ފަލަސްތީނު ގައިދީން ގެންގުޅޭ ޖަލުތައް ބެލެހެއްޓުމަށް ކިނބޫ ބޭނުންކުރުމުގެ ހުއްދަ އިސްރާއީލް ސަރުކާރުން ދީފި

ޖަލުތަކުގެ ސަލާމަތީ ކަންކަން ވަރުގަދަކުރުމަށާއި، ގައިދީން ފިލުން ހުއްޓުވުމަށްޓަކައި ކިނބޫ ބޭނުންކުރުމުގެ ހުއްދަ އިސްރާއީލް ސަރުކާރުން ދީފި އެވެ.

އިސްރާއީލުގެ އެންވަޔަރަންމަންޓް ޕްރޮޓެކްޝަން މިނިސްޓަރު އިދިތު ސިލްމަން ވަނީ، ވަލު ޖަނަވާރުގެ ގޮތުގައި ކުރިން ކަނޑައަޅާފައިވާ ކިނބޫ، "ބަންދުކޮށްގެން ގެންގުޅޭ ދިރުންތަކުގެ" ގޮތުގައި އަލުން ގިންތިކުރައްވާފަ އެވެ. މި ނިންމުމާއެކު، ޖަލުތަކުން ގައިދީން ފިލުން ހުއްޓުވުމަށްޓަކައި ސަލާމަތީ ވަސީލަތެއްގެ ގޮތުގައި ކިނބޫ ބޭނުންކުރުމުގެ ގާނޫނީ މަގު މިވަނީ ހުޅުވިފަ އެވެ.

އިސްރާއީލުގެ ހަރުކަށި ފިކުރުގެ ނޭޝަނަލް ސެކިއުރިޓީ މިނިސްޓަރު އިތަމާރު ބެން ގްވީރު ވަނީ މި ނިންމުމަށް މަރުހަބާ ކިޔާފަ އެވެ. ފަލަސްތީނުގެ ކުށްވެރިން ބައިތިއްބާފައި ތިބޭ ޖަލުތަކުގެ ވަށައިގެން ކިނބޫ ލުމަށް ބެން ގްވީރު ހުށަހެޅީ މިދިޔަ އަހަރުގެ ޑިސެމްބަރު މަހުގެ ތެރޭގަ އެވެ. މިއީ އެމެރިކާގެ ފްލޮރިޑާގައި ހުންނަ "އެލިގޭޓަރ އަލްކަޓްރާޒް" އިމިގްރޭޝަން ޑިޓެންޝަން ފެސިލިޓީގައި ކަންކުރާ އުސޫލަށް ތާއީދުކޮށް އޭނާ ހުށަހެޅި ހުށަހެޅުމެކެވެ.

މިދިޔަ ބުރާސްފަތި ދުވަހު ފޭސްބުކްގައި ކުރި ޕޯސްޓެއްގައި ބެން ގްވީރު ވަނީ، "ފިލަން އުޅެން ހިތަށް އަރާ ހެއްޔެވެ؟ އަލުން ވިސްނާށެވެ،" މިހެން ލިޔެފަ އެވެ. މި ޕޯސްޓާއެކު އޭނާ ވަނީ އޭއައި (އާޓިފިޝަލް އިންޓެލިޖެންސް) ބޭނުންކޮށްގެން ތައްޔާރުކޮށްފައިވާ، ކިނބުލެއްގެ ކަރުގައި ވާޖަހައިގެން ހިފަހައްޓައިގެން ހުންނަ ފޮޓޯއެއްވެސް އާންމުކޮށްފައެވެ.

އެ ފޮޓޯގެ ކެޕްޝަންގައި ލިޔެފައިވަނީ، "މިނިސްޓަރު ބެން ގްވީރު އާއި ސިލްމަން ގުޅިގެން މަސައްކަތް ކުރަނީ ޖަލުތަކުގެ ވަށައިގެން ކިނބޫ ލުމަށެވެ!" މިފަދައިންނެވެ.

