އެފްރިކަން ނޭޝަންސް ކަޕުގައި ކުޅެން އައިވަރީ ކޯސްޓަށް ދަތުރުކުރަނިކޮށް ފްލައިޓްތެރޭގައި ގެމްބިއާ ކުޅުންތެރިންނަށް ގޮތްނޭނގޭ ގޮތްތަކެއްވާން ފެށުމުން ކޯޗުގެ އެދުމަށް ފްލައިޓް އަނބުރައި ތިރިކޮށްފި އެވެ.
ބުދަ ދުވަހު ގެމްބިއާ ކުޅުންތެރިން އައިވަރީ ކޯސްޓަށް ފުރީ އައިވަރީ ކޯސްޓްގެ ގައުމީ އެއާލައިންގަ އެވެ. ނަމަވެސް ފްލައިޓް މައްޗަށް އެރިތާ ހައެއްކަ މިނިޓް ތެރޭގައި ގެމްބިއާގެ ވެރިރަށް ބަންޖޫލް އަށް ބޯޓު ތިރިކުރީ ކޯޗު އެދުމުގެ މަތީން އިމަޖެންސީގަ އެވެ
އެއާލައިން އޮފިޝަލުން ބުނީ ބޯޓު ތިރިކުރަން ޖެހުނީ ގިނަ ކުޅުންތެރިންތަކެއް ނިދޭގޮތްވެ، ހެއަށް ގޮތްވާން ފެށުމުން ކަމަށެވެ. އަދި އެކަން އެގޮތަށް މެދުވެރިީ އެކަށީގެންވާ ވަރަށް އޮކްސިޖަން ނުލިބުމުން ކަމަށްބެލެވޭ ކަމަށެވެ. އަދި ޕައިލެޓް ގާތުގައި ބޯޓު ތިރުކުރަން އެދުނީ ކޯޗު ކަމަށެވެ.
"ކުރޫއަކު ބުނީ ބޯޓު ފުރިއިރު ވެސް އެއާކަންޑިޝަންތަކަށް މައްސަލަ ދިމާވި ކަމަށް. އެކަމަކު ބޯޓު ނައްޓާލިއިރު އެންމެންގެ ހާލު ވެސް ރަނގަޅު. ބޯޓު މައްޗަށް އެރިތާ މަދު މިނިޓްތަކެއްގެ ތެރޭގައި ބޯޓުތެރެ ހޫނުވާން ފެށީ، އަހަރުމެން އެންމެންވެސް ތިބީ ނިދިޖެހިފައި. އެއީ އޮކްސިޖަން މަދުވުމުން. ބައެއް ކުޅުންތެރިންނަށް ރަނގަޅަށް ހޭނާރާ. ޕައިލެޓަށް އެ ހިސާބުން އެނގުނު އަނބުރާލަންވެއްޖެކަން،"އެއާލައިންގެ އޮފިޝަލަކު ބުންޏެވެ.
އޭނާ އަދި ބުނީ ބޯޓު އިތުރަށް 30 މިނިޓް ދުއްވިނަމަ މީހުން ބޮލަށް ތަދުވާން ފަށާނެ ކަމަށެވެ.
"މުޅި ޓީމު މަރުވާނީ. އެންމެ ބިރުވެރި ކަމަކަށްވީ އޮކްސިޖަން މާސްކްތައް ވެސް ނެގޭގޮތް ނުވިކަން. އެންމެ ރަނގަޅަށް ދިމާވި ކަމަކީ ޕައިލެޓަށް އެނގުނުކަން މިތިބީ މަރުގެ ތުންފަތްމަތީގައިކަން. އޭނާ އަނބުރާލީ. އެކަމަކު މިއީ އެންމެނަށް ވެސް ވަރަށް ބޮޑު ޝޮކެއް،"ކުޅުންތެރިއަކު ބުންޏެވެ.
އައިވަރީ ކޯސްޓްގެ އެއާލައިނުން ވެސް ވަނީ ބަޔާނެއް ނެރެފަ އެވެ. އެ ބަޔާނުގައި ބުނެފައިވަނީ އެއާކަންޑިޝަންތަކަށް ދިމާވި މައްސަލަ ބޯޓު ތިރިކޮށް ހައްލު ކުރި ކަމަށެވެ. ނަމަވެސް އެ ފްލައިޓްގައި ދަތުރުކުރަން ނިންމައި އެ މޮޑެލްގެ އާ ފްލައިޓެއް ގެމްބިއާ ޓީމު ދަތުރުކުރަން ހަމަޖައްސާދީފައިވާ ކަމަށެވެ. ނަމަވެސް އެ ބޯޓުގައި ދަތުރުކުރަން ގެމްބިއާގެ ކެޕްޓަން ވަނީ ދެކޮޅު ހަދައިފަ އެވެ.
"އަހަރުމެން މަރުވާން ބޭނުންވަނީ ގައުމަށްޓަކައި ދަނޑުމަތީގައި ގުރުބާންވެގެން ފްލައިޓެއްގައެއްނޫން،"ގެމްބިއާގެ ބެލްޖިއަމް ކޯޗު ބުންޏެވެ.
މިކަމާ ބެހޭ ގޮތުން ގެމްބިއާގެ ފުޓްބޯޅަ ފެޑަރޭޝަނުން ބުނީ ބޯޓަށް ދިމާވީ ކޮންކަހަލަ މައްސަލައެއްކަން ކަނޑައެޅިގެން ބުނަން ނޭނގޭ ކަމަށެވެ. އަދި ކުޅުންތެރިން ސަލާމަތުން އެނބުރި އައިސް ޓާމިނަލްގައި މަޑުކުރީ ކަމަށެވެ.
މުބާރާތުގައި ހޯމަ ދުވަހު ސެނެގާލްއާ ދެކޮޅަށް ކުޅެން ޖެހޭ ގެމްބިއާ ޓީމު އައިވަރީ ކޯސްޓަށް ފަހުން ފުރީ އައިވަރީ ކޯސްޓްގެ ގައުމީ އެއާލައިނުން ހަމަޖައްސައިދިން އެއާބަސް 319ގެ ބޯޓެއްގައި ބުރާސްފަތި ދުވަހު އެވެ.
