ސަރުކާރު ޖަވާބުދާރީ ކުރުމުގައި ރައްޔިތުންގެ މަޖިލިސް މިވަނީ ނުކުޅެދިފައި: ފަލާހު

ސަރުކާރުން ހިންގާ ކޮރަޕްޝަނާއި ހިޔާނާތުގެ މައްސަލަތަކާއި ސަރުކާރު ޖަވާބުދާރީ ކުރުމުގައި ރައްޔިތުންގެ މަޖިލިސް ވަނީ ނުކުޅެދިފަ ކަމަށް ރައްޔިތުންގެ މަޖިލީހުގެ މާފަންނު ހުޅަނގު ދާއިރާގެ މެމްބަރު މުހައްމަދު ފަލާހު ވިދާޅުވެއްޖެ އެވެ.

އަންގާރަ ދުވަހުގެ ރޭ ރާއްޖެޓީވީގެ "ފަލަ ސުރުހީ" ޕްރޮގްރާމުގައި ފަލާހު ވިދާޅުވީ ކޮރަޕްޝަނާއި ހިޔާނާތާއި ފަސާދައިން ސަރުކާރާއި މުޅި ރާއްޖެ ވަނީ ކުނިވެފައި ކަމަށެވެ.

ފަލާހު އެގޮތަށް ވިދާޅުވެފައި ވާއިރު ޓްރާންސްޕޭރަންސީ އިންޓަރނޭޝަނަލްއިން އަންގާރަ ދުވަހު އާއްމުކޮށްފައިވާ ރިޕޯޓެއްގައި، ދެކުނު އޭޝިއާގެ ގައުމުތަކުގެ ތެރެއިން ކޮރަޕްޝަން އެންމެ ބޮޑަށް އިތުރުވާ ގައުމެއްގެ ގޮތުގައި ރާއްޖެ ވަނީ ހިމެނިފަ އެވެ.

ފަލާހު ވިދާޅުވީ ސަރުކާރުގެ އިސްވެރިން ސަރުކާރުގެ ތެރެއިން ކޮރަޕްޝަނާއި ދައުލަތުގެ ފައިސާއަށް ހިޔާނާތްތެރި ވަމުންދާއިރު އެމައްސަލަތައް ބަލަން އޮންނަ އަދި ސަރުކާރު ޖަވާބުދާރީ ކުރުވަން އޮންނަ ރައްޔިތުންގެ މަޖިލީހުން އެކަން ކުރެވޭނެ ގޮތެއް ވެސް ނެތް ކަމަށެވެ. ސަބަބަކަށް ފަލާހު ވިދާޅުވީ ސަރުކާރުގެ ސާފު މެޖޯރިޓީ މަޖިލީހުގަ އާއި މަޖިލީހުގެ ސަރުކާރު މަސްއޫލިއްޔަތު އަދާކުރާ މިންވަރުބަލާ ކޮމެޓީގެ އިތުރުން އެހެން ހުރިހާ ކޮމެޓީތަކެއްގަ ވެސް އޮތުމުން ކަމަށެވެ.

ފަލާހު ވިދާޅުވީ ރައީސް އަބްދުﷲ ޔާމީން އަބްދުލްގައްޔޫމްގެ ސަރުކާރުގެ އެންމެބޮޑު ހިޔާނާތް ކަމަށްވާ އެމްއެމްޕީއާރުސީގެ ތެރެއިން ހިންގާފައިވާ 1.22 ބިލިއަން ރުފިޔާގެ ހިޔާނާތުގެ މައްސަލަތަކަށް އަހަރެއް ވެގެންދިޔައިރު، އެންޓި ކޮރަޕްޝަން ކޮމިޝަން (އޭސީސީ)އާއި ކަމާބެހޭ އިދާރާތަކަށް އެކަންކަން ތަހުގީގުކޮށް ނިންމާ ލެވިފައި ނުވާކަމަށެވެ. އޭސީސީންވެސް އެމައްސަލާގައި ދެފަހަރު އެއްގޮތަކަށް ވާހަކަ ނުދައްކާ ކަމަށާއި ދައުލަތުގެ ހުރިހާ މުއައްސަސާއެއްވެސް އޮތީ ސަރުކާރުގެ މުށުތެރޭގައި ތާށިވެފައި ކަމަށް ފަލާހު ވިދާޅުވި އެވެ.

ފަލާހު ވިދާޅުވީ ކޮރަޕްޝަނަކީ އިންސާނީ ތޮބީއަތުގައި ހުންނަ ކަމެއް ކަމަށް ރައީސް ޔާމީން ވިދާޅުވި ނަމަވެސް އެއީ އެކަން އޮތްގޮތް ނޫން ކަމަށާއި ކޮރަޕްޝަނަކީ ރައީސް ޔާމީންގެ ތޮބީއަތުގައި ހުންނަކަމެއް ކަމަށް ފަހަރެއްގައި ވެދާނެ ކަމަށެވެ. މީގެ ކުރިންވެސް ބޭބޭފުޅުން ރާއްޖޭގައި ވެރިކަންކޮށްފައި އެބަހުރި ކަމަށާއި ރައީސް ޔާމީންގެ މައްޗަށް ކޮރަޕްޝަންގެ ތުހުމަތު ކުރެވޭވަރާ ގާތަށްވެސް އެހެން ވެރިޔަކަށް މީގެކުރިން ތުހުމަތު ކުރެވިފައި ނުވާކަމަށް ފަލާހު ވިދާޅުވި އެވެ.

ފަލާހު ވިދާޅުވީ ބޮޑެތި ބިޔަ ޕްރޮޖެޓްތައް ރާއްޖެ އަންނަނީޔޭ ކިޔައިގެން ސަރުކާރުން ގެންދަނީ ރައްޔިތުންނަށް އޮޅުވާލަމުން ކަމަށެވެ. އެގޮތުން މީގެ ކުރިން ރާއްޖޭގައި ރިސޯޓްތައް ތަރައްގީ ކުރުމަށް ފަޅުރަށްރަށް ދޫކޮށްފައިވަނީ ބިޑަށް ލައިގެން ވަރަށް ވާދަވެރިކޮށް ކަމަށާއި މިހާރު ފަޅުރަށްރަށާއި ފަޅުތަކާއި ބިންތައް ސަރުކާރުން ދޫކުރަނީ ބިޑަކާ ނުލާ ބޭނުން ފަރާތަކަށް ބޭނުން އަގެއްގައި ކަމަށް ފަލާހު ވިދާޅުވި އެވެ.. ނަމަވެސް އެބުނާ ބޮޑު އިންވެސްޓަރެއް ރާއްޖެއައިތައް ރައްޔިތުންނަށް ނުފެންނަ ކަމަށް ވެސް އޭނާ ވިދާޅުވި އެވެ.