އަދުހަމަށް ޓްރިމަރު ގެނެސްދީ، ސިފަ ބަދަލުކުރަން އެހީވިކަމަށް ބުނާ މުޖާޒް: "އެކަން ނުދެނަހުރިން"
މުޖާޒް ދައުވާއަށް އިންކާރު ކޮށްފައިވަނީ އަންގާރަ ދުވަހު ކްރިމިނަލް ކޯޓުގައި ކުރިއަށްދިޔަ އަޑުއެހުމުގައި
ހަމަލާއާ ގުޅިގެން އެންމެ ފުރަތަމަ ހައްޔަރު ކުރެވުނު ތިން މީހުން
ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދަށް އަމާޒުކޮށް, ދިން ޓެރަރިސްޓު ހަމަލާގައި ދައުވާ އުފުލާފައިވާ އަދުހަމް އެކަންކޮށް ނިމުމުން އޭނާ ފިލުމަށް އެހީވެ، ސިފަ ބަދަލުކުރުމަށް އެހީވިކަމުގެ ތުހުމަތުކޮށް އެކަމުގެ ދައުވާ އުފުލާފައިވާ މުޖާޒް މުޙައްމަދުގެ ފަރާތުން ދައުވާއަށް އިންކާރުކޮށްފިއެވެ.
މުޖާޒް ދައުވާއަށް އިންކާރު ކޮށްފައިވަނީ އަންގާރަ ދުވަހު ކްރިމިނަލް ކޯޓުގައި ކުރިއަށްދިޔަ އަޑުއެހުމުގައެވެ. މި އަޑުއެހުމުގައި މުޖާޒްގެ އިތުރުން ތަހުމީން އަޙުމަދުއާއި ޢަލީ ހައިޝަމްގެ ބައިވެސް ވަނީ ކުރިއަށް ގެންގޮސްފައެވެ.
މުޖާޒް އަޙުމަދު:
މި ހަމަލާއާއި ގުޅިގެން މުޖާޒްގެ މައްޗަށް އުފުލާފައިވަނީ ޓެރަރިޒަމްގެ އަމަލެއް ކުރުމަށް ރޭވުމުގެ ކުށުގެ ދައުވާއާއި، ކުށެއް ކޮށްފައިވާ މީހަކު ފިލުމަށް އެހީވުމުގެ ކުށުގެ ދައުވާއެވެ. އެގޮތުން އަދުހަމް ހަމަލާ ދިނުމަށްފަހު ގޮސް "ބުރު ޕާކުގައި" ހުއްޓައި އޭނާއަށް ފިލުމަށް އެހީވެ އަންނައުނު ހޯދައިދީ، ޓްރިމަރެއް ހޯދައިގެން ސިފަ ބަދަލު ކުރުމަށް އެހީވެ، ގެސްޓުހައުސްއަކަށް ގޮސް ފިލުމަށްޓަކައި ޓެކްސީ ހޯދުމަށް އެހީތެރިކަން ފޯރުކޮށްދީފައިވާކަމަށް ދައުލަތުން ދައުވާ އިއްވަމުން ބުނެފައިވެއެވެ.
ދައުވާތަކަށް ޖަވާބުދާރީވާން ލިބުނު ފުރުސަތުގައި މުޖާޒް ބުނީ، ހުރިހާ ދައުވާއެއްވެސް ސާފުވެއްޖެ ކަމަށާއި، ދައުވާތަކަށް ކަނޑައެޅިގެން އިންކާރު ކުރާ ކަމަށެވެ. އަދި އެ ވާހަކަތަކަކީ ނުވެސް ދެނަހުރި ވާހަކަތަކެއްކަމަށް މުޖާޒް ބުނެއެވެ.
