ނަޝީދުގެ ހާލު ރަނގަޅު، މަސައްކަތުގެ ޕްލޭންތައް ހައްދަވަނީ!
10 މެއި 2021 | ހޯމަ 06:19މިހާރުން ފެށިގެން މަސައްކަތުގެ ޕްލޭންތައް ހައްދަވަމުން ގެންދަވާ ކަމަށް ވިދާޅުވި
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު
ކުރީގެ ރައީސް އަދި ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދަށް އަމާޒުކޮށް ދީފައިވާ ޙަމަލާއާ ގުޅިގެން އެމަނިކުފާނު އޭޑީކޭ ހޮސްޕިޓަލުގައި ފަރުވާ ހޯއްދަވަމުންދާއިރު އެމަނިކުފާނުގެ ހާލު ރަނގަޅުވަމުން އަންނަ ކަަމަށް އާއިލާ އިން ބުނެފިއެވެ.
ރައީސް ނަޝީދުގެ އާއިލާގެ މެމްބަރަކު ހޯމަ ދުވަހު ކުރެއްވި ޓުވީޓެއްގައި ވިދާޅުވީ ނަޝީދާ ވާހަކަފުޅު ދައްކަވާފައިވާ ކަމަށާއި ލިބުނު ޒަޚަމްތައް ރަނގަޅުވެ، ހާލުކޮޅު ވެސް ރަނގަޅުވަމުން އަންނަ ކަމަށެވެ. އަދި އެމަނިކުފާނު މިހާރުން ފެށިގެން މަސައްކަތުގެ ޕްލޭންތައް ހައްދަވަމުން ގެންދަވާ ކަމަށެވެ. މި ޓުވީޓުގައި މަޖިލީހުގެ ނައިބު ރައީސް އީވާ އަބްދުﷲ ޓެގް ކުރައްވާ، ވިދާޅުވެފައިވަނީ ރައީސް ނަޝީދު ވަރަށް ގިނަ ރައްޔިތުންނަށް ވަރަށް ގިނަ މަސައްކަތްތައް ކޮށްދެއްވަން ބޭނުންފުޅު ވެވަޑައިގަންނަވާ ކަމަށެވެ.
އާއިލާގެ ފަރާތުން މިހެން ބުނެފައިވާއިރު ރައީސް ނަޝީދު އިތުރު ފަރުވާއަށް ރާއްޖެއިން ބޭރަށް ގެންދިއުމަށް މަސައްކަތް ކުރަމުންދާ ކަަމަށް އާއިލާއިން ވަނީ މީގެ ކުރިން ބުނެފައެވެ. ރައީސް ނަޝީދު އިތުރު ފަރުވާއަށް ރާއްޖެއިން ބޭރަށް ގެންދިޔުމަށް މަސައްކަތް ކުރަމުންދަނީ ޖަރުމަންވިލާތަށް ކަމަށާއި އެހެންނަމަވެސް އަދި ފަރުވާ ދިނުމަށް ގެންދާނެ ސީދާ ވަކި ގައުމެއް ކަނޑަނާޅާ ކަމަށް އާއިލާ އިން ވަނީ ބުނެފައެވެ.
ރައީސް ނަޝީދަށް ލިބިފައިވާ އަނިޔާތަކަށް ބަލާއިރު، ރައީސް ނަޝީދުގެ މޭކަށިގަނޑުގެ އެންމެ ތިރިއަށް ރޭޒަރ ފުކެއް ވަދެފައިވާ ކަމަށާއި އެންމެ ސެންޓިމީޓަރެއް ތިރިން ދިޔަނަމަވެސް މެއަށް އަރައި ފުރާނައަށް ގެއްލުންވީސް ކަމަށް އޭޑީކޭއިން ވަނީ ހާމަކޮށްފައެވެ. ރައީސް ނަޝީދަށް ފަރުވާ ދިން އޭޑީކޭ ހޮސްޕިޓަލުގެ ޑޮކްޓަރުންގެ ޓީމުން ހޮނިހިރު ދުވަހު ބޭއްވި ނޫސްވެރިންގެ ބައްދަލުވުމުގައި ޑޮކްޓަރުން ވިދާޅުވީ ސީޓީ ސްކޭނަށް އެންމެ ފަސޭހައިން ފާހަގަކުރެވުނީ މައުދަނުގެ އެތިކޮޅުތައް ކަމަށާއި ނަޝީދުގެ ހަށިކޮޅުގެ ތެރޭގައި އެކި ކަހަލަ ވަރަށް ގިނަ އެތިކޮޅުތައް ހުރި ކަމަށެވެ.
ޑޮކްޓަރުން ވިދާޅުވީ ރޭޒާފުކެއްގެ އެތިކޮޅެއް ފުއްޕާމެއިން ނަގަން ޖެހުނު ކަމަށާއި އެ އެތިކޮޅު ވަދެގެން ދިޔައިރު ހިތަށް އަމާޒުނުވެ ސަލާމަތްވީ ކަށިގަނޑެއްގައި ޖެހި ފުނޑިގެން ދިއުމުން ކަމަށެވެ. އަދި ބަނޑާއި ގޮހޮރުގެ އެކި ތަންތަން ވެސް ފޫއަޅުވާފައި އެތިކޮޅުތައް ހަށިގަނޑުގެ ތެރެއަށް ވަދެފައިވާ ކަމަށާއި ފުރަމޭގެ ތެރެއަށް ވެސް އެތިކޮޅެއް ވަދެފައިވާ ކަމަށެވެ. ހަށިގަނޑުގެ އެހިސާބުތަކުގައި ގާތްގަނޑަކަށް 7 ޒަޚަމެއް ހުރި ކަމަށް ވެސް ޑޮކްޓަރުން ވިދާޅުވިއެވެ.
