ކައިރި މުސްތަގުބަލެއްގައި އަޝްފާގަށް ކުޅެވޭނެކަމަށް ލަފައެއް ނުކުރެވޭ: އިންމަ

މިވަގުތު އިންޖަރީގައި ހުރި، އަލީ އަޝްފާގަށް ކައިރި މުސްތަގުބަލެއްގައި ކުޅެވޭނެކަމަށް ލަފާ ނުކުރެވޭ ކަމަށް ސުޕަ ޔުނައިޓެޑް ސްޕޯޓްސް (ސަސް)ގެ ކޯޗު އިސްމާއީލް މަހްފޫޒް (އިންމަ) ބުނެފިއެވެ.

ސަސް އާއި ވެލެންސިއާ ބައްދަލުކުރާ މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި އަޝްފާގުގެ އިންޖަރީ އާ ގުޅޭގޮތުން ސުވާލުކުރުމުން އިންމަ ބުނީ އަދި ރިކަވާ ނުވާކަމަށެވެ. ރާއްޖޭގައި އުފެދުނު އެންމެ މޮޅު އެއް ފުޓުބޯޅަ ކުޅުންތެރިޔާގެ މެނިސްކަސް އޭސީއެލް ވަނީ ޑެމޭޖްވެފައެވެ. އިންމަ ބުނީ، އަޝްފާގުގެ ރިކަވަރީއަށް ވަގުތު ނަގާނެ ކަމަށާއި، ރިހެބިލިޓޭޝަން ޕްރޮސެސް އާއި ސްޓްރެންތެނިންގ ޕްރޮގްރާމް ހިންގާފަ ނޫނީ ދަނޑަށް ނުކުމެވޭވަރު ނުވާނެ ކަމަށެވެ. މީގެއިތުރުން އޭނާ ބުނީ، އުމުރުގެ ގޮތުން އެފަދަ އިންޖަރީތަކަށް ވަރަށް ބޮޑަށް ވިސްނަން ޖެހޭނެކަމަށާއި، ރަނގަޅަށް ރިކަވާ ވެގެން އަދިވެސް ދިވެހި ޕްރިމިއަރ ލީގުގެ ލެވެލްގައި ކުޅެވޭނެ ކަމަށެވެ.

އަޝްފާގް ވަނީ އެންމެ ފަހުން ބޭއްވި ޕްރެޒިޑެންޓްސް ކަޕުގައި ސަސްއަށް ކުޅެފައެވެ. ދެ މެޗުން ލަނޑު ޖަހާ، އޭނާ ވަނީ ޓީމުގައި މުހިންމު ދައުރެއް އަދާކޮށްފައެވެ. އިންމަ ގަބޫލުކުރާ ގޮތުގައި އަޝްފާގުގެ ލީޑަރޝިޕް ޓީމަށް މުހިންމެވެ. އަދި އޭނާ ޓީމުގައި ހުރުމުން ޓިމުގެ މޯޓިވޭޝަން ރަނގަޅުވާކަމަށް ދެކެއެވެ. މި ސަބަބުތަކަށްޓަކައި، އަޝްފާގު ޓީމުގައި ބެހެއްޓުން މުހިންމު ކަމަށް އިންމަ ބުންޏެވެ. އޭނާ އިތުރަށް ބުނީ، ސީޒަނުގެ ވަކިހިސާބަކުން އަޝްފާގު ފެންނާނެކަމަށް އުއްމީދުކުރާ ކަމަށެވެ. ނަމަވެސް އެކަމުގެ އެއްވެސް ޔަގީންކަމެއް ދެވެން ނެތްކަމަށެވެ.

މެޗާ ގުޅޭގޮތުން ވާހަކަ ދައްކަމުން އިންމަ ބުނީ ކުލަބު މޯލްޑިވްސް ކުރިޔަށް ދާތީ ކޮންމެވެސް ވަރަކަށް ދަތިތަކާ ކުތިމަތިލާން ޖެހޭ ކަމަށެވެ. އެހެންނަމަވެސް، އެކަންކަން މެނޭޖްކޮށް މެޗަށް ރަނގަޅު ޓީމެއް ނެރެ ރަނގަޅު ނަތީޖާއެއް ނެރުމަށް މަސައްކަތް ކުރާނެކަމަށް އިންމަ ބުންޏެވެ. މީގެއިތުރުން އޭނާ ވަނީ ޓީމުގެ އެޓޭކިން ކުޅުންތެރިންގެ ކުޅުމަށް ތައުރީފްކޮށް ވާހަކަދައްކާފައެވެ. އޭނާ އިތުރަށް ބުނީ، އިދިކޮޅު ޓީމު ތާވަލުގައި އޮތް ހިސާބަކަށް ނުވިސްނާ، އަބަދުވެސް ވިސްނަނީ އަމިއްލަ ޓީމުގެ ގޭމް އެންމެ ރަނގަޅަށް ޖެއްސުމަށް ކަމަށެވެ.

ސަސް އާއި ވެލެންސިއާ ބައްދަލުކުރާ މެޗު ކުޅުމަށް ހަމަޖެހިފައިވަނީ މިރޭ 21:00 ގައެވެ. ބްރޭކަށްފަހު ކުޅުނު ފުރަތަމަ މެޗުން ދެ ޓީމުވެސް ވަނީ ބަލިވެފައެވެ.