ޕީޕީއެމް އާއި ގުޅިގެން އެމްޑީޕީ އިން މަސައްކަތް ކުރަން ތާއިދު ނުކުރަން – ރައީސް
16 އޯގަސްޓު 2022 | އަންގާރަ 11:29ދެ ޕާޓީ ދެފަޅީގައި ތިބެގެން ސިޔާސީ މަސައްކަތް ކުރުމަކީ އެންމެ ރަނގަޅު ގޮތް
ޕީޕީއެމްގެ ރައީސް އަބްދުﷲ ޔާމީން (ކ) އަދި ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު (ވ) ރައްޔިތުންގެ މަޖިލީހުގައި
މި ގައުމަށް އޮތް އެންމެ ރަނގަޅުގޮތަކީ އެމްޑީޕީއާއި ޕީޕީއެމް ދެފަޅީގައި ތިބެގެން ސިޔާސީ މަސައްކަތް ކުރުން ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހް ވިދާޅުވެއްޖެއެވެ.
ކުރީގެ ރައީސް އަދި ޕީޕީއެމްގެ ރައީސް އަބްދުﷲ ޔާމީން އާއި، އެމްޑީޕީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދް އާއި، ދެބޭފުޅުން އެކުގައި މަސައްކަތް ކުރެއްވުމަކީ ވުން އެކަށީގެންވާ ކަމެއް ކަމަށް ރައީސް ނަޝީދު ވިދާޅުވި ވާހަކަފުޅާއި ގުޅިގެން، "ރާއްޖެ ޓީވީ" އިން ކުރި ސުވާލަށް ޖަވާބުދެއްވަމުން ރައީސް ސާލިޙު ވިދާޅުވީ ދެ ޕާޓީ ދެފަޅީގައި ތިބެގެން ސިޔާސީ މަސައްކަތް ކުރުމަކީ އެންމެ ރަނގަޅު ގޮތް ކަމަށެވެ.
ރައީސް ސާލިހު ވިދާޅުވީ އެއްބަޔަކު ވެރިކަމުގައި އޮންނަ އިރުގައި އަނެއްބަޔަކު ތިބޭނީ ސަރުކާރު ޖަވާބުދާރީކޮށް ޒިންމާދާރުކުރުމުގައި ކަމަށެވެ. ރައީސް ވިދާޅުވީ މިހާރު މި ފެންނަ ގޮތުން އެމްޑީޕީއަށާއި، ޕީޕިއެމް އަށް ރާއްޖޭގައި އެންމެ ބޮޑު އަގުލަބިއްޔަތެއް އޮތް ކަމަށާއި، އަދިވެސް ކުރިއަށް މިއޮތްތަނުގައި ވެރިކަމަށް އަތުވެދާނެކަމަށް ބޮޑަށް ގަބޫލުކުރެވެނީ މި ދެ ޕާޓީންކުރެ ޕާޓީއެއްގެ ކެންޑިޑޭޓެއް ނުވަތަ އުފައްދާ ކޯލިޝަނެއްގެ ތެރެއިން ކަމަށެވެ.
ހުކުރު ދުވަހު އޮންނަ އެމްޑީޕީގެ 4 ވަނަ ކޮންގްރެސްއަށް ރައީސް ނަޝީދު ހުށަހަޅުއްވާ ގަރާރާއި ގުޅޭގޮތުން ނޫސްވެރިންނަށް މައުލޫމާތުދެއްވުމަށް ބޭއްވި ބައްދަލުވުމުގައި، ރައީސް ޔާމީންއާއި އެކުގައި މަސައްކަތް ކުރެއްވުމުގެ ޝައުގުވެރިކަން ރައީސް ނަޝީދު ގެންގުޅުއްވަންތޯ "ރާއްޖެ އެމްވީ" އިން ސުވާލުކުރުމުން ރައީސް ނަޝީދު ވަނީ އެކަމަށް ވަރަށް ބޮޑަށް ޝައުގުވެރިވެ ވަޑައިގަންނަވާކަމަށް ވިދާޅުވެފައެވެ.
އޭގެ ކުރިން ރައީސް ޔާމީން ނޫސްވެރިންނާއެކު ބޭއްވެވި ބައްދަލުވުމުގައި، ރައީސް ނަޝީދްއާއި އެކުގައި މަސައްކަތް ކުރައްވަފާނަންތޯ ނޫސްވެރިން ވަނީ ރައީސް ޔާމީންއާއި ސުވާލުކޮށްފައެވެ. ޖަވާބުގައި ރައީސް ޔާމީން ވަނީ އެ ދެ ބޭފުޅުންނަކީ ސިޔާސީ ގޮތުން ޚިޔާލު ތަފާތު ދެ ބޭފުޅުންކަމަށް ވިދާޅުވެފައެވެ. އެހެންނަމަވެސް ކުރީގެ ރައީސް މައުމޫން އަބްދުލް ޤައްޔޫމްއާއި ރައީސް ނަޝީދްއާއި ވެސް އެކުގައި ފެނުނު ނޫންތޯ ރައީސް ޔާމީން ވަނީ ސުވާލު އުފައްދަވާ ވާހަކަފުޅު ދައްކަވާފައެވެ. އެހެންކަމުން އެ ދެބޭފުޅުން އެކުގައި މަސައްކަތް ކުރުރެއްވުމަކީ ވުން އެކަށީގެންވާ ކަމެއް ކަމަށް ވަނީ ބެލެވިފައެވެ.
ބަރުލަމާނީ ނިޒާމަށް ތާއީދު ކުރެއްވި ނަމަވެސް ރާއްޖޭގެ ސިޔާސީ މަސްރަހު އޮންނަ ގޮތުން ބަރުލަމާނީ ނިޒާމް އެންމެ އެކަށީގެންވާ ގޮތަށް ތަންފީޒުކުރެވިދާނެތޯ ވެސް ރައީސް ޔާމީން ވަނީ ސުވާލު އުފައްދަވާފައެވެ. އެގޮތުން މަޖިލީހަށް ހޮވޭ ޕާޓީ ނޫން އެހެން ޕާޓީތަކަށް މެމްބަރުން ބަދަލުވެ ފްލޯ ކްރޮސް ކުރުމަކީ ބަރުލަމާނީ ނިޒާމަކަށް ދިމާވާނެ ބޮޑު ގޮންޖެހުމެއް ކަމަށް ރައީސް ޔާމީން ވިދާޅުވެފައިވެއެވެ. އަދި ފައިސާވެރި ނުފޫޒު ގަދަ ފަރާތްތަކުގެ ނުފޫޒު ސިޔާސީ މީހުންނަށް ފޯރާ ނަމަ އެ ނިޒާމް ރަނގަޅަށް ނުހިނގާނެ ކަަމަށް ވެސް އެމަނިކުފާނު ވަނީ ވިދާޅުވެފައެވެ.
