މެއި 6ގެ ހަމަލާއަށް ފަންޑުކުރި މީހުން ހޯދުމަށް ވަރުގަދަ ތަހުޤީޤެއް ހިންގުމަށް ރައީސް ނަޝީދުގެ އާއިލާއިން އެދޭ
މެއި 6ގެ ޙަމަލާގެ އަޑުއެހުން އެންމެ ފަހުން ބާއްފާއިވަނީ 28 މާރޗުގައި
ޓެރަރިސްޓް ހަމަލާގެ ޝަރީއަތް ދިގުލައިގެންދާތީ ރައީސް ނަޝީދުގެ އާއިލާއިން ވަނީ ކަންބޮޑުވުން ފާޅުކޮށްފައި
ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު އަވަހާރަކޮށްލަން ދިން ޓެރަރިސްޓް ހަމަލާގެ ޝަރީއަތް ދިގުލައިގެންދާތީ އެމަނިކުފާނުގެ އާއިލާއިން ކަންބޮޑުވުން ފާޅުކޮށްފިއެވެ.
2021 ވަނަ އަހަރުގެ މެއި މަހުގެ 6 ވަނަ ދުވަހު ރައީސް ނަޝީދަށް އަމާޒުކޮށްގެން ދިން ބޮމުގެ ޙަމަލާއަށް 1 އަހަރުވާއިރު، އެކަމާ ގުޅިގެން ރައީސް ނަޝީދުގެ އާއިލާގެ ފަރާތުން ވަނީ ބަޔާނެއް ނެރެފައެވެ.
ބަޔާނުގައި ބުނެފައިވަނީ، 1 އަހަރު ވެގެން ދިޔައިރުވެސް އެ މައްސަލައިގައި ހިމެނޭ މީހުންގެ ޝަރީޢަތްތައް ދިގުލައިގެން ގޮސްފައިވާ ކަމަށާއި، އެކަމާއި ރައީސް ނަޝީދުގެ މުޅި އާއިލާއިންވެސް ކަންބޮޑުވާ ކަމަށެވެ. އަދި އެ ޙަމަލާގެ ބައެއް ބައިވެރިން ހައްޔަރުކޮށް ދަޢުވާ ކޮށްފައިވީނަމަވެސް، އެ ޙަމަލާގެ ފަހަތުގައި ތިބި މީހުން ހޯދިފައިނުވާތީ އާއިލާއިން ވަނީ ކަންބޮޑުވުން ފާޅުކޮށްފައެވެ. އެމީހުންނާ މި މައްސަލައާ ގުޅޭގޮތް ތަނަވަސް ގޮތެއްގައި ތަހުޤީޤު ކުރެވިފައި ނެތްކަމަށްވެސް ބަޔާނުގައި ބުނެފައިވެއެވެ.
ރައީސް ނަޝީދުގެ އާއިލާއިން ވަނީ އެމަނިކުފާނު ޒަޚަމްވެފައި ވަނިކޮށް، ހޮސްޕިޓަލަށް ގެންދިޔަ ހަށިފާރަވެރިންނަށާއި، އެ މަނިކުފާނަށް ފަރުވާ ދެއްވި މެޑިކަލް ބޭފުޅުންނަށް ޝުކުރު އަދާކޮށްފައެވެ.
މީގެ އިތުރުން، ރައީސް ނަޝީދުގެ އާއިލާއިން އެދިފައިވަނީ މި ހަމަލާ ހިންގުމަށް ފައިސާ ޚަރަދުކުރި ފަރާތްތައް ހޯދުމަށްޓަކައި، ވަރުގަދަ ތަޙްޤީޤެއް އަދިވެސް ހިންގުމަށެވެ.
ރައީސް ނަޝީދުގެ އާއިލާއިން ބުނާ ގޮތުގައި އެ ތަހުޤީޤު ރަނގަޅަށް ހިންގިފައި ނެތުމުން، ރައީސް ނަޝީދުގެ ޖާނާއި އެ މަނިކުފާނު ފަދައިން ޝިކާރައަކަށް ވެފައިވާ އެހެން ފަރާތްތަކުގެ ވަށައިގެން ބިރުވެރިކަމުގެ މާހައުލެއް އުފެދިފައިވާކަމަށެވެ. އަދި އެކަމުގައި، އަދުލު އިންސާފު ޤާއިމުވެފައި ނެތުމުން، މުޅި މުޖްތަމަޢުގެ މައްޗަށް ބިރުވެރިކަމުގެ ހިޔަނި އެޅިފައިވާކަމުގައި ޤަބޫލުކުރާކަމަށް އާއިލާއިން ބުނެއެވެ.
މީގެ އިތުރުން، ސެކިއުރިޓީ ސަބަބުތަކާ ހުރެ، ރައީސް ނަޝީދު ހިންގަވާ ޙަރަކާތްތައް ހަނިވެފައިވާތީ، ސިޔާސީ ލީޑަރެއްގެ ހައިސިއްޔަތުން އެމަނިކުފާނު އަދާކުރަންޖެހޭ ކަންކަން ހުއްޓި، ސިޔާސީ ގޮތުންނާއި، އަދި ގާތްތިމާގެ މީހުންނާއި ރަޙްމަތްތެރިންނާ އެކު އެމަނިކުފާނު ކުރައްވާން އެދިވަޑައިގަންނަވާ މުޢާމަލާތްތަކަށް ހުރަސްއެޅިފައިވާކަމަށްވެސް ވަނީ ބުނެފައެވެ.
މެއި 6ގެ ހަމަލާގައި ހިމެނޭ ބައެއް މީހުންގެ މައްޗަށް ދައުވާ އުފުލައި މިހާރު ޝަރީއަތް ކުރިއަށް ދެއެވެ. އެގޮތުން މި މައްސަލައިގެ އެންމެ ފަހުންއަޑުއެހުމެއްބާއްވާފައިވަނީ 28 މާރޗު 2022 ގައެވެ. އެ ދުވަހުގެ އަޑުއެހުމުގައި ވަނީ މެއި 6ގެ ހަމަލާގެ ދައުވާތައް މަދަނީ މިންގަނޑުން ކުރިއަށް ގެންދެވޭނެކަމަށް ކަނޑައަޅާފައެވެ.
