ކުރީގެ ރަޢީސް އަދި ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދަށް އަމާޒުކޮށް ދިން ޓެރަރިސްޓް ޙަމަލާއާ ގުޅިގެން ގްރޭޓަރ މާލެ ސަރަޙައްދުގެ އިތުރުން، މުޅި ރާއްޖޭގެ ސެކިއުރިޓީ ވަރުގަދަކޮށް ސިފައިން ޙަރަކާތްތެރިވާން ފަށައިފިއެވެ.
އެކަމާ ގުޅޭގޮތުން އެމްއެންޑީއެފުން ކުރި ޓްވީޓެއްގައި ބުނީ، އެ ޙަމަލާއާ ގުޅިގެން ސިފައިން ހަތިޔާރާއެކު މާލެ ސަރަޙައްދުގެ ކަންކަން ބަލަމުންދާ ކަމަށެވެ. އަދި މުޅި ރާއްޖޭގައި ވެސް ސިފައިންގެ ސެކިއުރިޓީ އިތުރަށް ވަރުގަދަކޮށް، ސިފައިން ޙަރަކާތްތެރިވަމުންދާކަމަށް ބުނެފައިވެއެވެ.
ރައީސް ނަޝީދު ދިރިއުޅުއްވާ ކެނެރީގެ ކައިރީގައި އައިއީޑީއެއް ގޮއްވާލުމުގެ ހާދިސާގައި އެމަނިކުފާނުގެ ހަށިކޮޅަށް 10 ރޭޒާ ފުއް ވަދެ ހަށިގަނޑުގެ މުހިއްމު ގުނަވަންތައް ފޫއަޅުވާލާފައިވެއެވެ. އެތަކެތި ނެގުމަށް 16 ގަޑިއިރުގެ އޮޕަރޭޝަންތަކެއް ކުރިއެވެ.
ނަޝީދު އަވަހާރަކޮށްލަން އައިއީޑީ ގޮއްވާލި ހަމަލާއަށްފަހު މިހާތަނަށް ތިން މީހަކު ހައްޔަރުކޮށް، އެ މީހުންގެ ބަންދަށް 15 ދުވަސް ޖަހާފައިވެއެވެ. މި ތިން މީހުން ވެސް މިނިވަން ތަހުގީގަކަށް ފަހު އިންސާފުގެ ކުރިމަށްޗަށް ގެނެވޭނެ ކަމަށް، ރައީސް އިބްރާހީމް މުހައްމަދު ސާލިހް ވަނީ ވިދާޅުވެފައެވެ. އަދި ހަމަލާގެ ފަހަތުގައި ތިބި އެހެން މީހުން ވެސް ހޯއްދަވާނެ ކަމަށް ރައީސް ސާލިހް ވިދާޅުވިއެވެ.
މާލޭގައި ދިން ޓެރަރިސްޓް ހަމަލާގައި ރައީސް ނަޝީދުގެ އިތުރުން، އަރިހުގައި އެވަގުތު ތިބި ސިފައިންނާއި އާންމުންނަށްވެސް އެކި ވަރުގެ އަނިޔާ ލިބިފައިވެއެވެ.