ތަހުމީނު އަޙުމަދު:
މި މައްސަލައިގައި ދައުވާލިބޭ ތަހުމީނުގެ މައްޗަށް އުފުލާފައިވަނީ ޓެރަރިޒަމްގެ އަމަލެއް ހިންގުމުގައި ބައިވެރިވުމުގެ ކުށުގެ ދައުވާއާއި، ޓެރަރިޒަމްގެ އަމަލެއް ކުރުމަށް ރޭވުމުގެ ކުށުގެ ދައުވާއާއި، ގޮވާތަކެތި އެހެން ތަނަކަށް ގެންދިއުމުގެ ކުށުގެ ދައުވާގެ އިތުރުން، ޓެރަރިސްޓު ޖަމާއަތަކަށް ތާއީދު ކުރުމުގެ ކުށުގެ ދައުވާއެވެ. އެގޮތުން އޭނާއަކީ 2019 ވަނަ އަހަރުން ފެށިގެން އައިސިސްއަށް ތާއީދުކޮށް އެ ފިކުރު ޕްރޮމޯޓު ކުރަމުން އައިސްފައިވާ މީހެއްކަން ދައުލަތުން ދައުވާ އިއްވަމުން ފާހަގަކޮށްފައިވެއެވެ.
ދައުވާއަށް ޖަވާބުދެމުން ތަހުމީނުވެސް ވަނީ ދައުވާތައް ސާފުވެއްޖެކަމަށްބުނެ ދައުވާތަކަށް އިންކާރު ކޮށްފައެވެ.
" ދައުވާތަކަށް އިންކާރު ކުރަން. ނުކުރާ ކަންކަމަށް ދައުވާކުރީމަ އިންކާރު ކުރާނެ ނޫންތޯ. އެގޮތުން އަޅުގަނޑު އިންކާރު މި ކުރަނީ"
މުޖާޒާއި ތަހުމީނުގެ ދައުވާގެ ހެކި ހާމަކުރުންވެސް ކުރިއަށް ދިޔަ:
އަންގާރަ ދުވަހުގެ އަޑުއެހުމުގައި ދައުލަތުން ވަނީ މުޖާޒާއި ތަހުމީނުގެ މައްޗަށް ހެކިވެސް ހުށައަޅާފައެވެ. އެގޮތުން ގިނަ ޝަފަވީ އަދި ކިތާބީ ހެކިތަކެއް ހުށައަޅާފައިވާއިރު، އެ ދެމީހުންގެ ދިފާއީ ވަކީލުން ވަނީ ލިއުމުން ހެކި ހުށައަޅުއްވާނެކަމަށް ވިދާޅުވެފައެވެ. ޝަރީއަތުން ވަނީ ދިފާއުން ހެކި ހުށައެޅުމަށް 10 ދުވަހުގެ މުއްދަތެއް ދެއްވާފައެވެ.
ޢަލީ ހައިޝަމް:
މި މައްސަލައިގައި ޢަލީ ހައިޝަމްގެ މައްޗަށް އުފުލާފައިވަނީ ޓެރަރިޒަމްގެ އަމަލެއް ހިންގުމުގައި ބައިވެރިވުމުގެ ކުށުގެ ދައުވާއާއި، ޓެރަރިޒަމްގެ އަމަލެއް ކުރުމަށް ރޭވުމުގެ ކުށުގެ ދައުވާއާއި، ގޮވާތަކެތި އެހެން ތަނަކަށް ގެންދިއުމުގެ ކުށުގެ ދައުވާއެވެ. މި ދައުވާތަކަށް ޖަވާބު ދިނުމަށް ފުރުސަތު ދެއްވުމުން ހައިޝަމް ވަނީ ވަކީލަކު ހަމަޖެއްސުމަށް އިތުރު ވަގުތު ބޭނުންވާކަން ފާހަގަކޮށްފައެވެ. އެގޮތުން ވަކީލަކު އައްޔަނު ކުރުމަށް ކުރިން ދިން މުއްދަތުގައި ވަކީލަކު ހަމަޖެއްސިފައި ނުވާކަމަށް ހައިޝަމް ބުނެފައިވެއެވެ.
އެކަމާ ގުޅިގެން ޝަރީއަތުން ވަނީ ދެން މި މައްސަލައިގައި ބާއްވާ އަޑުއެހުމެއްގައި ވަކީލަކު ހަމަނުޖެއްސުނު ނަމަވެސް ދައުވާތަކަށް ޖަވާބުދާރީވާން ޖެހޭނެކަން ފާހަގަ ކުރައްވައި، ވަކީލަކު އައްޔަނު ކުރުމަށް 10 ދުވަހުގެ މުއްދަތެއް ދެއްވާފައެވެ.
