ހަނގުރާމަ ހުއްޓާލުމާބެހޭ އާ ގޮތްތަކެއް މިސްރުން އަނެއްކާވެސް ހުށަހަޅައިފި

އިސްރާއީލުގެ ނިރުބަވެރި ފައުޖުތަކާ ޣައްޒާގައި ވެރިކަންކުރާ ހަމާސް ޖަމާއަތާ ދެމެދު ކުރަމުންދާ ހަނގުރާމަ ހުއްޓައިލާނެ އާ ގޮތްތަކެއް މިސްރުން އަނެއްކާވެސް ހުށަހަޅައިފިއެވެ.

އިސްރާއީލާއި ހަމާސް، އެމެރިކާ އަދި ވިލާތުގެ ގައުމުތަކަށް ހުށަހެޅި އެ ހުށަހެޅުމުގައި ވާގޮތުން، އިސްރާއީލުން ޣައްޒާ މުޅިން ދޫކޮށްލުމަށާއި، އެކަމުގެ ބަދަލެއްގެ ގޮތުން ހަމާސްގެ ބެލުމުގެ ދަށުގައި ތިބި ހުރިހާ ރަހީނުން ދޫކުރަން ވަނީ ހުށަހަޅާފައެވެ.

އަދި އިސްރާއީލުގެ ޖަލުތަކުގައި ބަންދުގައި ތިބި ފަލަސްތީނު ރައްޔިތުން މިނިވަން ކުރުމަށާއި، ފަލަސްތީނުގެ މިނިވަން ދައުލަތެއް ގާއިމްކުރުމަށާއި، އަދި ޣައްޒާގެ ވެރިކަން ހަމާސްއިން ދޫކޮށްލުމަށްވެސް އެ ހުށަހެޅުމުގައި ވެއެވެ.

ގަތަރާއެކު އެކުލަވާލާފައިވާ އެ ހުށަހެޅުމުގައި، އަސީރުންނާއި ގައިދީން ބަދަލުކުރުމުގެ އެތައް ބުރެއް ހިމެނެއެވެ.

ފުރަތަމަ މަރުހަލާގައި 7 ދުވަހާ 10 ދުވަހާ ދެމެދުގެ މުއްދަތަކަށް ހަމަލަތައް މެދުކަނޑާލައި، ހަމާސްގެ ބެލުމުގެ ދަށުގައި ތިބި އިސްރާއީލުގެ ހުރިހާ އަސީރުން މިނިވަންކުރާނެއެވެ. ބަދަލުގައި އިސްރާއީލުގެ ޖަލުތަކުގައި ތިބި ފަލަސްތީނު ގައިދީން މިނިވަންކުރާނެއެވެ.

ދެވަނަ މަރުހަލާގައި ހަމާސްގެ ބެލުމުގެދަށުގައި ތިބި އިސްރާއީލުގެ ހުރިހާ އަންހެން ސިފައިން ދޫކޮށްލާނެއެވެ. ބަދަލުގައި އިސްރާއީލުގެ ޖަލުތަކުގައި ތިބި އިތުރު ފަލަސްތީނުގެ ގައިދީން މިނިވަން ކުރާނެއެވެ.

މި މަރުހަލާވެސް ކުރިއަށްގެންދާނީ ހަފުތާއެއްހައި ދުވަހުގެ މުއްދަތަކަށް ހަމަލަތައް މެދުކަނޑާލައިގެންނެވެ.

އެންމެ ފަހު މަރުހަލާގައި، ހަމާސްގެ ބެލުމުގެދަށުގައި ތިބި ހުރިހާ އަސްކަރީ މުވައްޒަފުން ދޫކޮށްލުމާ ބެހޭގޮތުން މަހެއްހާ ދުވަހުގެ މުއްދަތަށް މަޝްވަރާތައް ކުރިއަށްގެންދާނެއެވެ.

ސަލާމަތީ ކަންކަމާ ގުޅުންހުރިކަމަށް ބުނެ ގާތްގަނޑަކަށް 8،000އްހާ ފަލަސްތީނު މީހުން އިސްރާއީލުގެ އަސްކަރިއްޔާއިން ހިފަހައްޓާފައި ވާކަމަށް ފަލަސްތީނުގެ ރަސްމީ ހިސާބުތަކުން ދައްކައެވެ.

އިސްރާއީލު ހަނގުރާމައިގެ ކެބިނެޓުން މިހާރު ދަނީ މިސްރުގެ ހުށަހެޅުން ދިރާސާކުރަމުންނެވެ.

މިސްރުގެ ހުށަހެޅުމާ އެއްގޮތަށް ޣައްޒާގެ ވެރިކަން ދޫކޮށްލަން ހަމާސްއާއި އިސްލާމިކް ޖިހާދުން ދެކޮޅުހަދައެވެ.

އޮކްޓޫބަރު މަހުގެ ހަތްވަނަ ދުވަހުން ފެށިގެން ޢިސްރާއީލުގެ އަސްކަރިއްޔާއިން ޣައްޒާގެ އާންމުންނަށް އަމާޒުކޮށް ދެމުންގެންދާ ހަމަލަތަކުގައި މިހާތަނަށް 20،000ށްވުރެ ގިނަ ފަލަސްތީނު މީހުން ވަނީ ޝަހީދުކޮށްލާފައެވެ. އޭގެތެރޭގައި ގިނައީ ކުޑަކުދިންނާއި އަންހެނުންނެވެ. ހަމަލަތަކުގައި ޒަޚަމްވި މީހުންގެ އަދަދު 54،000ށްވުރެ އިތުރުވެފައިވާކަމަށް ފަލަސްތީނުގެ ސިއްހީ ވުޒާރާއިން ހާމަކުރެއެވެ.