ހައި ކޯޓަށް ޕީއެންސީގެ އެކްޓިވިސްޓު ޝަހީދު، އަދި ކުރީގެ ފަނޑިޔާރު ޖަމީލް ހަމަޖައްސަނީ
31 ޖުލައި 2025 | ބުރާސްފަތި 14:05ހައި ކޯޓުގައި ހުސްވެފައިވާ ދެ ފަނޑިޔާރުގެ މަގާމަށް ޝަހީދު އާއި ކުރީގެ ފަނޑިޔާރު އަބްދުﷲ ޖަމީލް މޫސާ އައްޔަން ކުރަން ވަނީ ނިންމާފަ
ހައި ކޯޓަށް އައްޔަން ކުރި މުހައްމަދު ޝަހީދު ރައީސް މުއިއްޒުއާއި އެކު، އަދި ފަނޑިޔާރުކަމަށް އައްޔަން ކުރި ކުރީގެ ގާޒީ އަބްދުﷲ ޖަމީލް މޫސާ
ހައި ކޯޓުގައި ހުސްވެފައިވާ ދެ ފަނޑިޔާރުގެ މަގާމަށް ޕީއެންސީގެ އެކްޓިވިސްޓެއްގެ ގޮތުގައި ހަރަކާތްތެރިވި މީހަކާއި ކުރީގެ ފަނޑިޔާރަކު އައްޔަން ކުރަން ޖުޑީޝަލް ސާވިސް ކޮމިޝަނުން ނިންމައިފި އެވެ.
ޖޭއެސްސީ އިން ބުނީ ހައި ކޯޓަށް އައްޔަން ކުރަން ނިންމީ، ޏ. ފުވައްމުލައް ދޫޑިގަން، ގޯލްޑަންގޭޓް، މުހައްމަދު ޝަހީދު އާއި ލ. މާވަށް ނަލަމަލަ، އަބްދުﷲ ޖަމީލް މޫސާ ކަމަށެވެ.
ޝަހީދު އަދި ޖަމީލް ހައި ކޯޓަށް އައްޔަން ކުރަން ފާސް ކުރީ ޖޭއެސްސީ އިން ބުދަ ދުވަހުގެ ރޭ ބޭއްވި ބައްދަލުވުމެއްގައި ކަމަށް އެ ކޮމިޝަނުން ބުނެ އެވެ. ނަމަވެސް ބައްދަލުވުމާއި ވޯޓުގެ ތަފުސީލެއް ކޮމިޝަނުން ނުދެ އެވެ.
އޭގެ ތެރެއިން ޝަހީދަކީ މިދިޔަ ރިޔާސީ އިންތިހާބު އަދި އޭގެ ފަހުން އޮތް މަޖިލިސް އިންތިހާބުގައިވެސް މިހާރު ވެރިކަން ކުރާ ޕީއެންސީއަށް ވަރުގަދައަށް ކެމްޕެއިން ކުރައްވައި ޕޯޑިއަމް ތަކުގައި ވާހަކަދެއްކެވި ބޭފުޅެކެވެ. ޕީއެންސީގެ އެކްޓިވިސްޓެއްގެ ގޮތުގައި ވެސް ހަރަކާތްތެރިވި ޝަހީދު ވަނީ ރައީސް މުހައްމަދު މުއިއްޒާއެކު ވެސް ބައެއް ކެމްޕެއިން ހަރަކާތްތަކުގައި ބައިވެރިވެފަ އެވެ.
ޝަހީދަކީ ހޯމް މިނިސްޓަރީގެ ނައިބު ކަމުގެ މަގާމުގައި ހުންނަވައިގެން، ސަރުކާރު ދިފާއު ކުރުމުގައި ވެސް އެކިއެކި ޕްލެޓްފޯމްތަކުގައި ވަރުގަދައަށް ވަކާލާތު ކުރެއްވި ސިޔާސީ ބޭފުޅެކެވެ.
އަބްދުﷲ ޖަމީލް މޫސާއަކީ ސިވިލް ކޯޓު ހިމެނޭ ގޮތަށް އެކި ކޯޓުތަކުގައި 15 އަހަރު ވަންދެން ފަނޑިޔާރުކަން ކޮށްފައިވާ ބޭފުޅެކެވެ. ސިވިލް ކޯޓުގެ ފަނޑިޔާރުގެ މަގާމުން ފެބްރުއަރީ، 2019، ގައި ވަކިވެވަޑައިގަތުމަށްފަހު މަސައްކަތް ކުރެއްވީ ވަކީލެއްގެ ގޮތުގަ އެވެ.
ހައި ކޯޓުގެ ފަނޑިޔާރުންގެ ބެންޗުން ދެ މަގާމު ހުސްވީ، ސުޕްރީމް ކޯޓުގެ ފަނޑިޔާރުން މަހާޒް އަލީ ޒާހިރާއި ފަނޑިޔާރު އަޒްމިރާލްދާ ޒާހިރު ގާނޫނާ ހިލާފަށް ވަކިކޮށް އަދި ފަނޑިޔާރު ހުސްނުއްސުއޫދު އިސްތިއުފާ ދެއްވުމުން، ހައި ކޯޓުގެ ދެ ފަނޑިޔާރަކު ހުސްވި ސުޕްރީމް ކޯޓުގެ މަގާމުތަކަށް އައްޔަން ކުރުމުންނެވެ.
ޖޭއެސްސީ އިން އެމަގާމަށް ކުރިމަތި ލުމުގެ ފުރުސަތު ހުޅުވައިލާފައިވަނީ ޖުލައި މަހުގެ 21 ވަނަ ދުވަހު އެވެ. ޖޭއެސްސީން ކުރިމަތިލާން ހުޅުވާލުމުން 17 ބޭފުޅަކު އެ ދެ މަގާމަށް ކުރިމަތިލެއްވި އެވެ.
