ސައުތު އެފްރިކާ ޓީމަށް ސަޕޯޓަރުންގެ ހޫނު މަރުހަބާއެއް
މީގެ ކުރިން ސައުތު އެފްރިކާއިން ވަނީ މުބާރާތުގެ ރަނައަޕްކަން ފަސް ފަހަރު ހޯދާފައި
ސައުތު އެފްރިކާގެ އަންހެން ފުޓްބޯޅަ ޓީމަށް ސަޕޯޓަރުން މަރުހަބާކިއުން | ރޮއިޓާސް
ބޮޑު ކާމިޔާބަކާއެކު އެނބުރި ގައުމަށް ދިޔަ ސައުތު އެފްރިކާގެ އަންހެން ފުޓްބޯޅަ ޓީމަށް އެގައުމުގެ ސަޕޯޓަރުން ހޫނު މަރުހަބާއެއް ކިޔައިފިއެވެ.
އެފްރިކާ ކަޕް އޮފް ނޭޝަންސް ކާމިޔާބުކުރުމަށްފަހު ޓީމު އެނބުރި ގައުމަށް ދިޔައީ އަންގާރަ ދުވަހުއެވެ. ޓީމު އެނބުރި ގައުމަށް ދިއުމާއެކު އެގައުމުގެ ރައްޔިތުުން ވަނީ އެއަރޕޯޓުގައި ޓީމަށް ހޫނު މަރުހަބާއެއް ކިޔާފައެވެ.
މިއީ ސައުތު އެފްރިކާގެ އަންހެން ޓީމުން މި މުބާރާތް ކާމިޔާބުކުރި ފުރަތަމަ ފަހަރެވެ. އެޓީމުން މުބާރާތް ކާމިޔާބުކުރީ މުބާރާތް ހޯސްޓުކުރި މޮރޯކޯއާ ފައިނަލުގައި ވާދަކޮށް 2-1ން ކުރިހޯދައިގެންނެވެ. މީގެ ކުރިން ސައުތު އެފްރިކާއިން ވަނީ މުބާރާތުގެ ރަނައަޕްކަން ފަސް ފަހަރު ހޯދާފައެވެ. ނަމަވެސް މިއީ އެޓީމަށް މުބާރާތް ކާމިޔާބު ކުރެވުނު ފުރަތަމަ ފަހަރެވެ.
ސައުތު އެފްރިކާއިން މި މުބާރާތް ކާމިޔާބުކުރުމާއެކު އެގައުމަށް ވަނީ މިއަންނަ އަހަރު އޮންނަ އަންހެނުންގެ ވޯލްޑް ކަޕްގެ ޖާގައެއް ކަށަވަރުވެފައެވެ. މިއަންނަ އަހަރުގެ ވޯލްޑް ކަޕް އަންހެން ޑިވިޝަންގެ މުބާރާތް އޮންނާނީ އޮސްޓްރޭލިއާއާއި ނިއުޒިލެންޑުގައެވެ.
މުބާރާތް ކާމިޔާބުކުރުމަށްފަހު ސައުތު އެފްރިކާގެ ކޯޗު ޑެސިރީ އެލީސް ބުނީ، މިއީ ސަޕޯޓަރުންނަށްޓަކައި އަބަދުވެސް ކާމިޔާބުކޮށްދެން ބޭނުންވި ތައްޓެއް ކަމަށެވެ.
