އެފްރިކާ ކަޕް އޮފް ނޭޝަންސްގައި ބުދަ ދުވަހުގެރޭ ކުޅުނު ސެމީ ފައިނަލް މެޗުން ބުރްކީނާ ފާސޯ ބަލިކޮށް ފައިނަލުގެ ފުރަތަމަ ޖާގަ ސެނެގާލުން ހޯދައިފިއެވެ.

ކެމަރޫނުގައި ކުރިއަށްދާ މި މުބާރާތުގެ ފައިނަލަށް ސެނެގާލް ދަތުރުކުރީ ބުރްކީނާ ފާސޯ އަތުން 3-1 ގެ ނަތީޖާއަކުން މޮޅުވެގެންނެވެ.

މި މޮޅާއެކު މި ފަހަރުގެ އެފްރިކާ ކަޕް އޮފް ނޭޝަންސްގެ ފައިނަލުގައި ސެނެގާލް ވާދަކުރާއިރު، އެ ޓީމުން ވަނީ އެންމެ ފަހުން 2019 ވަނަ އަހަރު ބޭއްވި މުބާރާތުގެ ފައިނަލުގައިވެސް ވާދަކޮށްފައެވެ. އެކަމަކު އެ ފަހަރުގެ ފައިނަލުން އަލްޖީރިއާ އަތުން ސެނެގާލް ވަނީ ބަލިވެފައެވެ.

ބުދަ ދުވަހުގެރޭ ކުޅުނު މެޗުގައި ސެނެގާލުން މޮޅު ކުޅުމެއް ދެއްކި ނަމަވެސް، މި މެޗުގެ ފުރަތަމަ ހާފުގައި ލަނޑެއް ފެނިފައެއް ނުވެއެވެ. އެކަމަކު ދެވަނަ ހާފުގައި ދެ ޓީމުގެ ފަރާތުން ވަރުގަދަ އެޓޭކުތަކެއް ފެނިގެންދިޔައިރު، މެޗުގައި އެންމެ ފުރަތަމަ ލަނޑު ޖަހައި، ލީޑު ނަގާފައިވަނީ ސެނެގާލުންނެވެ. މެޗުގެ 70 ވަނަ މިނެޓުގައި ކެޕްޓަން ކަލީދޫ ކުލިބާލީ ދިން ބޯޅައަކުން މި ލަނޑު އެ ޓީމަށް ކާމިޔާބުކޮށްދިނީ އަބްދޫ ޑިއާލޯއެވެ.

އޭގެ ހަ މިނެޓު ފަހުން ސަޑިއޯ މާނޭ ތަނަވަސްކޮށްދިން ފުރުސަތަކުން އިދްރީސާ ގާނާ-ގޭ ވަނީ ލަނޑެއް ޖަހައި، ސެނެގާލުގެ ލީޑު ފުޅާކޮށްދީފައެވެ. އެކަމަކު މެޗުގެ 82 ވަނަ މިނެޓުގައި ބުރްކީނާ ފާސޯއިން ވަނީ ލަނޑެއް ޖަހައި، ފަރަގު ކުޑަކޮށްފައެވެ. އީސާ ކަބޯރޭ ދިން ބޯޅައަކުން މި ލަނޑު އެ ޓީމަށް ކާމިޔާބުކޮށްދިނީ ބްލާޓީ ޓޫރޭއެވެ.

ނަމަވެސް އޭގެ ފަސް މިނެޓު ފަހުން ސެނެގާލުން ވަނީ އަލުން ލީޑު ފުޅާކޮށް، ފައިނަލުގެ ޖާގައެއް ކަށަވަރުކޮށްފައެވެ. ބުރްކީނާ ފާސޯގެ ކުޅުންތެރިންނަށް ހެދުނު ގޯހެއްގެ ފައިދާ ނަގައި، އިސްމާއިލާ ސާ ދިން ބޯޅައަކުން މި ލަނޑު އެ ޓީމަށް ކާމިޔާބުކޮށްދިނީ މެޗުގައި މޮޅު ކުޅުމެއް ދެއްކި މާނޭއެވެ. މިއީ މާނޭ ސެނެގާލުގެ ގައުމީ ޓީމަށް ކާމިޔާބުކޮށްދިން 29 ވަނަ ލަނޑެވެ.

މި މެޗުން މޮޅުވެ މުބާރާތުގެ ފައިނަލުގެ ފަހު ޖާގަ ސެނެގާލުން ހޯދިއިރު، ފައިނަލުގައި އެ ޓީމު ޅެން ޖެހޭ ޓީމެއް އެނގޭނީ ބުރާސްފަތި ދުވަހުހެރޭ ކުޅޭ ސެމީގެ ދެވަނަ މެޗަށްފަހުއެވެ. ދެވަނަ ސެމީގައި ބައްދަލުކުރާނީ މުބާރާތް ބާއްވާ ގައުމު ކަމަށްވާ ކެމަރޫނާއި މުބާރާތުގެ އެންމެ ކާމިޔާބު ޓީމު ކަމަށްވާ މިސްރެވެ.