ހަމަޖެހިގެން ތިބެވޭކަށް ނެތް: ގާޑިއޯލާ

ފީފާ ކުލަބު ވޯލްޑް ކަޕްގެ ފައިނަލުން ޖާގަ ލިބުނު ނަމަވެސް، ހަމަޖެހިގެން ތިބެވެން ނެތް ކަމަށް މެންޗެސްޓަރ ސިޓީގެ ކޯޗު ޕެޕް ގާޑިއޯލާ ބުނެފި އެވެ.

ގާޑިއޯލާ ބުނީ ކުލަބު ވޯލްޑް ކަޕްގެ ސެމީ ފައިނަލުން ސިޓީ މޮޅުވި މެޗަށްފަހު ނޫސްވެރިންނާ ވާހަކަ ދައްކަމުންނެވެ. އޭނާ ބުނީ ސިޓީ އަށް ހަމަޖެހިގެން ތިބެވެން ނެތް ކަމަށާއި، ނަމަވެސް މިހާރު ޓީމު އޮތީ އެމީހުން އޮންނަން ބޭނުންވާ ހިސާބެއްގައި ކަމަށެވެ. ގާޑިއޯލާ ބުނީ ކުރިއަށް އޮތް ފައިނަލްގެ ކުރިން ވެސް، ސިޓީން ކުރަން ޖެހޭ ކަންކަން ކުރަމުން ދާނެ ކަމަށެވެ. އަދި ސިޓީ އަށް މަދުވާ ހަމައެކަނި ތަށި ހޯދުމަށް، އެ ޓީމުގެ ކުޅުންތެރިން ކުރެވެން ހުރި ހުރިހާ މަސައްކަތެއް ކުރާނެ ކަމަށް ވެސް ގާޑިއޯލާ ވަނީ ބުނެފަ އެވެ. އޭނާ ފާހަގަ ކުރި ގޮތުގައި ކުލަބު ވޯލްޑް ކަޕްގެ ތަށި އުފުލާލުމަކީ މިވަގުތަށް ސިޓީން އެންމެ އިސްކަން ދޭން ބޭނުންވާ އެއް ކަންތަކެވެ.

މީގެ އިތުރުން ގާޑިއޯލާ ބުނީ، ސިޓީ އަށް ކުރިން ދުވަހަކު ވެސް ކުލަބު ވޯލްޑް ކަޕް ކާމިޔާބު ކުރެވިފައި ނެތް ކަމަށެވެ. މިއީ ސިޓީން ކުލަބު ވޯލްޑް ކަޕްގެ ފައިނަލަށް ނުކުންނާނެ ފުރަތަމަ ފަހަރުކަން ފާހަގަކޮށް އޭނާ ބުނީ، ތަމްސީލު ކުރަން އޮތީ ކުލަބާއި، ކުލަބުން މިހާތަނަށް ކުރަމުން އައި މަސައްކަތް ކަމަށެވެ. އަނެއްކޮޅުން ބްރެޒިލްގެ ފްލުމިނެންސޭއާ ދެކޮޅަށް ފައިނަލްގައި ނުކުންނަން ޖެހުމުން އުފާވާ ކަމަށާއި، މިއީ ސިޓީ އަށް ލިބުނު ވަރަށް ބޮޑު ފުރުސަތެއް ކަމަށް ވެސް އޭނާ ވަނީ ބުނެފަ އެވެ.

ކުލަބު ވޯލްޑް ކަޕްގެ ފައިނަލްގައި ސިޓީން ފްލުމިނެންސޭއާ ދެކޮޅަށް ނުކުންނާނީ ހުކުރު ދުވަހުގެ ރޭ އެވެ.