ބޮމުގެ ޙަމަލާ: އިސްޙާޤު އެދުނީ ޝަރީޢަތް ސިއްރުކޮށްދޭން
ވަކި ހިސާބަކުން އަދުހަމުގެ އަޑުއެހުން ވަނީ ސިއްރުކޮށްފައި
ބޮމުގެ ޙަމަލާއާ ގުޅިގެން ދައުވާ އުފުލާފައިވާ މ. ކުދެހިގެ އިސްޙާޤު
ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދަށް ދިން ޓެރަރިސްޓު ޙަމަލާއާ ގުޅިގެން ހައްޔަރުކޮށް ދައުވާ އުފުލާފައިވާ މ. ކުދެހިގޭ އިސްޙާޤުގެ ފަރާތުން, އެ މައްސަލަ ސިއްރުކޮށްދިނުމަށް ކުރިމިނަލް ކޯޓުގައި އެދިއްޖެއެވެ.
އޭނާގެ ފަރާތުން އެގޮތަށް އެދިފައިވަނީ އަންގާރަ ދުވަހު ކްރިމިނަލް ކޯޓުގައި ކުރިއަށްދިޔަ އަޑުއެހުމުގައެވެ. އެގޮތުން މި އަޑުއެހުމުގައި އިސްޙާޤުގެ އިތުރުން މި މައްސަލައިގެ ދަޢުވާލިބޭ ފަހުމީ ޢަލީއާއި، މުޙައްމަދު ނާޒިމްގެ ބައިވެސް ވަނީ އެކީގައި ކުރިއަށް ގެންގޮސްފައެވެ. އެ 3 މީހުންގެ މައްޗަށްވެސް ވަނީ ޓެރަރިޒަމްގެ ޢަމަލެއް ކުރުމަށް ރޭވުމުގެ ކުށުގެ ދަޢުވާއާއި، ޓެރަރިޒަމްގެ ޢަމަލެއް ހިންގުމުގައި ބައިވެރިވުމުގެ ކުށުގެ ދަޢުވާ އުފުލާފައެވެ. މި 2 ދަޢުވާގެ އިތުރުން ގޮވާތަކެތި އެހެން ތަނަކަށް ގެންދިއުމުގެ ކުށުގެ ދަޢުވާވެސް އިސްޙާޤުގެ މައްޗަށް އުފުލާފައިވެއެވެ.
މި އަޑުއެހުމުގައި ވާހަކަ ދައްކަވަމުން އިސްޙާޤުގެ ވަކީލު ވަނީ މި މައްސަލައިގެ ދަޢުވާލިބޭ އަދުހަމްގެ ބައި ކުރިއަށް ގެންދިޔައިރު, ސިއްރުކޮށްގެން ކުރިއަށް ގެންގޮސްފައިވާތީ އިސްޙާޤުގެ ބައިވެސް ސިއްރުން ކުރިއަށް ގެންދިއުމަށް އެދިވަޑައިގަންނަވާފައެވެ. އެގޮތުން އަންގާރަ ދުވަހު ހެނދުނު ބޭއްވި އަޑުއެހުމެއްގައި މި މައްސަލައިގެ ދަޢުވާ ލިބޭއަދުހަމްގެ ޝަރީއަތްވެސް ކުރިއަށް ގެންގޮސްފައިވާއިރު، ޤައުމީ ސަލާމަތާގުޅޭ ވާހަކަތައް ހުރުމުގެ ސަބަބުން ވަކި ހިސާބަކުން އަޑުއެހުން ވަނީ ސިއްރުކޮށްފައެވެ.
އެކަމާ ގުޅޭގޮތުން ވާހަކަ ދައްކަވަމުން އިސްޙާޤުގެ ވަކީލު ވިދާޅުވީ، އޭނާއަށްވެސް ޢަދުލުވެރިކަމާއެކު ޝަރީޢަތް ކުރިއަށް ދިއުމުގެ ޙައްޤު ލިބިގެންވާ ކަމަށާއި، ހާމަކޮށްގެން ކުރިއަށް ގެންގޮސްފިނަމަ މި މައްސަލައިގައި އިސްޙާޤުގެ ބައިގައި ޝަރީޢަތަށް ނޭދެވޭ އަސަރެއް ކުރުމުގެ އިޙްތިމާލު ބޮޑު ކަމަށެވެ. ވުމާއެކު ޝަރީޢަތް ސިއްރުން ކުރިއަށް ގެންދިއުމަށް ވަކީލު އެދިވަޑައިގެންނެވިއެވެ.
އޭގެ އިތުރުން އިސްޙާޤުގެ ބަންދު މުރާޖަޢާ ބައިވެސް ކުރިއަށް ގެންގޮސްފައިވާއިރު، މިހާރު އޭނާގެ މައްޗަށް ކޮށްފައިވާ ބަންދު އަމުރުގެ މުއްދަތު ހަމަވަނީ 24 ސެޕްޓެމްބަރަށްކަން ފާހަގަ ކުރައްވައި އޭނާގެ ވަކީލު ވަނީ ދައުލަތުން އެދިފައިވާ ގޮތަށް ޝަރީއަތް ނިމެންދެން ބަންދު ކުރުމާމެދު ގޮތެއް ނިންމެވުން އަދި ފަސްކޮށްދެއްވުމަށް އެދިވަޑައިގެންފައެވެ. ވަކީލު ވިދާޅުވީ، އިސްޙާޤު ބަންދު ކުރުމާ ގުޅޭގޮތުން ހައިކޯޓުން ނިންމި ނިންމުން ސުޕްރީމް ކޯޓުގައި އިލްތިމާސް ކުރުމުގެ ކަންކަންވެސް ކުރިއަށްދާ ކަމަށާއި، މި މައްސަލައިގެ ލިއެކިއުންތައް ދިރާސާ ކުރުމަށްވެސް ވަގުތު ބޭނުންވާ ކަމަށެވެ.
މި ހުށައެޅުންތަކާ ގުޅިގެން މައްސަލަ ބައްލަވާ ފަނޑިޔާރުންގެ ބެންޗުން ވަނީ ބަންދާމެދު ގޮތެއް ނިންމުމަށް ވާހަކަ ދައްކަވާއިރު ލިއެކިއުންތައް ދިރާސާ ކުރެވުމުގެ ފުރުސަތު ލިބިދޭންޖެހޭނެކަން ފާހަގަ ކުރައްވައި އެ ފުރުސަތު ދެއްވުމަށް ނިންމަވާފައެވެ. ނަމަވެސް ޝަރީޢަތް ސިއްރުކޮށްގެން ކުރިއަށް ގެންދިއުމަށް ހުށައެޅުއްވި ހުށައެޅުމާއި ގުޅިގެން ވަކި ގޮތެއް އަދި ނުނިންމަވާކަން ބެންޗުން ފާހަގަ ކުރެއްވިއެވެ.
މި މައްސަލަ ބައްލަވާ ފަނޑިޔާރުންގެ ބެންޗުގައި ހިމެނިވަޑައިގަންނަވަނީ ފަނޑިޔާރު އާދަމް މުޙައްމަދު، މުޙައްމަދު މިސްބާޙު އަދި ޞަފްވަތު ޙަބީބެވެ.
އޭގެ އިތުރުން، ފަހުމީ ޢަލީއާއި މުޙައްމަދު ނާޒިމް ވަކީލެއް ބޭނުންވާކަން ފާހަގަ ކުރެއްވުމުން, ވަކީލަކު އައްޔަނު ކުރެއްވުމަށް ބެންޗުން ވަނީ 15 ދުވަހުގެ މުއްދަތެއްވެސް ދީފައެވެ.
