ދިވެހި ޕްރިމިއާ ލީގުގައި ބުރު ސްޕޯޓްސް ކުލަބާ ދެކޮޅަށް ކުޅުނު މެޗުން އެންމެ ފަހުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަން މޮޅުވެއްޖެ އެވެ.

ލީގުގައި އަންގާރަ ދުވަހުގެ ރޭ ގަލޮޅު ރަސްމީ ދަނޑުގައި ކުޅުނު މެޗު މާޒިޔާ އިންް ކާމިޔާބު ކުރީ 6-0 އިންނެވެ. މެޗުގެ ފުރަތަމަ ހާފުގައި މާޒިޔާ އިން ވަނީ ތިން ލަނޑު ޖަހައިފަ އެވެ. އެ ޓީމުގެ އަނެއް ތިން ލަނޑު ޖެހީ ދެ ވަނަ ހާފުގަ އެވެ.

މެޗު ފަށައިގެން ހަ ވަނަ މިނެޓުގައި މާޒިޔާ އަށް ލީޑު ނަގައިދިނީ ޙަމްޒާ މުޙައްމަދު (ޙަމްޕު) އެވެ. އެއީ މާޒިޔާ އަށް ލިބުނު ޕެނަލްޓީއެއް ކާމިޔާބުކޮށް، ހަމްޕު ޖަހައިދިން ލަނޑެކެވެ. އެ ޓީމުގެ ދެ ވަނަ ލަނޑު 25 ވަނަ މިނެޓުގައި ޖެހީ ބިދޭސީ ކުޅުންތެރިޔާ ސާބިއާގެ ފޯވާޑް ވޮޖިސްލާވް ބަލަބަނޮވިޗް އެވެ. ފުރަތަމަ ހާފު ނިމުމުގެ ކުރިން މާޒިޔާގެ ތިން ވަނަ ލަނޑު ޖެހީ ބިދޭސީ ކުޅުންތެރިޔާ ޓޮމޯކީ ވާޑާ އެވެ. މެޗުގެ ދެ ވަނަ ހާފުގައި ވަނީ ދަނޑުގެ ލައިޓުތައް ނިވިފަ އެވެ. އެއާއެކު މެޗު ވަގުތު ކޮޅަކަށް މެދު ކަނޑާލަން ވެސް ޖެހުނެވެ. މެޗުގެ ބާކީ ބައި ކުރިއަށް ގެންދިޔައީ ލައިޓަށް ދިމާވި މައްސަލަ ޙައްލު ކުރުމަށްފަހު އެވެ. މާޒިޔާގެ ހަތަރު ވަނަ ލަނޑު 51 ވަނަ މިނެޓުގައި ޖެހީ ބަލަބަނޮވިޗް އެވެ. އޭގެ މިނެޓެއް ފަހުން އެ ޓީމުގެ ފަސް ވަނަަ ލަނޑު ކެހީ ނާއިޒް ޙަސަން (ދާދު) އެވެ. މާޒިޔާގެ ހަ ވަނަ ލަނޑު، 64 ވަނަ މިނެޓުގައ ޖަހާ ބަލަބަނޮވިޗް ވަނީ އޭނާގެ ހެޓްރިކް ހަމަކޮށްފަ އެވެ.

މޮޅާއެކު މާޒިޔާ އޮތީ ލީގު ތާވަލްގެ ދެ ވަނައިގަ އެވެ. އެއީ މިހާތަނަށް ކުޅުނު 12 މެޗުން 34 ޕޮއިންޓާއެކު އެވެ. މާޒިޔާ އަށް ވުރެ އެއް މެޗު އިތުރަށް ކުޅެގެން އެއް ވަނައިގައި ކުލަބު އީގަލްސް އޮތީ 35 ޕޮއިންޓާއެކު އެވެ.