ކުރީގައި އުޅޭ ބަޔަކު ނެތް: ހުސްނުއްސުއޫދު
ޝަރުއީ ދާއިރާއިން ދިވެހިބަހަށް ދޭ އަހައްމިއްޔަތުކަން ޤައުމީ ފެންވަރެއްގައި ފާހަގަ ނުކުރެވޭ
ސްޕީޗް ޓު ޓެކްސްޓު ސްފޮޓްވެއާ "ކޭލި" އިފްތިތާޙު ކުރުމުގެ ރަސްމިއްޔާތު
ދިވެހިބަހަށް އިސްކަންދީގެން ލިއުންތައް އުފެއްދުމާއި ބޭރު ބަސްތައް މަދުކުރުމުގައި ޖުޑީޝަރީއަށްވުރެ ކުރީގައި އުޅޭ ބަޔަކު ނެތްކަމަށް ފަނޑިޔާރު ހުސްނުއްސުއޫދު ވިދާޅުވެއްޖެއެވެ.
ފަނޑިޔާރު އެހެން ވިދާޅުވީ ޝަރީއަތްތަކުގައި ދެކެވޭ ވާހަކަތައް ލިއުމަށް ތިރިކުރެވޭ ސޮފްޓްވެއަރ "ކޭލި"އިފްތިތާޙުކުރުމަށް ބޭއްވި ރަސްމިއްޔާތުގައި ވާހަކަ ދައްކަވަމުންނެވެ.
މި ރަސްމިއްޔާތުގައި ދެއްކެވި ވާހަކަފުޅުގައި ފަނޑިޔާރު ހުސްނުއްސުއޫދު ވިދާޅުވީ، ޝަރުއީ ދާއިރާއިން ދިވެހިބަހަށް ދޭ އަހައްމިއްޔަތުކަން ޤައުމީ ފެންވަރެއްގައި ފާހަގަ ނުކުރެވޭކަމަށެވެ.
އެންމެ ގިނައިން ދިވެހި ބަހުން ލިއުންތައް އުފައްދާ ތަނަކީ ޖުޑީޝަރީކަން ފާހަގަ ކުރައްވައި ފަނޑިޔާރު ހުސްނުއްސުއޫދު ވިދާޅުވީ، ދިވެހި ބަހުން ލިއުންތައް އުފެއްދުމުގެ ދާއިރާގައި ޖުޑީޝަރީއާ ވާދަ ކުރެވޭނެ ފަރާތެއް ނެތް ކަމަށެވެ.
ވަކިން ޚާއްސަކޮށް، މީހުންނަށް އޮޅުން ފިލާނެ ގޮތަށް ލިއުންތައް ލިއުމާއި، ބޭރު ބަސްތައް މަދު ކުރުން ފަދަ ކަންކަމުގައި ޝަރުއީ ދާއިރާއަށްވުރެ ކުރީގައި އެހެން ފަރާތެއް ނޫޅޭނެކަމަށް ފަނޑިޔާރު ވިދާޅުވިއެވެ.
ފަނޑިޔާރު ވިދާޅުވީ، ދިވެހި ބަހުގެ ފަންނީ ބަސްތައް އިތުރުކުރުމުގައި ޝަރުއީ ދާއިރާއިން ކޮށްދޭ ޚިދުމަތަކީ ދިވެހިބަހާއި ރަދީފަށް ލިބޭ ވަރަށް ބޮޑު މުއްސަނދި ކަމެއް ކަމަށެވެ. ނަމަވެސް އެކަންކަން ބަލައިގަނެވެނީ ވަރަށް ހަނި ދާއިރާއެއްގެ ތެރެއިންކަން ފަނޑިޔާރު ފާހަގަ ކުރެއްވިއެވެ.
ޝަރުއީ ދާއިރާއިން އިފްތިތާޙު ކުރި މި ސޮފްޓްވެއަރއަކީ ޝަރުއީ ދާއިރާގެ އިތުރުންވެސް މަޖިލީހާއި އެކިއެކި މުއައްސަސާތަކުން ބޭނުންކުރެވޭނެ ސޮފްޓްވެއަރއެކެވެ. އެގޮތުން ޔައުމިއްޔާތައް ލިއުމާއި، މަޖިލީހުގެ ކޮމިޓީތަކުގައި ދެކެވޭ ވާހަކަތައް ލިއުމާއި، އިދާރާތަކުން ކުރާ ތަހުގީގުތައް ވަގުތުން ލިއުމަށް ތިރިކުރުމަށްވެސް މި ސޮފްޓްވެއަރ ބޭނުން ކުރެވޭނެއެވެ.
މި ސޮފްޓްވެއަރގެ އެހީގައި ރެކޯޑިންގތައް އަޕްލޯޑް ކުރުމަށްފަހު، ތާނަ އަކުރަށް ބަދަލު ކުރެވޭނެއެވެ.