އިސްރާއީލުގެ ޗެނަލް 13 އިން ރިޕޯޓްކޮށްފައިވާ ގޮތުގައި، މިދިޔަ އަހަރު ބެން ގްވީރުގެ މި ހުށަހެޅުން ފުރަތަމަ ހުށަހެޅުމުން، އިސްރާއީލް ނޭޗަރ އެންޑް ޕާކްސް އޮތޯރިޓީން ވަނީ އެކަމާ ދެކޮޅު ހަދާފަ އެވެ.

ނަމަވެސް، މި ޖަނަވާރުތައް އަލުން ގިންތިކުރުމާ ގުޅިގެން، އެ ތަކެތި ބެލެހެއްޓުމުގެ ޒިންމާ ނޭޗަރ އެންޑް ޕާކްސް އޮތޯރިޓީގެ އަތުން ވަނީ "ސަލާމަތީ އިދާރާއަކަށް" ބަދަލުވެފަ އެވެ. ބެން ގްވީރުގެ ބެލުމުގެ ދަށުން ހިންގާ އިސްރާއީލް ޕްރިޒަން ސަރވިސްއަކީ މިފަދަ ސަލާމަތީ އިދާރާއެކެވެ.

ވޭތުވެދިޔަ ބުދަ ދުވަހު ތަސްދީގުކުރި ގަވާއިދުގައިވާ ގޮތުން، ނައިލް ކިނބޫ ގެންގުޅެވޭނީ ސަލާމަތީ އިދާރާއަކުން އެ ތަކެތި ބަލަހައްޓާ ނަމައެވެ. އަދި އެ ތަކެތި ވަލުތެރެއަށް ދޫނުވާނެ ފަދަ ގޮތަކަށް، ނޭޗަރ އެންޑް ޕާކްސް އޮތޯރިޓީގެ ޑިރެކްޓަރު ކަނޑައަޅާ އުސޫލުތަކުގެ ދަށުން ބެލެހެއްޓުމަށާއި، ސަލާމަތީ ބޭނުމަކަށްޓަކައި އެ ތަކެތި ގެންގުޅުން މުހިންމު ކަމަށް އެންވަޔަރަންމަންޓް ޕްރޮޓެކްޝަން މިނިސްޓަރު ނިންމަން ޖެހޭނެ ކަމަށްވެސް އެ ގަވާއިދުގައި ބަޔާންކޮށްފައިވެ އެވެ.

އިސްރާއީލުގެ މީޑިއާތަކުން ރިޕޯޓްކުރާ ގޮތުގައި، ބެން ގްވީރު ގަސްދުކުރަނީ އިސްރާއީލުގެ ދެކުނުގައި ހުންނަ ކެޓްޒިއޮޓް ޖަލުގެ ވަށައިގެން ކިނބޫ ދޫކުރުމަށެވެ. މި ޖަލަކީ 2023 ވަނަ އަހަރުގެ އޮކްޓޯބަރު މަހުގެ 7 ވަނަ ދުވަހު ހަމާސްއިން އިސްރާއީލަށް ދިން ހަމަލާއަށްފަހު ހައްޔަރުކޮށްފައިވާ ހަމާސްގެ ގިނަ އަދަދެއްގެ މުޖާހިދުން ބަންދުކޮށްފައި ތިބި ޖަލެކެވެ. އެ ހަމަލާއާ ގުޅިގެން ފެށުނު ޣައްޒާ ހަނގުރާމައަށް މިހާރު ވަނީ ދެ އަހަރަށްވުރެ ގިނަ ދުވަސް ވެފަ އެވެ.

ޗެނަލް 13 އިން ބުނި ގޮތުގައި، މިދިޔަ އަހަރު ބެން ގްވީރު މި ހުށަހެޅުން ފުރަތަމަ ހުށަހެޅުމުން، އިސްރާއީލް ޕްރިޒަން ސަރވިސްގެ ބައެއް އޮފިސަރުން ވަނީ އެކަމަށް މަލާމާތްކޮށް ހަޖޫވެސް ޖަހާފަ އެވެ.