ބައިނަލްއަޤުވާމީ ފެންވަރުގައި ބަލައިގެންފައިވާ ހުރިހާ ޤާނޫނުތަކާއި މުޢަހަދާތަކުގެ ރޫޙާ ޚިލާފަށް، ނުވިތާކަށް އިންސާނިއްޔަތު ކަމުގެ އެންމެ އަސާސީ ރޫޙާ ޚިލާފަށް ޔަހޫދީ އިޒްރޭލުން ފަލަސްޠީނުގެ ބިންތައް ފޭރިގަނެ، ފަލަސްޠީނުގެ ބިންތަކުގައި ހިންގަމުންދާ ޖަރީމާތައް، ދުވަހަކަށް ވުރެ ދުވަހެއް ގަދަވުން ފިޔަވާ އިތުރު ކަމެއް ނުވެއެވެ. ސިލްސިލާއަށް އެންމެ ފަހުން އިތުރުވި ޙަމަލާތައް ފެށީ އޮކްޓޯބަރު 7 ވަނަ ދުވަހުއެވެ. ޣައްޒާއަށް ޢަމާޒުކޮށްގެން، އެޔެއް މިޔެއް ބެލުމެއް ނެތި އިޒްރޭލުން ދެމުންދާ ޢުދުވާނީ ޙަމަލާތައް ހުއްޓިދާނެ ކަމުގެ ކޮޅުމަތިވެސް ފެންނާކަށް ނެތެވެ. ނަމަވެސް އިންސާނީ ދިރިއުޅުމަކީ ހަށީގައި ފުރާނަ ހުރިހާ ދުވަހަކު ހިނގަމުން ދާނެ ކަމެކެވެ. ޢުދުވާންތައް ފެށި ފަހުން އެކަނިވެސް ޣައްޒާއަށް އެތައް ކުދިންނެއް އުފަންވެއްޖެއެވެ. ޞިއްޙީ ފަރުވާ ބޭނުންވާ، ތުއްތު ތުއްތު އެތައް ފުރާނައެކެވެ.
އިނދަޖެހިފައި އޮތް ޞިއްޙީ ނިޒާމެއް އޮތް ޣައްޒާގެ އަލް-ޝިފާ ހޮސްޕިޓަލަކީ ކޮންމެ ދުވަހަކުވެސް އެތައް ބަޔަކު ޚިދުމަތް ހޯދަމުން ދާ ހޮސްޕިޓަލެކެވެ. އެ ހޮސްޕިޓަލުގެ ޙާލަތުވެސް ވަކި ރަނގަޅެއް ނޫނެވެ. އުފަންވާ ކުދިންގެ ތެރެއިން ޞިއްޙީ ފަރުވާ ބޭނުން ކުދިންނަށް ފަރުވާ ދިނުމާ ބެހޭ ޚާއްޞަ ޑިޕަރޓްމަންޓްގެ އިސްވެރިޔާ، ޑރ ނާޞިރު ބުލްބުލް ވިދާޅުވި ގޮތުގައި އަލް-ޝިފާ ހޮސްޕިޓަލުގެ ނިއޯނޭޓަލް އިންޓެންސިވް ކެއަރ ޔުނިޓް (ނިކޫ)އަށް ވަނީ ބޮޑު މުޞީބާތެއް ކުރިމަތިވެފައެވެ. އެގޮތުން، ފުރާނަ ސަލާމަތް ކުރުމަށްޓަކައި ކޮންމެހެން ބޭނުން ކުރަމުންދާ އަސާސީ ބޭސް ލިބުމުގައި އިންތިހާ ދަތިތައް ކުރިމަތިވެފައި ވާ ކަމަށާ، ކަރަންޓު ކެނޑެމުން ދިއުމުގެ މައްސަލައަކީވެސް ބޮޑުވަމުން އަންނަ މައްސަލައެއް ކަން ޑރ ބުލްބުލް ފާހަގަ ކުރެއްވިއެވެ.
ޑރ ބުލްބުލް ވިދާޅުވި ގޮތުގައި އަލް-ޝިފާ ހޮސްޕިޓަލުގެ ނިކޫގައި މިއަދު ބޭނުން ކުރެވޭ ޙާލަތުގައި ހުރީ އެންމެ 10 ވެންޓިލޭޓަރެވެ. އެންޓިބައޮޓިކްސް ފަދަ އެންމެ އަސާސީ ބޭސްތައް ނުލިބުމުގެ ތަކުލީފުތައް އުފުލުމަށްވެސް ޑޮކްޓަރުންނަށް ވަނީ މަޖުބޫރުވެފައެވެ.
ޑރ ބުލްބުލްއާއެކު މަސައްކަތް ކުރަމުން ދިޔަ ޓީމުގެ ބައެއް މެންބަރުންނަށް މިއަދު ވަނީ، ޣައްޒާގެ ދެކުނުގެ ސަރަޙައްދުތަކުގައި ހުރި އެހެން ހޮސްޕިޓަލުގައި މަސައްކަތް ކުރަން މަޖުބޫރުވެފައެވެ. އެއީ އިޒްރޭލުގެ ޢުދުވާންތަކުގެ ސަބަބުންނެވެ. އަދި މަގުތައް ބެދިފައި އޮތުމުގެ ސަބަބުންނެވެ.
