އިސްރާއީލް ސިފައިން ބެތުލެހެމްގައި ފަތިސް ނަމާދަށް ހުރަސްއަޅައި ނަމާދަށް ދިޔަ މީހުންނަށް ހަމަލާދީފި
ހުޅަނގު އައްސޭރީގެ މިސްކިތަކަށް އިސްރާއީލް ސިފައިން ވަދެގަނެ، ބަންގިގޮވުމާއި ނަމާދުކުރުން ހުއްޓުވައި އާންމުންނަށް ކަރުނަގޭހުން ހަމަލާދީފި. މީގެ އިތުރުން ބެތުލެހެމްގެ ބައެއް އަވަށުގެ މަގުތައް ބަންދުކޮށް، އެ ސަރަހައްދުގެ ރައްޔިތުންނަށް އިސްރާއީލް ސިފައިން އަނިޔާކުރަމުންދާ ކަމަށް ރިޕޯޓުތައް ބުނޭ.
ފަލަސްތީނުގެ ހުޅަނގު އައްސޭރީގެ ބެތުލެހެމް ކައިރީގައި އޮންނަ އަބޫ ނުޖައިމް އަވަށަށް 2026 ވަނަ އަހަރުގެ ޖުލައި މަހުގެ 3 ވީ ހުކުރު ދުވަހު އިސްރާއީލު ސިފައިން އަރައިގަނެ، ހުކުރު ނަމާދު ކުރަން ތިބި ފަލަސްތީނު މީހުންނަށް އަމާޒުކޮށް ކަރުނަގޭހާއި އަޑުގަދަ ބޮން ބޭނުންކޮށްގެން ހަމަލާދީ ހުރަސް އަޅަނީ | ގެޓީ އިމޭޖަސް
ފަލަސްތީނުގެ ހިފާފައިވާ ހުޅަނގު އައްސޭރީގެ ބެތުލެހެމްގެ ހުޅަނގުގައި އޮންނަ ހުސާން އަވަށުގައި، އިސްރާއީލް ސިފައިން ފަތިސް ނަމާދަށް ބަންގި ގޮވުމަށް ހުރަސްއަޅާފައިވާ ކަމަށް އެ ސަރަހައްދުގެ މީޑިއާ ރިޕޯޓުތަކުން ބުނެފި އެވެ.
ވަފާ ނިއުސް އެޖެންސީން ސަލާމަތީ މަސްދަރަކާ ހަވާލާދީ ރިޕޯޓުކޮށްފައިވާ ގޮތުގައި، އިސްރާއީލް ސިފައިން ވަނީ އެ އަވަށުގެ މިސްކިތަކަށް ވަދެގަނެ، ބަންގި ގޮވުމާއި ނަމާދު ކުރުން ހުއްޓުވައި، މިސްކިތުގައި ތިބި މީހުން އެތަނުން ނެރެފަ އެވެ. އަދި އޭގެ ފަހުން އެ މީހުންނާ ދިމާލަށް ސްޓަން ގްރެނޭޑް އާއި ވިހަ ކަރުނަގޭސް ބޭނުންކޮށްގެން ހަމަލާދީފައިވާ ކަމަށްވެސް އެ ނޫހުން ރިޕޯޓުކޮށްފައިވެ އެވެ.
މީގެ އިތުރުން، ބެތުލެހެމްގެ ހުޅަނގުގައި އޮންނަ އަލް-އަރުގޫބް އަވަށަށް ވަދެވެން ހުރި ހުރިހާ ދޮރުތަކާއި މަގުތަކެއް އިސްރާއީލް ސިފައިން ބަންދުކޮށްފައިވާ ކަމަށް ފަލަސްތީނުގެ ނިއުސް އެޖެންސީން ވަނީ ބުނެފަ އެވެ.
އަދި ނަހާލިން އަވަށާއި އެ ގަވަރުނަރޭޓުގެ އެހެން ސަރަހައްދުތައް ވަކިކުރާ މައި ދޮރުމަތިން ދަތުރުކުރި އެ އަވަށުގެ ރައްޔިތަކަށް އިސްރާއީލް ސިފައިން އަނިޔާކޮށްފައިވާ ކަމަށްވެސް ރިޕޯޓުތައް ބުނެ އެވެ.
