ބޮޑު ފުޓްބޯޅަ މުބާރާތެއް ފަށާއިރު ސަޕޯޓަރުން އެންމެ ބަލަން ބޭނުންވާ ދެ ކަމަކީ އޭނާގެ ޓީމުން ލާނެ ޖާޒީ އާއި ޓީމުގެ ފުރަތަމަ 11 އެވެ. ފާއިތުވެދިޔަ 30 އަހަރަށް ބަލާއިރު އެންމެ ތަފާތު ޖާޒީ އާއި ކުލަވަރުތައް ފެނިފައިވާ މުބާރާތަކީ އެފްރިކަން ކަޕް އޮފް ނޭޝަންސް އެވެ.

މި އަހަރުގެ އެފްރިކާ ކަޕް އޮތީ އައިވަރީ ކޯސްޓްގަ އެވެ. ޖެނުއަރީ 13ގައި ފަށާ މުބާރާތް ފެށުމުގެ ކުރިން މި މުބާރާތުގެ ފާހަގަކޮށްލެވޭ ތާރީހީ ޖާޒީތަކަށް ބަލައިލާނަމެވެ.

މުބާރާތުގެ ތާރީހުގައި އެންމެ ފާހަގަކޮށްލެވެނީ 2002 ވަނަ އަހަރުގެ މުބާރާތަށް ކެމަރޫނުން ބޭނުންކުރި އަތްކެނޑި ޖާޒީ އެވެ. ޕޫމާއިން ތައްޔާރުކޮށްދިން މި ޖާޒީގެ އަތްކަނޑާލުމުން އެންމެ ވައްތަރުވީ ބާސްކެޓް ޖާޒީއަކާ އެވެ.

މި ޖާޒީގެ މަޝްހޫރުކަން ބޮޑުވެ، މުޅި އެފްރިކާގައި ވައިހިއްޕާލި އެވެ. އެފްރިކާގެ ކޮންމެ މީހަކު ވެސް މި ޖާޒީ ލާން ބޭނުންވި އެވެ.

ނަމަވެސް އެއަހަރުގެ ވޯލްޑްކަޕުގައި މި ޖާޒީލާން އުޅުމުން ފީފާއިން މިކަން މަނާކުރި އެވެ. ފީފާއިން ކެމަރޫނަށް މަޖުބޫރުކުރީ އަތްކުރި ހުންނަންޖެހޭނެ ކަމަށެވެ. އެއިރު ޕޫމާއިން ހުރީ ޖާޒީތައްޔާރުކޮށްފައިކަމުން، ފީފާގެ ސަސްޕެންޝަނުން ސަލާމަތްވުމަށް ކުރި ކަމަކީ ޖާޒީގެ ދަށުން ކަޅުކުލައިގެ ސްލީވެއް ކުޅުންތެރިން ދިނުމެވެ. ނަމަވެސް ސެމިއުލް އެޓޫ ގޯލް ޖަހާފައި ދުއްވައިގަތް ވަގުތު ކޮނޑުކެނޑި ޖާޒީ އާއި ސްލީވް ވަކިވެފައިވާތަން ފެނުމުން ފީފާއިން ކެމަރޫން ޖޫރިމަނާކުރި އެވެ. ފަހުން ކަޅުކުލައިގެ ސްލީވް ޖާޒީއާ ގުޅުވާލީ ރޮނދިޖަހައި ފަހައިގެންނެވެ.  

މިޖާޒީ ފަހުން ވައްތަރުވީ ޓެނިސް ކުޅުންތެރިޔާ ސެރީނާ ވިލިއަމްސް ފްރެންޗް އޯޕަންގައި ބޭނުންކުރި ޖާޒީއާ އެވެ.

އޭގެ ދެ އަހަރު ފަހުން އޮތް އެފްރިކާ ކަޕަށް ކެމަރޫނުން ތައާރަފްކުރީ ސޯޓާއި ޖާޒީ އެއްކޮށް ފަހާފައިވާ ޖުއްބާ ސްޓައިލްގެ ޖާޒީއެކެވެ. ޑެމްބާބާ ބުނީ އަތްކެނޑި ޖާޒީއާ ހިލާފަށް މިއީ ކުޅުންތެރިން ނުރުހުންވި ޖާޒީއެއް ކަމަށެވެ. 

ފީފާއިން އެ ޖަމާއަތުގެ މުބާރާތްތަކުގައި މި ޖާޒީ ވެސް މަނާކުރި އެވެ. އެކަމަކު 2006ގެ ވޯލްޑްކަޕް ކޮލިފައިންގައި ކެމަރޫނުން މިޖާޒީގައި މެޗެއް ކުޅުނެވެ. މީގެ އަދަބެއްގެ ގޮތުން ފީފާއިން ކެމަރނުގެ ހަ ޕޮއިންޓް އުނުކުރި އެވެ. ކެމަރޫން މި އަދަބުން ސަލާމަތްވީ އެތައް އަރައިރުމަކާއި މައްސަލަތަކަކަށް ފަހު އެވެ.