އެފްރިކާ ކަޕް އޮފް ނޭޝަންސްގެ ކުއާޓާ ފައިނަލުގައި އާދީއްތަ ދުވަހުގެރޭ ކުޅުނު މެޗުތަކުން މޮޅުވެ ސެމީ ފައިނަލުގެ ފަހު ދެ ޖާގަ މުބާރާތުގެ އެންމެ ކާމިޔާބު ޓީމު ކަމަށްވާ މިސްރާއި ސެނެގާލުން ހޯދައިފިއެވެ.

ކެމަރޫނުގައި ކުރިއަށްދާ މި މުބާރާތުގެ ސެމީގެ ޖާގައެއް މިސްރުން ހޯދީ މޮރޮކޯ އަތުން ފަހަތުން އަރައި 2-1 ގެ ނަތީޖާއަކުން މޮޅުވެގެންނެވެ.

މި މެޗު ފަށައިގެން ހަތްވަނަ މިނެޓުގައި މޮރޮކޯއިން ވަނީ ލީޑު ނަގާފައެވެ. ލިބުނު ޕެނަލްޓީއަކުން މި ލަނޑު އެ ޓީމަށް ކާމިޔާބުކޮށްދިނީ ސޯފިއާން ބޫފާލއެވެ. މިއީ އޭރިއާ ތެރެއިން މޮރޮކޯގެ ތަރި އަޝްރަފް ހަކީމީއަށް މިސްރުގެ އައިމަން އަޝްރަފް ކުރި ފައުލަކާ ގުޅިގެން ރެފުރީ ދިން ޕެނަލްޓީއެކެވެ.

އޭގެ ފަހުން ކުޅުން ރަނގަޅުކޮށް މިސްރުން ގިނަ ހަމަލާތަކެއް އުފެއްދިއިރު، މެޗުގެ ދެވަނަ ހާފު ފަށައިގެން އަށްވަނަ މިނެޓުގައި އެ ޓީމުން ވަނީ ނަތީޖާ އެއްވަރުކޮށްފައެވެ. މި ލަނޑު މިސްރަށް ކާމިޔާބުކޮށްދިނީ އެ ޓީމުގެ ކެޕްޓަން މުހައްމަދު ސަލާހެވެ. މި މެޗުގެ ފުރިހަމަ ވަގުތު ހަމަވިއިރު، ދެ ޓީމު 1-1 ގެ ނަތީޖާއަކުން އެއްވަރުވެފައި އޮތުމުން، ނަތީޖާ ނެރުމަށް ވަނީ އިތުރު ވަގުތުގެ ދެ ހާފު ކުޅެފައެވެ. މީގެ ތެރެއިން ފުރަތަމަ ހާފުގައި މިސްރުން ފަހަތުން އަރައި ލީޑު ނެގިއިރު، މެޗުގެ 100 ވަނަ މިނެޓުގައި ސަލާހު ދިން ބޯޅައަކުން މި ލަނޑު އެ ޓީމަށް ކާމިޔާބުކޮށްދިނީ މަހުމޫދު ޓްރެޒެގޭއެވެ.

މި މެޗުން މޮޅުވެ މުބާރާތުގެ ސެމީއަށް މިސްރު ދަތުރުކުރިއިރު، ސެމީގެ ފުރަތަމަ މެޗުގައި މިސްރު ކުޅެން ޖެހޭނީ މުބާރާތް ބާއްވާ ގައުމު ކަމަށްވާ ކެމަރޫނާއެވެ. ސެމީއަށް ކެމަރޫން ދަތުރުކޮށްފައިވަނީ ކުއާޓާގައި 2-0 ގެ ނަތީޖާއަކުން ގެމްބިއާ ބަލިކުރުމަށްފަހުއެވެ.

މީގެ އިތުރުން މި މުބާރާތުގެ ސެމީއަށް ސެނެގާލް ދަތުރުކުރީ އެކުއަޓޯރިއަލް ގިނީ އަތުން 3-1 ގެ ނަތީޖާއަކުން މޮޅުވެގެންނެވެ.

މި މެޗުގެ ފުރަތަމަ ހާފުގައި ސެނެގާލުން ލީޑު ނެގިއިރު، މެޗުގެ 28 ވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ ފަމާރާ ޑިއެދިއޯއެވެ. އޭގެ ފަހުން މެޗުގެ ދެވަނަ ހާފުގެ ކުރީކޮޅު އޭރިއާ ތެރެއިން ސެނެގާލުގެ ކެޕްޓަން ކަލިދޫ ކުލިބާލީގެ އަތުގައި ބޯޅަ ޖެހުމުން އެކުއަޓޯރިއަލް ގިނީއަށް ޕެނަލްޓީ ދޭން ރެފުރީ އެންމެ ފުރަތަމަ ނިންމި ނަމަވެސް، ވީޑިއޯ އެސިސްޓަންޓް ރެފުރީ (ވީއޭއާރް) ބެލުމަށްފަހު ވަނީ އެ ނިންމުން ބަދަލުކޮށްފައެވެ.

އެކަމަކު އޭގެ މާ ގިނަ އިރުތަކެއް ނުވެ އެކުއަޓޯރިއަލް ގިނީން ވަނީ ނަތީޖާ އެއްވަރުކޮށްފައެވެ. މެޗުގެ 57 ވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ ޖެނިކް ބީލާއެވެ. ނަމަވެސް މެޗުގެ 68 ވަނަ މިނެޓުގައި ސެނެގާލުން ވަނީ އަލުން ލީޑު ނަގާފައެވެ. ކުޅެން އެރިތާ ތިން މިނެޓުގެ ތެރޭގައި މި ލަނޑު އެ ޓީމަށް ކާމިޔާބުކޮށްދިނީ ޗެއިކޫ ކުޔާޓޭއެވެ. އަދި މެޗުގެ 79 ވަނަ މިނެޓުގައި އިސްމާއިލާ ސާ ވަނީ ލަނޑެއް ޖަހައި، ސެނެގާލުގެ ލީޑު ފުޅާކޮށްދީފައެވެ.

މި މެޗުން މޮޅުވެ މުބާރާތުގެ ސެމީގެ ފަހު ޖާގަ ސެނެގާލުން ހޯދިއިރު، ސެމީގައި އެ ޓީމު ކުޅެން ޖެހޭނީ ބުރްކީނާ ފާސޯއެވެ. ސެމީއަށް ބުރްކީނާ ފާސޯ ދަތުރުކޮށްފައިވަނީ ކުއާޓާގައި 1-0 ގެ ނަތީޖާއަކުން ޓިއުނީޝިއާ ބަލިކުރުމަށްފަހުއެވެ.