ވައްކަމަކީ އިންސާނާގެ ތޮބީއަތުގައިވާ ކަމެއް ނޫން، އެއީ ހުންނަ ނުލަފާކަމުން ކުރާކަމެއް: ރައީސް ނަޝީދު
ވައްކަމަކީ ހީލަތްތެރިކަމާއެކު ހިންގާ ޖަރީމާއެއް
ކުރީގެ ރައީސް މުހައްމަދު ނަޝީދު
ވައްކަމަކީ އިންސާނާގެ ތޮބީއަތުގައިވާ ކަމެއް ނޫން ކަމަށާއި އެއީ ހުންނަ ނުލަފާ ސިފައެއް ކަމަށާއި އެއީ ގަދަބާރުން ކުރާ ކަމެއް ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ރައީސް ނަޝީދު މިހެން ވިދާޅުވީ އަހަރަކަށްވުރެ ގިނަ ދުވަހު އިނގިރޭސި ވިލާތައް އަރުވާލެވިގެން ހުންނެވުމަށްފަހު އަވައްޓެރި ސްރީލަންކާއަށް މިހާރު ކުރައްވަމުން ގެންދަވާ ދަތުރުފުޅުގައި ސްރީލަންކާގައި ތިބި ދިވެހި ރައްޔިތުންނާ މުހާތަބުކޮށް ވާހަކަފުޅު ދައްކަވަމުންނެވެ.
މިދިއަ ޖެނުއަރީ މަހުގެ ތެރޭގައި ޕީޕީއެމްއަށް މެންބަރުންތަކެއް ސޮއިކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމް ވަނީ ކޮރަޕްޝަނަކީ އިންސާނީ ތަބީއަތުގައި ހުންނަ ކަމެއްކަމަށާއި އެހެންކަމުން އެކަން ދިވެހިންގެ ތެރޭގައިވެސް ހުންނާނެކަމެއް ކަމަށް ވިދާޅުވެފަ އެވެ.
ރައީސް ނަޝީދު ވިދާޅުވީ ދައުލަތުގެ ވެރިން ފާޅުގައި ވައްކަން ކުރަމުންދާ ކަމަށާއި އެކަންކަމުގެ ވާހަކަތައް ރައްޔިތުން ދައްކާނެ ކަމަށެވެ. އަދި ވައްކަމަކީ އިންސާނާގެ ތޮބީއަތުގަ ހުންނަ ކަމެއް ނޫން ކަމާށާއި އެއީ ހަރާމް ކަމެއް ކަމަށެވެ.
"ފާޅުގައި ދައުލަތުގެ ވެރިން ވައްކަން ކުރާއިރުގަ، އެކަން އަބަދުވެސް ތިބޭފުޅުން ފާހަގަކުރައްވަންޖެހޭނެ. ވައްކަމަކީ ރީތި ކަމެއްނޫން. އެއީ ހަރާމް ކަމެއް، އެއީ ގޯސްކަމެއް. ވައްކަމަކީ ރަނގަޅުކަމެއް ނޫން އެއީ އޮޅިގެން ކުރާ ކަމެއް ވެސް ނޫން. އެއީ އިންސާނީ ތޮބީއަތެއް ވެސް ނޫން. ވައްކަމަކީ ހުންނަ ނުލަފާ ސިފައެއް. އެއީ ގަދަބާރުން ކުރާކަމެއް. އުނދަގުލުން ކުރާކަމެއް. ވައްކަމެއް ނުކުރެވޭނެ ތޮބީއަތުގަ ހުރެގެން. ވައްކަން ކުރެވޭނީ ވައްކަން ކުރުމަށް ގޯހެއް ހެދުމަށް ރާވާ، ވިސްނާ، އެގޯސް ގަސްދުގާ ކަނޑައެޅިގެން ހެދީމަ. އަޅުގަނޑެއް ނުކުރަން ވައްކަމެއް. އަޚުގަނޑަކީވެސް އިންސާނެއް. އަޅުގަނޑަށް ޔަގީން ތީގެތެރެއިން އެއްވެސް ބޭފުޅަކީ ވަގެއް ނޫން. އެއީ ކަނޑައެޅިގެން ކުރާ ގޯހެއް. ކުރާ ކަމެއް. ތޮބީއީ ކަމަކީ ވާކަންކަން، ކުރާ ކަންކަމެއް ނޫން. މިއީ ކަނޑައެޅިގެން، އިންތިޒާމުވެގެން ހީލަތްތެރިކަމާއެކު، ރޭވިގެން ހިންގާ ޖަރީމާއެއް،" ރައީސް ނަޝީދު ވިދާޅުވި އެވެ.
މީގެއިތުރުން ރައީސް ނަޝީދު ވިދާޅުވީ ވައްކަން ކުރަނީ އިންސާނުންގެ ތެރެއިން ވަރަށްމަދު ބައެއް ކަމަށެވެ. އަދި ދިވެހި އެންމެންނަކީ ވަގުން ނޫން ކަމަށްވެސް ރައީސް ނަޝީދު ވިދާޅުވި އެވެ.
"ގިނަ ފަހަރަށް ރޭގަނޑު ދަންވަރު ފޮއްޓެއް ފަޅާލާނެ، ވަކި ގަޑިއެއްގައިވެސް ކުރާކަމެއް. އެއީ ހަމަ ކޮންމެ ގަޑިއެއްގަ ކުރާކަމެއް ނޫން. ވައްކަމުގެ މައްޗަށް ބަލާލާފިއްޔާމު އަޅުގަނޑުމެންނަށް މާބޮޑަށް ސާފުވެގެންދާނެ، އެއީ ހަގީގަތުގައި އިންސާނުންގެ ތެރެއިން ވަރަށް މަދު ބަޔަކު ކުރާކަމެއް. ދިވެހި އެންމެންނަކީ ވަގުންނެއް ނޫން. އަޅުގަނޑުމެންގެ ތޮބީއަތުގަ ނެތް ވައްކަމެއް. އަޅުގަނޑުމެންނަކީ ސޯލިހު ރަނގަޅު ދިރިއުޅުމެއް، ތަނަވަސް ދިރިއުޅުމެއް، އަމިއްލަ މަސައްކަތުން، ހަމަ ފައިމައްޗަށް ތެދުވެ، ފަހުރުވެރި ދިވެއްސެކޭ ބުނެ، ތަރައްގީވާން ބޭނުންވާ ރައްޔިތެއް. ވަގުންނެއް ނޫން،" ރައީސް ނަޝީދު ވިދާޅުވި އެވެ.
ރައީސް ނަޝީދުއާ ބައްދަލު ކުރުމަށް ބޭއްވި ބައްދަލުވުމަށް ގިނަ އަދަދެއްގެ ދިވެހިން ގޮސްފައިވާކަން ފާހަގަ ކުރެވެއެވެ.
