ވާދަވެރި ކަމެއް ނެތް، މާޒިޔާ އަށް 11 ލަނޑުގެ މޮޅެއް
ލީގުގައި މިހާތަނަށް ކުޅުނު 10 މެޗުން 25 ޕޮއިންޓާއެކު މާޒިޔާ އޮތީ ދެ ވަނައިގައި
މާޒިޔާ އަދި ޔޫވީ ކުޅުނު މެޗުގެ ތެރެއިން
ދިވެހި ޕްރިމިއާ ލީގުގައި ޔުނައިޓެޑު ވިކްޓަރީ (ޔޫވީ)އާ ދެކޮޅަށް ކުޅުނު މެޗުން އެންމެ ފަހުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަނަށް ބޮޑު މޮޅެއް ލިބިއްޖެ އެވެ.
ލީގުގައި އާދީއްތަ ދުވަހުގެ ރޭ ގަލޮޅު ރަސްމީ ދަނޑުގައި ކުޅުނު މެޗު މާޒިޔާ އިން ކާމިޔާބު ކުރީ 11-0 އިންނެވެ. މެޗު ފަށައިގެން 18 ވަނަ މިނެޓުގައި މާޒިޔާ އަށް ލީޑު ނަގައިދިނީ ބިދޭސީ ކުޅުންތެރިޔާ ޓޮމާކީ ވާޑާ އެވެ. އޭގެ ފަހުން 33 ވަނަ މިނެޓުގައި އެ ޓީމުގެ ދެ ވަނަ ލަނޑު ޖެހީ ބިދޭސީ ކުޅުންތެރިޔާ ބަލަބަނޮވިޗް އެވެ. މެޗުގައި އޭނާ ވަނީ އިތުރު ދެ ލަނޑު ޖަހައި، ހެޓްރިކް ހަމަކޮށްފަ އެވެ. އެއީ 38 ވަނަ މިނެޓާއި، 44 ވަނަ މިނެޓުގަ އެވެ. މީގެ އިތުރުން މާޒިޔާގެ ލަނޑުތައް ޖެހީ ޙަސަން ރާއިފް އަޙުމަދު، ނާއިޒް ޙަސަން އަދި ޙަމްޒާ މުޙައްމަދު (ހަމްޕު) އެވެ. މެޗުގައި ހަމްޕު ވަނީ ހަތަރު ލަނޑު ޖަހައިފަ އެވެ. މެޗުގައި ޔޫވީގެ އިބްރާހީމް ފައިރޫޝް އަތުން ބައި ކޮޅަށް ވެސް ވަނީ ލަނޑެއް ވަދެފަ އެވެ.
މާޒިޔާ އަކީ މިއަހަރުގެ ފުޓުބޯޅަ ސީޒަނަށް އެންމެ ދުރާލާ ތައްޔާރުވި ޓީމެވެ. އެ ޓީމުން ވަނީ ބިދޭސީ ގިނަ ކުޅުންތެރިންގެ އިތުރުން، އެހެން ކުލަބުތަކުގައި ވެސް ތިބި ރަނގަޅު ކުޅުންތެރިން ގެނެސްފަ އެވެ. ލީގުގައި މިހާތަނަށް ކުޅުނު 10 މެޗުން 25 ޕޮއިންޓާއެކު މާޒިޔާ އޮތީ ދެ ވަނައިގަ އެވެ. މާޒިޔާ އަށް ވުރެ އެއް މެޗު އިތުރަށް ކުޅެގެން އެއް ވަނައިގައި އީގަލްސް އަށް ލިބެނީ 29 ޕޮއިންޓެވެ.
