މުއުތަސިމް ރިޓަޔާ ކުރެއްވުމުން، އުއްތަމަ ފަނޑިޔާރުގެ މަސްއޫލިއްޔަތު ޢަބްދުﷲ ޙަމީދަށް
21 ޖުލައި 2025 | ހޯމަ 07:35ސުޕްރީމް ކޯޓުން ނެރެފައިވާ ދެންނެވުމެއްގައި ބުނެފައި ވަނީ، 2025 ޖުލައި 21 ވަނަ ދުވަހުން ފެށިގެން މުއުތަސިމް އުއްތަމަ ފަނޑިޔާރު ކަމުގެ މަގާމުން ޝަރަފުވެރިކަމާ އެކު ރިޓަޔާވުމާ ގުޅިގެން، ސުޕްރީމް ކޯޓުގެ ހިންގުން ފަނޑިޔާރު ޙަމީދާއި ހަވާލު ކޮށްފައިވާ ކަމަށް
ސުޕްރީމް ކޯޓުގެ ފަނޑިޔާރު އަލްއުސްތާޛް ޢަބްދުﷲ ޙަމީދު
ސުޕްރީމް ކޯޓުގެ އުއްތަމަ ފަނޑިޔާރުގެ މަގާމުން އަލްއުސްތާޛް އަޙުމަދު މުއުތަސިމް އަދުނާން ރިޓަޔާ ކުރެއްވުމާއެކު، އުއްތަމަ ފަނޑިޔާރުގެ މަސްއޫލިއްޔަތު ފަނޑިޔާރު އަލްއުސްތާޛް ޢަބްދުﷲ ޙަމީދުއާ ހަވާލު ކުރައްވައިފި އެވެ.
އުއްތަމަ ފަނޑިޔާރު ކަމުގައި ހުންނެވި މުއުތަސިމް ވަނީ ހޯމަ ދުވަހު ރިޓަޔާ ކުރައްވައިފަ އެވެ. އުއްތަމަ ފަނޑިޔާރުގެ މަގާމުން ރިޓަޔާ ކުރެއްވުމަށް މުއުތަސިމް ހުށަހެޅުއްވީ މިއަހަރުގެ މެއި މަހުގެ ތެރޭގަ އެވެ. މުއުތަސިމްގެ ހުށަހެޅުން ޤަބޫލުކޮށް އޭނާ ރިޓަޔާ ކުރެއްވުމަށް ޖުޑީޝަލް ސާވިސް ކޮމިޝަން (ޖޭއެސްސީ) އިން ނިންމީ މިދިޔަ ބުރާސްފަތި ދުވަހު އެވެ.
ސުޕްރީމް ކޯޓުން ނެރެފައިވާ ދެންނެވުމެއްގައި ބުނެފައި ވަނީ، 2025 ޖުލައި 21 ވަނަ ދުވަހުން ފެށިގެން މުއުތަސިމް އުއްތަމަ ފަނޑިޔާރު ކަމުގެ މަގާމުން ޝަރަފުވެރިކަމާ އެކު ރިޓަޔާވުމާ ގުޅިގެން، ސުޕްރީމް ކޯޓުގެ ހިންގުން ފަނޑިޔާރު ޙަމީދުއާ ހަވާލު ކޮށްފައިވާ ކަމަށެވެ.
އެެހެންކަމުން ހޯމަ ދުވަހުން ފެށިގެން، އުއްތަމަ ފަނޑިޔާރު ކަމުގެ މަގާމަށް ބޭފުޅަކު އައްޔަން ކުރަންދެން ސުޕްރީމް ކޯޓަށް ފޮނުވާ އެންމެހައި ސިޓީ އެޑްރެސް ކުރަން ވާނީ، ސުޕްރީމް ކޯޓު ހިންގުމާ ހަވާލުވެ ވަޑައިގެން ހުންނެވި ފަނޑިޔާރު ޙަމީދު އަށް ކަމަށް ސުޕްރީމް ކޯޓުން ވަނީ ބުނެފަ އެވެ.
ދިވެހި ރާއްޖޭގެ އުއްތަމަ ފަނޑިޔާރު ކަމުގެ މަގާމަށް މުއުތަސިމް އައްޔަން ކޮށްފައި ވަނީ 2019 ވަނަ އަހަރުގެ ޑިސެމްބަރު މަހު އެވެ. ސުޕްރީމް ކޯޓުން ވަނީ އެ މުއްދަތުގެ ތެރޭގައި މުއުތަސިމް ކޮށްދެއްވާފައިވާ ޚިދުމަތަކަށް ޝުކުރު އަދާ ކުރާ ކަމަށް ހާމަކޮށްފަ އެވެ.
ޙަމީދަކީ ހައި ކޯޓުގެ އިސް ފަނޑިޔާރުކަން މީގެ ކުރިން ކުރައްވާފައިވާ ބޭފުޅެކެވެ. ޙަމީދާ ގުޅުން ހުރި މައްސަލަ އެއް ޖޭއެސްސީ އިން ތަހުގީގު ކުރިއިރު، ފަނޑިޔާރު ކަމުން އޭނާ ވަކި ކުރުމަށް ރައްޔިތުންގެ މަޖިލީހުން ވަނީ 2022 ވަނަ އަހަރު ފާސްކޮށްފަ އެވެ. އެއީ ކުރީގެ ރައީސް ޢަބްދުﷲ ޔާމީންގެ ވެރިކަމުގައި ފަނޑިޔާރުންނަށް ދިން ފްލެޓު ޤަބޫލު ކުރި މައްސަލައިގަ އެވެ.
އޭގެ ފަހުން ސުޕްރީމް ކޯޓަށް ޙަމީދު އައްޔަން ކުރައްވާފައި ވަނީ ރައީސް ޑޮކްޓަރު މުޙައްމަދު މުޢިއްޒުގެ ވެރިކަމުގަ އެވެ. ސުޕްރީމް ކޯޓުގެ ފަނޑިޔާރު ކަމުގެ މަގާމަށް ޙަމީދު އައްޔަން ކުރައްވާފައި ވަނީ މިދިޔަ ޖޫން މަހުގެ 11 ވަނަ ދުވަހު އެވެ.
