ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދަށް އަމާޒުކޮށް ދިން ޓެރަރިސްޓު ހަމަލާގެ ޝަރީއަތް ފަށާނެ ދުވަހަކާއި، ޝަރީއަތް ކުރިއަށްގެންދާނެ ގޮތުގެ ތާވަލެއް އެކުލަވާލެއްވުމަށް އެމަނިކުފާނުގެ ކިބައިން އެދިވަޑައިގެންފިއެވެ.

މިދިޔަ އަހަރުގެ މެއި މަހުގެ 6 ވަނަ ދުވަހު ދިން މި ހަމަލާއަށް 1 އަހަރުވެފައިވާއިރު، ރައީސް ނަޝީދުގެ ޤާނޫނީ ވަކީލުންގެ ޓީމުން ވަނީ މި މައްސަލަ ލަސްވާތީ އެކަމުގެ ކަންބޮޑުވުން ފާޅުކޮށް ބަޔާނެއް ނެރިފައެވެ.

ރައީސް ނަޝީދުގެ ޤާނޫނީ ވަކީލުންގެ ޓީމުން ފާހަގަކުރާ ގޮތުގައި މި މައްސަލައިގެ ޝަރީއަތް ފަށާނެ ދުވަހަކާއި، ޝަރީއަތް ކުރިއަށްގެންދާނެ ގޮތުގެ ތާވަލެއް މިހާތަނަށް ހިއްސާކޮށްފައެއް ނުވެއެވެ. އެއީ ދައުލަތާއި ދިފާއުއަށްވެސް މުހިއްމު ކަމެއްކަން ވަކީލުންގެ ޓީމުން ފާހަގަކުރެއެވެ.

މީގެ އިތުރުން، އެއީ މި މައްސަލައިގައި ހެކިބަސް ދޭން ތިބި ފަރާތްތަކަށްވެސް އެންމެ ރަނގަޅު ގޮތްކަމަށް ވަކީލުން ބުނެއެވެ. އެގޮތުން ޤާނޫނުގެ ވެރިކަން ދެމެހެއްޓުމާއި، ރާއްޖެއިން ތަސްދީޤުކޮށްފައިވާ "އިންޓަރނޭޝަނަލް ކޮވެނެންޓް އޮން ސިވިލް އެންޑް ޕޮލިޓިކަލް ރައިޓްސް" ގެ މަޤްސަދުތައްވެސް ޙާސިލު ކުރުމަށް އެއީ ކޮންމެހެން މުހިއްމު ކަމެއްކަން ވަކީލުންގެ ބަޔާނުގައި ފާހަގަކޮށްފައިވެއެވެ. ސަބަބަކީ އެކަށީގެންވާ މުއްދަތެއްގައި ޝަރީއަތް ކުރިއަށްދާން ޖެހޭނެކަމަށް ބަޔާންކޮށްފައިވާތީއެވެ.

ވަކީލުންގެ ބަޔާނުގައި ބުނެފައިވާ ގޮތުގައި ރައީސް ނަޝީދު ގެންދަވަނީ މި މައްސަލަ ކުރިއަށް ގެންދިޔުމަށް އެއްބާރުލުން ދެއްވަމުންނެވެ. އަދި އެމަނިކުފާނަކީ ޓެރަރިޒަމާއި ދެކޮޅު ބޭފުޅެއްކަމަށްވެސް ބުނެފައިވެއެވެ.

މީގެ އިތުރުން، މި މުޅި މައްސަލައިގެ ސީރިއަސްކަން ކޯޓުތަކުންނާއި، ދައުވާކުރާ ފަރާތްތަކުންވެސް ބަލައިގަނެ، މި މައްސަލައިގެ ޝަރީއަތް ފެށޭނެ ދުވަހެއް އެންގުމަށް ރައީސް ނަޝީދުގެ ފަރާތުން އެދިވަޑައިގަންނަވައެވެ. އަދި މައްސަލައިގައި ދެން ހިމެނޭ ފަރާތްތަކަށް ދައުވާ އުފުލުން ފަދަ ކަންކަން ކުރިއަށް ގެންދަންޖެހޭކަމަށް ރައީސް ނަޝީދާއި ހަވާލަދީ އެމަނިކުފާނުގެ ވަކީލުންގެ ޓީމުން ބުނެއެވެ.

މެއި 6ގެ ހަމަލާގައި ހިމެނޭ ބައެއް މީހުންގެ މައްޗަށް ދައުވާ އުފުލައި މިހާރު ޝަރީއަތް ކުރިއަށް ދެއެވެ. އެގޮތުން މި މައްސަލައިގެ އެންމެ ފަހުންއަޑުއެހުމެއްބާއްވާފައިވަނީ 28 މާރޗު 2022 ގައެވެ. އެ ދުވަހުގެ އަޑުއެހުމުގައި ވަނީ މެއި 6ގެ ހަމަލާގެ ދައުވާތައް މަދަނީ މިންގަނޑުން ކުރިއަށް ގެންދެވޭނެކަމަށް ކަނޑައަޅާފައެވެ.