ވައްކަމާއި ޚިޔާނާތުގެ ސަބަބުން ޔާމީނުގެ ސިޔާސީ ހަޔާތްޕުޅުގައި ސިއްކަ ޖެހިއްޖެކަމަށް ވިދާޅުވި ނަޝީދުގެ ރާގު ބަދަލުވެއްޖެ

ކުރީގެ ރައީސް މުހައްމަދު ނަޝީދު، 2018 ވަނަ އަހަރުގެ ރިޔާސީ އިންތިޚާބަށްފަހު، ދެއްކެވި ވާހަކަފުޅެކެވެ. ވާހަކަފުޅުދައްކަވަމުން ގެންދެވީ ކުރީގެ ރައީސް އަބްދުﷲ ޔާމީނަށް ރިޔާސީ އިންތިޚާބުން ނާކާމިޔާބީއާ ކުރިމަތިވެވަޑައިގަންނަވަން ޖެހިވަޑައިގަތުމުން، އެ މައުޟޫއަށެވެ.

ވިދާޅުވަމުން ގެންދެވީ، ޔާމީން މާބޮޑަށް ވެސް ނާކާމިޔާބު ވެވަޑައިގެންފައި ވާކަމަށާއި, ރާއްޖޭގެ ސިޔާސީ މަސްރަހުގައި ރައީސް ޔާމީން ދެން ހަރަކާތްތެރިވެ ވަޑައިނުގަންނަވާނެ ކަމަށެވެ. ސަބަބުތައްވެސް ކިޔައިދެއްވިއެވެ.

ނަޝީދު އެ ދުވަހު ވިދާޅުވީ، އަނިޔާވެރިކަމާއި، ވައްކަމާއި، ބޭފަވާތެރިކަމާއި، ޚިޔާނާތްތެރިކަމަކީ އިންސާނާ ފަހަތަށް ޖައްސާލާ ޒާތުގެ ކަންކަން ކަމަށެވެ. ޔާމީނަށް އިންތިޚާބުގައި ކުރިމަތިވެވަޑައިގެންނެވި ނާކާމިޔާބީގެ ސަބަބަކީވެސް ނަޝީދު ސިފަކުރެއްވި ގޮތުގައި، އަނިޔާވެރިކަމާއި ވައްކަމާއި ޚިޔާނާތެވެ.

އެމްޑީޕީގެ ރިޔާސީ ޕްރައިމަރީން ނާކާމިޔާބީއާ ކުރިމަތިވެވަޑައިގަތުމުން، އަމިއްލަފުޅު ޕާޓީ ދޫކުރައްވައި ވަޑައިގެން ނަޝީދު މިހާރު އުޅުއްވަނީ އައު ޕާޓީއެއް އުފައްދަވައިގެންނެވެ. އެ ޕާޓީގެ ރިޔާސީ ކެންޑިޑޭޓުގެ ކެމްޕޭނު ޖަލްސާއެއްގައި ނަޝީދު މިވަނީ އަނެއްކާވެސް ޔާމީނުގެ ވާހަކަ ދައްކަވާފައެވެ.

ނަމަވެސް މިއަދު، ފެންނަނީ ތަފާތު މަންޒަރެކެވެ. އިވެނީ ތަފާތު ލަވައެކެވެ. ޖަހަނީ ތަފާތު ރާގެކެވެ.

މިއަދު ވިދާޅުވަނީ މަނީ ލޯންޑަރިންގެ ކުށް ސާބިތުވެ 11 އަހަރުގެ ޖަލު ހުކުމެއް ތަންފީޒު ކުރައްވަމުންގެންދަވާ ކުރީގެ ރައީސް ޔާމީން އަބްދުލްގައްޔޫމް މިނިވަންކުރަން ޖެހޭނެ ކަމަށެވެ.

ހަރުއަޑުފުޅުން ގޮވާލައްވަމުން ގެންދެވީ ޔާމީނު ދޫކޮށްލުމަށެވެ. ފެނުނު މަންޒަރު ބޮޑަށް ސިފަކުރެވުނީ އެމަނިކުފާނުގެ ރިޔާސީ ކެނޑިޑޭޓުގެ ކެމްޕޭނު ޖަލްސާއަކަށްވުރެ ބޮޑަށް، ޔާމީނު މިނިވަންކުރުމަށް ގޮވާލާ ކުރިއަށް ގެންދިޔަ ފޯރިގަދަ ޖަލްސާއެއް ގޮތުގައެވެ.

އެ ޖަލްސާގައި ވާހަކަފުޅުދައްކަވަމުން ނަޝީދު ވިދާޅުވީ، ދެން މާގިނަ ދުވަހަކު ރައީސް ޔާމީން ޖަލުގައި ނުހުންނަވާނެ ކަމަށެވެ.

ޔާމީން މިނިވަން ކުރެއްވުމަށް ބައިނަލް އަގުވާމީ ފަރާތްތަކާއެކު އެމަނިކުފާނު ވާހަކަދައްކަވާނެ ކަމަށެވެ. އަދި އެކިއެކި ބައިނަލް އަގުވާމީ ވަކީލުން ރާއްޖެއަށް ގެންނަވައިގެން ވަކާލާތުވެސް ކުރައްވާނެ ކަމަށް ވިދާޅުވެ، އެރޭ ޕީޕީއެމްގެ ރައްޔިތުންނަށް ދެއްވި ޔަގީންކަމަކީ ރައީސް ޔާމީން ޖަލުން ނެރުއްވާނެކަމެވެ.

އެހެންނަމަވެސް، ޕީޕީއެމްގެ ރައްޔިތުން މިއަދު އުފައްދަނީ ސުވާލެކެވެ. މި ވީހާ ދުވަހު ޔާމީނު ދޫކޮށްލުމަށް ގޮވައިނުލެއްވީ ކީއްވެތޯއެވެ؟ ބޭރު ގައުމުތަކުގެ ވަކީލުން ގެންނަވައި، ޔާމީނު ޖަލުން ނެރުއްވަން ފޫނުގެޅުއްވީ ކީއްވެތޯއެވެ؟ ޔާމީނުގެ ހައްގުގައި ޕީޕީއެމްގެ މެމްބަރުން މަގުމަތީގައި އިހުތިޖާޖު ކުރަމުންދިޔައިރު، އެކަމުގައި ބައިވެރިވެވަޑައިނުގަތީ ކީއްވެތޯއެވެ؟

ދެން އޮތީ އެންމެ މުހިއްމު ސުވާލެވެ. ޔާމީނަށް އިންތިޚާބުގައި ވާދަ ނުކުރެއްވޭނެކަން ޔަގީންވެ، ކެންޑިޑެސީ މައްސަލަވެސް ނިހާއީ ކޯޓުން ނިންމި ހިސާބުން އަމުދަކުން ތިޔަ ވާހަކަފުޅެއް ތިޔަ ފެއްޓެވީ ކީއްވެތޯއެވެ؟ އެހާތަނަށް ހަނު ހުންނަވައި މަޑުކުރެއްވީ ކޮން ސަބަބެއް އޮވެގެންތޯއެވެ؟