އަންނަ ހަފުތާގައި ފަށާ އޭޝިޔާ ކަޕް އަދި އެފްރިކަން ކަޕް އޮފް ނޭޝަންސްގެ ސަބަބުން ޗެމްޕިއަން މެންޗެސްޓާ ސިޓީ ނޫން އިނގިރޭސި ބޮޑެތި ޓީމުތަކަށް ބޮޑެތި ގެއްލުންތަކާ ކުރިމަތިވެއްޖެ އެވެ.
މަހެއްހާ ދުވަހަށް ޓީމުތަކުގެ އެންމެ ސީނިއާ ކުޅުންތެރިން ގައުމީ ޓީމަށް ދޫކޮށްލަން ޖެހޭއިރު، ކުޅުންތެރިއަކު ދޫކުރަން ނުޖެހޭ ގަދަ ޓީމަކީ ސިޓީ އެވެ. މިހެންވެ ގިނަ ތަޖުރިބާކާރުން ވަނީ ސިޓީ ތަށި ދިފާއު ކުރާނެ ކަމަށް ބުނަން ފަށައިފަ އެވެ. ސަބަބަކީ ސީޒަނުގެ އެންމެ ބިޒީ ދުވަސްކޮޅު، މުހިންމު ކުޅުންތެރިންތަކެއް ގެއްލޭތީ އެވެ.
ޓޭބަލުގެ އެއްވަނާގައިވަނީ ލިވަޕޫލެވެ. އެ ޓީމުގެ އެންމެ މުހިންމު ފޯވަޑް މުހައްމަދު ސަލާހް މިސުރުގެ ގައުމީ ޓީމާ ގުޅިފައިވާއިރު މިޑްފީލްޑަރު ވަޓަރޫ އެންޑޯ ޖަޕާނުގެ ގައުމީ ޓީމަށް ދާނެ އެވެ.
ޓޭބަލުގެ ދެވަނާގައިވާ އެސްޓަންވިލާގެ ބާޓްރާންޑް ޓޯރޯ ވެސް ބުރުނީކިފާސޯގެ ގައުމީ ޓީމާ ގުޅޭނެ އެވެ. ޓޮޓެންހަމުގެ ކެޕްޓަން އަދި އެންމެ މުހިންމު ކުޅުންތެރިން ސޮން ހުންގ މިން ސައުތު ކޮރެޔާގެ ޓީމަށް ކުޅެންޖެހެ އެވެ.
އެންމެ ބޮޑު ގެއްލުމެއް ކުރިމަތިވާނެ އެއް ޓީމަކީ އާސެނަލް އެވެ. ތޯމަސް ޕާޓޭ އަނިޔާގެ ސަބަބުން ގާނާ ޓީމުން އުނިކުރި ނަމަވެސް މިސުރުގެ މުހައްމަދު އެލްނެނީ އާއި ޖަޕާނުގެ ޓެކްހީރޯ ޓޮމިޔާސޫ ގައުމީ ޓީމާ ގުޅޭނެ އެވެ.
ޕްރެޝަނުރުގައި އޮތް މެންޗެސްޓާ ޔުނައިޓެޑްގެ ކީޕަރު އަންދްރޭ އޮނާނާ ކެމަރޫނުގެ ގައުމީ ޓީމަށް ދާއިރު، މޮރިކޯގެ މިޑްފީލްޑަރު ސޮފްޔާން އަމްރަބްތު އަދި އައިވަރީ ކޯސްޓްގެ އަމަޑް ޑިއާލޯ ވެސް ގެއްލޭނެ އެވެ.
ލިވަޕޫލްގެ ކޯޗު ޔާގެން ކްލޮޕް ބުނީ މިއީ ކުރިން ވެސް އަންނާނެ ހާލަތެއްކަން އެނގޭ ކަމަށާއި މިކަމަށް ތައްޔާރުވާންޖެހޭނީ ކުލަބުތަކުން އަމިއްލައަށެވެ.
އެފްރިކާގެ ކުޅުންތެރިން އަދި އޭޝިޔާގެ ކުޅުންތެރިން ވެސް ގައުމީ ޓީމަށް ކުޅެންޖެހޭނެ. އެހެންވީމާ މި ހާލަތަށް ތައްޔާރުވާންޖެހޭނީ ކުލަބުތަކުން. ލިވަޕޫލުން މިކަމަށް ތައްޔާރުވާނެކްލޮޕް
ނަމަވެސް މެންޗެސްޓާ ސިޓީގެ ހުރިހާ ކުޅުންތެރިން ހަމަކޮށްތިބޭނީ ކުލަބުގެ ޑިއުޓީގަ އެވެ. ސަބަބަކީ އެ ކުލަބުގައި އެފްރިކާ އަދި އޭޝިޔާގެ ގައުމީ ޓީމުގެ މުހިންމު ކުޅުންތެރިއަކު ނެތުމެވެ. މުޅިން ވެސް ތިބީ ޔޫރަޕުގެ ކުޅުންތެރިންނެވެ. މިހެންވެ މިއީ ކޯޗު ޕެޕް ގާޑިއޯލާ އަށް ހަތަރުވަނަ ސީޒަނެއްގައި ތަށި ހޯދަން ލިބޭ ރަނުގެ ފުރުސަތެއް ކަމަށް ގަބޫލުކުރާ ކޯޗުންނާއި ކުޅުންތެރިންގިނަ އެވެ.
