ހައްގެއް ހޯދަން ޓަކި ޖަހާލާނެ ދޮރެއް ވެސް މިއަދަކު މި ގައުމުގައި ނެތެވެ.

އިސްލާމީ އުސޫލުތަކެއް، ޝަރީޢާއެއް، އަދުލު އިންސާފެއް މިއަދު މިގައުމަކު ނެތޭ ބުނުމަކީ ދޮގަކަށް ނުވާނެއެވެ. މިރާއްޖޭގެ އުތުރުން ދެކުނަށް، އިރުން ހުޅަނގަށް ނަޒަރު ހިންގާލި ނަމަވެސް ފެންނަން އޮތީ ވަޟުޢީ ގާނޫނު ފެތުރިފައި އޮތް ތަނެވެ. އިސްލާމީ ރިވެތި އުސޫލުތަކާއި، ޝަރީއާގެ ބަދަލުގައި ވަޟުއީ ގާނޫނުތައް ހަދައިގެން އެއަށް އަމަލުކުރަމުން ގެންދާ ތަނެވެ.

ވަޟުއީ ޤާނޫނުތައް އެ ހަދަނީ ތިމާމެން ހިތުހުރި ގޮތަކަށް، ހިތު ހުރި އެއްޗެއް ފަސޭހަ އިން އަތްދަށުލައި ދިރުވާލެވޭ ގޮތަށެވެ. އަމިއްލަ އަންބޮނޑި ބޮޑުކޮށް އައުވާނުންނަށް ލާބައާއި މަސްފާ ނެގޭ ގޮތަށެވެ. ހަގީގަތުގައި ވެސް މިއަދު ދައުލަތް ހިންގަމުންދަނީ ވަގުންނާއި ފޭރޭ މީހުންނަށް ތިޖޫރީތައް ހުޅުވާލައިގެން ހިތުހުރިވަރަކަށް ބަނޑުފުރާ ކެވޭގޮތަށް ތަތްމިނަށް ހުޅުވާލައިގެންނެވެ.

ނަމުގައި މިނިވަން މުސްތަގިއްލު މުއައްސަސާތަކެވެ. ނަމުގައި އަދުލު އިންސާފާއި ހަމަކަމާއި އެކު ހުކުމް ކުރާ ކޯޓު ތަކެވެ. އެހެން ނަމަވެސް ފެންނަނީ މުޅިންހެން އަމިއްލަ ވަންތަކަމާއި އަޅުވެތި ކަމެވެ. ނިކަމެއްޗަކު، ނުވަތަ ފަގީރަކު ހައްގެއް ހޯދަން ޓަކި ޖަހާލާނެ ދޮރެއް، ދޮރާއްޓެއް މިއަދަކު މި ގައުމަކު ނެތެވެ. ނަތީޖާއަކަށް ވެފައި ވަނީ ރައްޔިތުން މާޔޫސްވެ، ގޮތް ހުސްވުމެ އެވެ. ހަގީގަތުގައި ވެސް ދައުލަތުގެ ބޭނުމެއް ނެތެ އެވެ.

ރައީސް ޑރ. މުހައްމަދު މުއިއްޒުގެ މި ސަރުކާރު ވެރިކަމަށް އައިސް އެކި ގޮތްގޮތުން މަސައްކަތް ކޮށްފައިވަނީ ރައްޔިތުން ނިކަމެތިކޮށް، ރައްޔިތުން ހިތު ތެރޭގައި ބިރުވެރިކަން އުފެއްދުމަށެވެ. ފެންނަނީ ރައްޔިތުންނަށް އޮޅުވާލައި ގައުމުގެ ކަންކަން އެހެން މިސްރާބަކަށް ދީލާލަން މަސައްކަތް ކުރަމުން ގެންދާ މަންޒަރެވެ. ގައުމުގެ ބައިތުލްމާލުން ފޫދުއްވާލައި ގައުމު އިނދަޖައްސާލަން މަސައްކަތް ކުރާ މަންޒަރެވެ. ފެންނަމުން ދަނީ ސަރުކާރުން ގާނޫނެއް ގަވާއިދަކަށް ބެލުމެއް ނެތި ހިތްޕުޅާވާހާ ގޮތެއް ހަދައި ހުރިހާ ބާރުތަކެއް އެކަތިގަނޑެއްގެ ގޮތުގައި ހަދައި މުށުތެރެއަށް ލާން މަސައްކަތް ކުރަމުން ގެންދާ މަންޒަރެވެ.