ކަލޭމެންނަށްވެސް ފެންނާނެ، މިތާ މިތިބަ ހުރިހާ ކުދިންނަކީވެސް ހުންނަންޖެހޭ ވަރަށް ވުރެ ބަރުދަން ލުއި ކުދިން. 24 ގަޑިއިރު އިންޓެންސިވް ޔުނިޓްގެ ފަރުވާ ބޭނުންވާ ކުދިން. އެކަމަކު، އެންމެ އަސާސީ ބޭސްތައްވެސްނެތް. ކެފީން ސިޓްރޭޓްއާއި އެމްޕިލިސިން ކަހަލަ އެންޓިބަޔޮޓިކްސްވެސް ނެތް. އަހަރަމެންގެ އަތުގަ ވެންޓިލޭޓަރުވެސް ހުރި. އެކަމަކު މިހާރު 7 ވެންޓިލޭޓަރެއް މަސައްކަތެއް ނުކުރޭ. އެއީ، އެ ވެންޓިލޭޓަރުތައް އޮޕަރޭޓް ކުރަން ބޭނުން ވާ ކަހަލަ ކޭބަލް ނުލިބޭތީ. އެންމެ 10 ވެންޓިލޭޓަރު މަސައްކަތް ކުރަނީ... މީ، މި ޑިޕަރޓްމަންޓް ހަފުސްވަމުން ދާ ކަމުގެ ވަރުގަދަ ނިޝާނެއް. ޞިއްޙީ އެހީގެ ސާމާނު ފޮނުވަން އެންމެންނަށް ގޮވާލަން. އެހެން ނޫނީ ބޮޑު މުޞީބާތެއްގަ އަހަރަމެން ބެދިދާނެ. ވަކިން ޚާއްޞަކޮށް ކަރަންޓު... ތުއްތު ތުއްތު 55 ކުދިން އެބަ އޮތް، ކަރަންޓު ކެނޑޭތާ 5 މިނެޓް ތެރޭ އެ ހުރިހާ ކުދިން މި ދުނިޔެއާއި ވަކިވާނެ.ޑރ ނާޞިރު ބުލްބުލް؛ އަލް-ޝިފާ ހޮސްޕިޓަލުގެ ނިކޫގެ އިސްވެރިޔާ
އިޒްރޭލުގެ ޢުދުވާންތަކުން ސަލާމަތްވުމަށް އަލް-ޝިފާ ހޮސްޕިޓަލުގައިވެސް އެތައް ހާސް ބަޔަކު ދަނީ ހިޔާވަހިކަން ހޯދަމުންނެވެ. 60000 އެއްހާ މީހުން މިހާރުވެސް ދަނީ އަލް-ޝިފާ ހޮސްޕިޓަލުގައި ހިމާޔަތް ހޯދަމުންނެވެ. ނިކޫގެ އިތުރުން، އެ ހޮސްޕިޓަލުގައި ހިމާޔަތް ހޯދަމުންދާ ރެފިއުޖީންގެ ތެރޭގައި ހިމެނޭ ކުޑަކުދިންގެ ތެރެއިންވެސް ބައެއް ކުދިންނަށް ޞިއްޙީ ފަރުވާ ދިނުމުގައި ޑޮކްޓަރުން ދަނީ ހަރަކާތްތެރިވަމުންނެވެ.
2.3 މިލިއަން މީހުންގެ އާބާދީއެއް އޮތް ޣައްޒާއަށް އަމާޒުކޮށްގެން އޮކްޓޯބަރު 7 ވަނަ ދުވަހު އިޒްރޭލުން ޢުދުވާނީ ޙަމަލާތައް ދޭން ފެށިފަހުން އެންމެ ދަތި ޙާލުގައި ދިރިއުޅެމުން ދާ އެއް ބަޔަކީ ކުށެއް ނެތް، މައުސޫމު ކުދިންނެވެ. ދުނިޔެއަށް އުފަންވާތާ ހިނދުކޮޅެއްވެސް ނުވަނީ އެތައް ކުދިންނެއް ވަނީ ޔަޠީމުވެފައެވެ. މައިންބަފައިންގެ އެހީތެރިކަމަށް އެންމެ ބޭނުން ވާ ދުވަހު، އަޅާލާނެ އެކަކުވެސް ނެތި، މަގުމަތިވެފައި ވަނީވެސް މަދު ޢަދަދެއްގެ ކުދިންނެއް ނޫނެވެ. އެތައް ދުވަހެއްގެ ފޮނި އިންތިޒާރަށް ފަހު ދުނިޔެއަށް ނޭވާލީ ދަރިފުޅު، އަމިއްލަ އަތުން ކަފުންކޮށް ވަޅުލަން ޖެހުމުގެ ހިތާމާގައި ދުވަސްތައް ގުނަމުން ދަނީ ޣައްޒާގެ މަދު ބައެއް ނޫނެވެ. ދަރިފުޅުގެ އެވެނި ކަމެއް ފުރިހަމަ ނުވެގެން، މިވެނި ޚަރަދެއް ނުލިބިގެން ޝަކުވާ ކުރަމުން ދާ އިރު، އަހަރަމެންނަށް ލިބިފައި ވާ އަގު ނުކުރެވޭ ފަދަ ނިޢުމަތްތަކާ މެދު ޝުކުރުވެރިވަމާތޯއެވެ؟
