"އަނެއްދިވެހިރާއްޖެ" އަކީ އަޅުގަނޑުގެ ޓްވިޓަރ އެކައުންޓެއް: ރައީސް ނަޝީދު
13 އޮކްޓޯބަރު 2021 | ބުދަ 09:43އެ އެކައުންޓަކީ އެމަނިކުފާނު ގެންގުޅުއްވާ އެކައުންޓެއް
ރައީސް މުހައްމަދު ނަޝީދު ޖަރުމަންވިލާތުގައި
"އަނެއްދިވެހިރާއްޖެ" އަކީ އެމަނިކުފާނުގެ ޓްވިޓަރ އެކައުންޓެއްކަމަށް ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ވިދާޅުވެއްޖެއެވެ.
އެމަނިކުފާނު އެހެން ވިދާޅުވީ، ބުދަ ދުވަހު އޮތް ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބުދެއްވަމުންނެވެ. އެގޮތުން އެމަނިކުފާނު ވަނީ އެ އެކައުންޓަކީ އެމަނިކުފާނު ގެންގުޅުއްވާ އެކައުންޓެއްކަމަށް ވިދާޅުވެފައެވެ.
27.5 ހާސް މީހުން ފޮލޯކުރާ މި އެކައުންޓުގެ ނަމަކަށް ކުރިން ލިޔެފައި އޮންނަނީ "އެލެކްސް އަހުމަދު" އެވެ. އެގޮތުން ރައީސް މުހައްމަދު ނަޝީދުގެ ރަސްމީ ޓްވިޓަރ އެކައުންޓުގެ އިތުރުން އެހެން ޓްވިޓަރ އެކައުންޓެއް ގެންގުޅުއްވަންތޯ ރާއްޖެޓީވީން މީގެ ކުރިން ކުރި ސުވާލަކަށް ޖަވާބުދެއްވަމުން ރައީސް ނަޝީދު ވަނީ "ރައީސް ނަޝީދަކީ ރައީސް ނަޝީދު، އެލެކްސް އަކީ އެލެކްސް" ކަމަށް ވިދާޅުވެފައެވެ.
އޭރު އެމަނިކުފާނު ވިދާޅުވީ، އެމަނިކުފާނަކީ ހަމައެކަނި ސިޔާސީ ކަންކަން ކުރައްވާ ބޭފުޅެއް ނޫން ކަމަށާއި، ސިޔާސީ މަސައްކަތާއި ލިއުމުގެ މަސައްކަތް އެއީ ތަފާތު ކަމެއް ކަމަށެވެ. އެގޮތުން އެލެކްސް އަކީ އެމަނިކުފާނު ލިޔުއްވި ފޮތުގައި އުޅޭ "ހަސަން ކުރުސީގެ" ހަގު ކޮއްކޮ ކަމަށް ވެދާނެ ކަމަށް ވެސް ސަމާސާ ރާގެއްގައި އެމަނިކުފާނު އޭރު ވިދާޅުވެފައިވެއެވެ.
މިހާރު އެ އެކައުންޓުގެ ނަން ވަނީ "އެލެކްސް އަހުމަދު" އިން "އެމްއެން އޮފިޝަލް" އަށް ބަދަލުކޮށްފައެވެ.
ބުދަ ދުވަހު އޮތް ނޫސްވެރިންގެ ބައްދަލުވުމުގައި ވެސް ރައީސް ނަޝީދު ވަނީ ތާރީޚީ ވާހަކަތައް އެ އެކައުންޓުން ހިއްސާ ކުރައްވާކަމަށް ވިދާޅުވެފައެވެ. އަދި މިހާރު "އަނެއްދިވެހިރާއްޖެ" ނަމުގައި ވެސް އެހެން ފަރާތްތަކުން އެކައުންޓުތައް ހަދައިގެން އުޅޭކަން ރައީސް ނަޝީދު ފާހަގަކުރެއްވިއެވެ.
