ދިވެހި ޕްރިމިއާ ލީގުގައި ޓީސީ ސްޕޯޓްސް ކުލަބާ ދެކޮޅަށް ކުޅުނު މެޗުން މޮޅުވެ، ކުލަބު އީގަލްސް އެއް ވަނައިގައި ދެމި އޮވެއްޖެ އެވެ.

އާދީއްތަ ދުވަހުގެ ހަވީރު ގަލޮޅު ރަސްމީ ދަނޑުގައި ކުޅުނު މެޗު އީގަލްސް އިން ކާމިޔާބު ކުރީ 2-1 އިންނެވެ. މެޗުގައި ފުރަތަމަ ލަނޑު ޖަހައި ކުރި ހޯދީ ވެސް އީގަލްސް އިންނެވެ. މެޗުގެ 39 ވަނަ މިނެޓުގައި އެ ޓީމަށް ލީޑު ނަގައިދިނީ އިބްރާހީމް މަހުދީ ޙުސެއިން (ފޭދޫ އިއްބެ) ނެވެ. ދެ ވަނަ ހާފަށް ނިކުމެ ޓީސީން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. ދެ ވަނަ ހާފު ފަށައިގެން އަށް ވަނަ މިނެޓުގައި އެ ޓީމަށް ނަތީޖާ ހަމަހަމަ ކޮށްދިނީ ޒަޔާން ނަސީރު އެވެ. ނަމަވެސް، އޭގެ ފަހުން މެޗުގެ 67 ވަނަ މިނެޓުގައި އީގަލްސް އިން ވަނީ ދެ ވަނަ ލަނޑެެއް ޖަހައި މެޗުން ތިން ޕޮއިންޓު ހޯދައިފަ އެވެ. އެ ލަނޑު އެ ޓީމަށް ޖަހައިދިނީ ކެޕްޓަން އަޙުމަދު ރިޒުވާން (ރިޒޭ) އެވެ.

މޮޅާއެކު އީގަލްސް އިން ވަނީ ކުޅުނު 11 މެޗުން 29 ޕޮއިންޓު ހޯދައިފަ އެވެ. އެ ޓީމުގެ ފަހަތުން ދެ ވަނައިގައި އޮތީ އެންމެ ފަހުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަން އެވެ.