ފަނޑިޔާރުގެތަކަށް އަތް ބާނައި އެތަން ވަނީ ހިސޯރުކޮށްފައެވެ. ގައުމުގެ ފަނޑިޔާރުގެ އަކަށް މިނިވަންކަމާއި އެކު ކަމެއް ނިންމުމުގެ އެއްވެސް ބާރެއް މިއަދަކު ނެތެވެ. އަދުލު އިންސާފަށް ލޯބިކުރާ ފަނޑިޔާރެއް ހުރިނަމަ އެ ފަނޑިޔާރެއް ނަގައި އެއްލާލަނީއެވެ.

ރައީސް އޮފީހުން ލިޔެފައި ދޭ ހުކުމްތަކާއި އަމުރުތަކުގައި ހުރުމަތްތެރިވެގެންވާ ފަނޑިޔާރުގެތަކުގެ ތަތްގަނޑު ޖަހައި މުޅި ޝަރުއީ ނިޒާމު މޫރިތިކަން މިއަދު ގެއްލުވާލައިފި އެވެ. މިހާރުގެ ހާލަތު މި އޮތް ގޮތުން ސުޕްރީމް ކޯޓުގެ ލޯގޯގައިވާ ތަރާދު ވެސް އެއް އަތަކަށް އަރިކުރަން ޖެހެ އެވެ. ފަނޑިޔާރުތަކުން ހާމައަށް ރޯމާ ދުވާލު ބޭއިންސާފު އާންމުކުރާ ނަމަ، ތިލަފަތް އެއް ހަމަ ކޮށްފައި ބާއްވަނީ ކާކަށް ދައްކަން، ކާކަށް ކޯއްޗެއް އޮލުވާލަންތޯ ހިތައް އަރައެވެ. މި ވާހަކައެއް މިހެން ދެއްކީމާ ގޯސްވާނީ އެ ވާހައެއް ދެއްކި މީހާ އެވެ. ގެއްލޭނީ ތަސައްވަރެވެ. ތިމާމެންނަށް އުޅެވޭ ނޫޅެވޭ ގޮތެއް ތިމާމެންނަކަށް ވެސް މިހާރު ނޭނގެ އެވެ.

ވެރިކަމުގައި އާރާއި ބާރު އޮތް ރައީސް މުއިއްޒަށް ތާއީދު ކުރާ ނުވަތަ އެމަނިކުފާނުގެ އައުވާނުން ބޭނުންވާ ގޮތަކަށް މެނުވީ މިއަދު ގައުމުގައި ކަމެއް ނުހިނގައެވެ. ކޯޓަކަށް މައްސަލައެއް ލިއަސް މި ސަރުކާރުން ބޭނުންވާ ގޮތަށް ނޫނީ ނުނިމެއެވެ. ނަމަވެސް އާންމު މީހަކު ކޯޓަކަށް މައްސަލައެއް ލައިފިއްޔާ، އެ މައްސަލައެއް ނިމޭއިރު މީހާ އަށް ހުންނާނީ ވާނެ އެއްޗެއްވެ ނިމިފަ އެވެ. އަދުލައް އިންސާފެއް ރައްޔިތަކަށް ނުލިބެއެވެ.

މިއީ މިއަދު މި ގައުމުގެ ފަނޑިޔާރުގެތަކާއި މިނިވަން މުއައްސަސާތައް އޮތް ހާލަތެވެ. ގައުމުގެ މުއައްސަސާއެއް ވެސް ހުރިއްޔާ ހުރީ ހަމަ މިފަދަ ހާލަތުގައެވެ. ކުރުކޮށް ބުނާނަމަ މި ތަންތަނުގެ އެޖެންޑާގައި ރައްޔިތުންގެ ވަސް ވެސް ނެތެވެ. ލިބޭ އެއްޗެއް ލިބިގަނެގެން ބަސް އަހާލައިގެން މަޑުން ތިބުން ނޫންގޮތެއް މިއަދު ނެތެވެ. ރައްޔިތެއްގެ ނަޒަރުން ބަލާނަމަ މިނިވަން މުއައްސަސާތަކާއި ކޮމިޝަންތަކޭ މިކިޔާ ތަންތަނަށް ވެސް ލާފައި އެ ތިބީ ބޭކާރު ބޯތަކެކެވެ. ރައީސް މުއިއްޒަށް އަޅުދާސްތުވެފައި ތިބި ދެފުއްކެހެރިންނެވެ.

މިއީ މިއަދު ދިވެހި ދައުލަތުގެ ހާލަތެވެ. މި ހާލަތު ބަދަލުކުރަން ބޭނުންނަމަ ދިވެހި ދައުލަތް މުޅިން އޯވަހޯލް ކުރުން ނޫންގޮތެއް މިއަދު ނެތެވެ.