ފާއިތުވެ ދިޔަ 10 އަހަރު ރާއްޖޭގެ ޑޮލަރު ރިޒާވް ދަށަށް ނުދާހާ މިންވަރަށް ދަށަށް ހިނގައްޖެއެވެ.

ރާއްޖޭގެ ޑޮލަރު ރިޒާވް ގައި ޖުލައި މަސް ނިމުނު އިރު ހުރި މިންވަރު އެއީ މި ފާއިތުވެ ދިޔަ 10 އަހަރުގެ ތެރޭގައި އެންމެ ދަށަށް ދިޔަ އަދަދު ކަން މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ހިސާބުތަކުން ވަނީ ހާމަވެފައެވެ.

އެމްއެމްއޭގެ ތަފާސް ހިސާބަށް ބަލާއިރު ޖުލައި މަސް ނިމުނު އިރު ރިޒާވްގައި ހުރީ 395.43 މިލިއަން ޑޮލަރެވެ. އެހެން ނަމަވެސް ޖޫން މަސް ނިމުނު އިރު ރިޒާވް ގައި 509.21 މިލިއަން ޑޮލަރު ހުރި ކަމަށް އެމްއެމްއޭގެ ހިސާބުތަކުން ފެނެއެވެ.

އެހެން ކަމުން މިދިޔަ މަސްދުވަހުގެ ތެރޭގައި ރާއްޖޭގެ ރިޒާވް އިން 113.79 މިލިއަން ޑޮލަރު ވަނީ މަދުވެފައެވެ. އެއީ 22.3 އިން ސައްތައިގެ އުނިވުމެއް ކަމަށް އެމްއެމްއޭ އިން ބުނެފައިވެއެވެ.

އެމްއެމްއޭގެ ހިސާބުތަކުން ފެންނަ ގޮތުގައި ހުސްވި އަހަރުގެ ޖުލައި މަސް ނިމުނު އިރު ރިޒާވް ގައި ޑޮލަރު ހުރި މިންވަރަށް ވުރެ މި އަހަރުގެ ޖުލައި މަސް ނިމުނު އިރު ޑޮލަރު ހުރީ 33.4 އިން ސައްތަ މަދުންނެވެ.

ރާއްޖޭގެ ޑޮލަރު ރިޒާވް ރެކޯޑް މިންވަރަކަށް ދަށަށް ގޮސްވައިވާ ކަމަށް އެމްއެމްއޭގެ ހިސާބުތަކުން ފެންނަ އިރު ރާއްޖެއަށް ދެވަނަ އަށް އެންމެ ގިނައިން ޑޮލަރު ލިބެމުން އައި މަސް އެކްސްޕޯޓް ކުރުންވެސް ބޮޑު ތަނުން ވަނީ ދަށަށް ގޮސްފައެވެ. މިއަހަރުގެ ޖޫން މަހު ރާއްޖެއިން އެކްސްޕޯޓް ކުރި ފިނިކުރި މަހުގެ މިންވަރު ހުސްވި އަހަރުގެ ޖޫން މަހު އެކްސްޕޯޓް ކުރި މިންވަރަށް ވުރެ 49.4 އިން ސައްތަ ވަނީ ދަށްވެފައެވެ.

ރާއްޖެއަށް އެންމެ ގިނަ އިން ބޭރުފައިސާ ވަންނަ ފަތުރުވެރިކަމަށް ޖޫން މަހު ކުޑަ ކުރިއެރުމެއް ލިބިފައިވެއެވެ. އެމްއެމްއޭ އިން ބުނީ ޖޫން މަހު ރާއްޖެއަށް 123،284 ފަތުރުވެރިން އައި ކަމަށެވެ. އެއީ ކުރީ އަހަރުގެ ޖޫން މަހު ރާއްޖެ އަށް އައި ފަތުރުވެރިންނަށް ވުރެ 2.4 އިން ސައްތަ އިތުރު މިންވަރެކެވެ.

އަނެއްކޮޅުން އެމްއެމްއޭ އިން ބުނެފައިވަނީ މެއި މަހަށް ވުރެ ޖޫން މަހު އިންފްލޭޝަން މައްޗަށް ގޮސްފައިވާ ކަމަށެވެ. މެއި މަހު 0.8 އިން ސައްތައިގައި އިންފްލޭޝަން ހުރި އިރު ޖޫން މަހު އިންފްލޭޝަން 1.4 އިން ސައްތަ އަށް ވަނީ އުފުލިފައެވެ.