މެއި ހަޔެއްގެ ހަމަލައާ ގުޅިގެން ހައްޔަރުކުރި ފާތިހު ދޫކޮށްލައިފި
ދައުވާ ކުރަން ފޮނުވަނީ ސާބިތުވާ ވަރަށް ހެކި ހުރެގެން
ހަމަލާއާ ގުޅިގެން ހައްޔަރުކުރި ލ. ގަން، ދުންފިނިއުފާ، އަހުމަދު ފާތިހު
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު އަވަހާރަކޮށްލުމަށް މޭ 6 ވަަނަ ދުވަހުގެރޭ ބޮމެއް ގޮއްވާލި މައްސަލައިގައި ހައްޔަރުކޮށްފައިވާ ލ. ގަން، ދުންފިނިއުފާ، އަހުމަދު ފާތިހު ފުލުހުންގެ ބަންދުން ދޫކޮށްލައިފިއެވެ.
ފާތިހު ފުލުހުންގެ ބަންދުން ދޫކޮށްލާފައިވާކަން ފުލުހުން ވަނީ ރާއްޖެއެމްވީއަށް ކަށަވަރު ކޮށްދީފައެވެ. އެގޮތުން ފާތިހު ދޫކޮށްލާފައިވަނީ އޭނާގެ މައްޗަށް ދައުވާ ނުކުރަން ޕްރޮސެކިއުޓަރ ޖެނެރަލް (ޕީޖީ) ނިންމެވުމާއި ގުޅިގެން ކަމަށް ފުލުހުން މައުލޫމާތު ދެއެވެ.
ފުލުހުން އެހެން ބުނެފައިވާއިރު، އެންމެ ފަހުން ބޭއްވި ނޫސްވެރިންގެ ބައްދަލުވުމުގައި ޕީޖީ ހުސައިން ޝަމީމް ވިދާޅުވީ، ދައުވާ ކުރަން ފޮނުވަނީ އެ ދާއުވާއެއް ސާބިތުވާ ވަރަށް ހެކި ހުރެގެން ކަމަށެވެ. ފާތިހުގެ ތަހުގީގުގައި އޭނާގެ މައްޗަށް ކުށް ސާބިތުވާވަރަށް ހެކި ނެތް ކަމަށް ޕީޖީ ޝަމީމު ވިދާޅުވިއެވެ.
ފާތިހު ހައްޔަރުކޮށްފައިވަނީ، ބ. ދަރަވަންދޫންނެވެ. ހައްޔަރުކުރުމުން އޭނާއަކީ ފުލުހުންގެ އިންޓެލިޖެންސްގައި ވެސް މަސައްކަތްކުރި މީހެއްކަން ވަނީ އެނގިފައެވެ.
ހަމަލައާ ގުޅިގެން ދައުވާ އުފުލާފައިވަނީ އެންމެ ފުރަތަމަ ހައްޔަރުކުރި ތިން މީހުން ކަމަށްވާ އަހުމަދު އަދުހަމާއި މުޖާޒް އަހްމަދު އަދި ތަހުމީން އަހްމަދުގެ މައްޗަށާއި ބޮން ގޮއްވާލި ސައިކަލްގައި ބޮން ހަރުކުރުމުގައި އަމަލީ ގޮތުން މަސައްކަތް ކުރި ކަމަށް ތުހުމަތުވާ އަލީ ހައިޝަމްގެ މައްޗަށެވެ.
