މަޖިލިސް ހިސޯރެއް ނުކުރަން، އެއީ ސިފައިންގެ ހުރުމަތް ކަނޑާލަން ހިންގާ ޕްރޮޕެގެންޑާއެއް: ޑިފެންސް
30 ޖުލައި 2017 | އާދީއްތަ 05:17ރަޔޮޓް ގިޔަރުގައި މަޖިލިސް އިދާރާއަށް ސިފައިން ވަދެ މެންބަރުން ނެރުނު
ރަޔޮޓް ގިޔަރުގައި މަޖިލީހަށް ސިފައިން ވަދެ މެންބަރުންތައް ގަދަކަމުން ނެރެނީ
އެމްއެންޑީއެފް އިން ރައްޔިތުންގެ މަޖިލިސް ހިސޯރުކޮށްފައިވާ ކަމަށް ފަތުރަމުންދާ ހަގީގަތާ ޚިލާފު ދޮގު ވާހަކަތަކާއި ޚަބަރުތަކަކީ ގައުމީ ދިފާއީ ބާރުގެ ހުރުމަތް ކަނޑާލައި، މުއައްސަސާގެ އަގު ވައްޓާލުމުގެ ނިޔަތުގައި ހިންގާ ޕްރޮޕެގެންޑާ ކަމަށް ޑިފެންސް މިނިސްޓްރީއިން ބުނެފި އެވެ.
މިމަހުގެ 24 ވަނަ ދުވަހު ރައްޔިތުންގެ މަޖިލީހުގެ އިދާރާގައި ސިފައިން ނިކުމެ ތަޅު އަޅުވައި، މަޖިލިސް އިދާރާ ތެރެއަށް ރަޔޮޓް ގިއަރުގައި ވަދެ ރައްޔިތުންގެ މަޖިލީހުގެ މެންބަރުން ނެރުނު މައްސަލައިގައި ރާއްޖެއާއި ރާއްޖެއިން ބޭރުގެ ފާޑުކިޔުން އަމާޒުވެފައިވަނިކޮށް، އާދިއްތަ ދުވަހު ޑިފެންސް މިނިސްޓްރީއިން ނެރުނު ބަޔާނެއްގައި ބުނީ ސިފައިން ނިކުމެ މަޖިލިސް ހިސޯރުކޮށްފައިވާ ކަމަށް ފަތުރާ ޚަބަރާއި ވާހަކަތަކަކީ މުައައްސަސާއަށް ރައްޔިތުން ކުރާ އިތުބާރު ކުޑަކުރުމަށާއި، ރާއްޖެއާއި ރާއްޖެއިން ބޭރުގައި ނުތަނަވަސްކަން އުފައްދައި، އާންމުންގެ މެދުގައި ބިރުވެރިކަން އުފެއްދުމަށް ހިންގާ ވަރަށް ނާތަހުޒީބު އަމަލެއް ކަމަށެވެ.
މަޖިލީހުގެ އިދާރާގައި ތަޅު އެޅުވިތާ ހަ ދުވަސް ފަހުން ޑިފެންސް މިނިސްޓްރީން ނެރުނު ބަޔާނުގައި ބުނެފައި ވަނީ މަޖިލީސް ހިސޯރުކުރި ކަމަށް ވާހަކަ ފެތުރުމަކީ ބޭރު ދުނިޔޭގައި ރާއްޖެ އިތުރަށް ބަދުނާމު ކުރުމަށް ކުރަމުންދާ ގައުމިއްޔަތާ ދެކޮޅު އަމަލެއް ކަމަށާއި އެކަން އެންމެ ހަރުކަށި އިބާރާތުން ކުށްވެރިކުރާ ކަމަށެވެ.
ބަޔާނުގައި ބުނެފައިވަނީ، ގައުމީ ދިފާއީ ބާރުން ރައްޔިތުންގެ މަޖިލީހުގެ ސަލާމަތީ ކަންކަން ބަލަހައްޓަމުންދަނީ ގާނޫނު އަސާސީގެ 105 ވަނަ މާއްދާގެ 'ހ' އިން އެގޮތަށް ކަނޑައަޅާފައިވާތީއާއި ރައްޔިތުންގެ މަޖިލީހުގެ ސަލާމަތާއި ރައްކާތެރިކަމަށް ބުރޫއަރާފަދަ އެއްވެސް ކަމެއް ވިޔަނުދިނުމަކީ ގާނޫނުއަސާސީން ސަލާމަތީ ޚިދުމަތްތަކާ ހަވާލުކޮށްފައިވާ ގާނޫނީ ޒިންމާއަކަށް ވާތީ ކަމަށެވެ.
ޑިފެންސް މިނިސްޓްރީއިން ބުނީ މިމަހުގެ 24 ވަނަ ދުވަހުން ފެށިގެން 29 ވަނަ ދުވަހާ ހަމައަށް ރައްޔިތުންގެ މަޖިލީހުގެ އިދާރާގެ ސަލާމަތީ ކަންކަން އިތުރަށް ހަރުދަނާކުރީ މަޖިލީހުގެ އިދާރާއާއި ގޯތިތެރޭގެ ސަލާމަތަށް ނުރައްކާވެދާނެ ކަމުގެ މައުލޫމާތު ލިބިފައިވާތީއާއި މަޖިލީހުގެ ސަލާމަތީ ކަންކަން އިތުރަށް ހަރުދަނާކުރުމަށް ރައްޔިތުންގެ މަޖިލީހުގެ އިދާރާއިން ރަސްމީކޮށް އެދުމުން ކަމަށެވެ.
އެ ބަޔާނުގައި ބުނީ މަޖިލީހުގެ ސަލާމަތީ ކަންކަން އިތުރަށް ހަރުދަނާ ކުރީ، މިމަހުގެ 31 ވަނަ ދުވަހާ ހަމައަށް ޖަލްސާއެއް ނުވަތަ ކޮމެޓީ ބައްދަލުވުމެއް ވެސް ނޯންނާނެ ކަމަށް މަޖިލީހުގެ އިދާރާއިން އާންމުކޮށްފައިވަނިކޮށް، ސިޔާސީ ހަރަކާތް ރާވަން ހިންގާފައިވާ ފަރާތްތަކުން މަޖިލީހުގައި ޖަލްސާއެއް ބާއްވާނެކަން އާންމުކޮށްފައިވުމާއި އެ ހަރަކާތަކީ ޣައިރު ގާނޫނީ ހަރަކާތެއް ކަމަށް ފުލުހުން ކަނޑައަޅާފައިވާތީ ޑިމޮކްރެޓިކް މުއައްސަސާއެއް ހިމާޔަތް ކުރުމަށް ކަމަށެވެ.
ޑިފެންސް މިނިސްޓްރީއިން ބުނީ ރާއްޖޭގެ ޑިމޮކްރަސީގެ ޅަފަތުގައި، ރައްޔިތުންގެ ބަސް ބުނުމާއި، ރައްޔިތުންގެ އަޑު އުފުލުމާއި، ހައްގުތައް ހޯދުމަށް މަސައްކަތް ކުރުމުގައި އިސްލާމްދީނާއި ގައުމީ ސަލާމަތަށް ހުރުމަތްތެރިކޮށް ހިތައި އަމާންކަމާއި ރައްކާތެރިކަމާއި ސުލްހައަށް އިސްކަން ދިނުމަށް އެދޭ ކަމަށެވެ.
ރާއްޖޭގެ ބަރުލަމާނީ ދިގު ހަޔާތުގައި، ޖުލައި 24، 2017 ވަނަ ދުވަސް ފިޔަވައި ސިފައިންނާއި ފުލުހުން މަޖިލީހުގެ އިދާރާއަށް ވަދެ، މެމްބަރުން ގަދަކަމުން ނެރެފައެއް ނެތެވެ.
