ޔޫވީ މެޗުން ވެސް އީގަލްސް ބޭނުންވަނީ ތިން ޕޮއިންޓު

ދިވެހި ޕްރިމިއާ ލީގުގައި ޔުނައިޓެޑު ވިކްޓަރީ (ޔޫވީ)އާ ދެކޮޅަށް ނުކުންނަ މެޗުން ވެސް ކުލަބު އީގަލްސް ބޭނުންވަނީ ތިން ޕޮއިންޓު ކަމަށް އެ ކުލަބުގެ މެނޭޖަރު މުޙައްމަދު އިނާން އަލީ ބުނެފި އެވެ.

ބުދަ ދުވަހުގެ ހަވީރު ޔޫވީއާ ދެކޮޅަށް ނުކުންނަ މެޗުގެ ކުރިން އޮތް ޕްރެސް ކޮންފަރެންސްގައި ވާހަކަ ދައްކަމުން އިނާން ބުނީ، ކޮންމެ މެޗަކަށް ވެސް އެ ޓީމު ނުކުންނަނީ މޮޅުވާން ބޭނުންވާތީ، އެކަމަށް އަޒުމު ކަނޑައަޅައިގެން ކަމަށެވެ. އެެހެންކަމުން އެ ޓީމުގެ ކޯޗު ފަރިތަކުރުންތައް ވެސް ބިނާ ކުރަނީ މެޗުން ތިން ޕޮއިންޓަށް އަމާޒުކޮށްގެން ކަމުގައި އޭނާ ވަނީ ފާހަގަކޮށްފަަ އެވެ. ހަމައެއާއެކު ޔޫވީ މެޗަށް މުޅި އީގަލްސް އޮތީ ފުރިހަމަ އަށް ތައްޔާރުވެފައި ކަމަށް ވެސް އޭނާ ވަނީ ބުނެފަ އެވެ.

މީގެ އިތުރުން އޭނާ ބުނީ އީގަލްސް އިން މަސައްކަތް ކުރަނީ މެޗަކަށްފަހު މެޗެއް ރަނގަޅު ކުރަން ކަމަށާއި، އެހެންކަމުން ބައި ކޮޅަށް ވަންނަ ލަނޑު މަދުކުރުމަށް ކޯޗު ކުޅުންތެރިންނަށް އިރުޝާދު ދެމުން އަންނަ ކަމަށެވެ. އެކަމަށް މަސައްކަތް ކުރުމުގެ ގޮތުން ކުރިއަށް އޮތް ޓްރާންސްފާގައި އީގަލްސް އިން ޑިފެންސް އިތުރަށް ރަނގަޅު ކުރުމަށް ކުރަން ޖެހޭ ކަންކަން ކުރާނެ ކަމަށެވެ. އޭގެ ތެރޭގައި ދިވެހި ކުޅުންތެރިން ހޯދަން ޖެހިއްޖެ ނަމަ، އެކަމަށް ވެސް ވަރަށް ބޮޑަށް މަސައްކަތް ކުރާނެ ކަމަށް އިނާން ވަނީ ފާހަގަކޮށްފަ އެވެ.

އީގަލްސްގެ ޑިފެންސަަށް ކުޅޭ ތިން ކުޅުންތެރިޔަކު މިދިޔަ ދެ އަހަރުގެ ތެރޭގައި ޓީމު ދޫކޮށް ގޮސްފައިވާކަން ފާހަގަކޮށް އޭނާ ބުނީ، ގިނަ ދުވަހު އެއްކޮށް ކުޅެފައި ތިބި ކުޅުންތެރިންގެ ތެރެއިން ދެ ކުޅުންތެރިން ނުވަތަ ތިން ކުޅުންތެރިން އެގޮތަށް ދިޔުމަކީ ޓީމަށް ކުރިމަތިވާނެ ވަރަށް ބޮޑު އުނދަގުލެއް ކަމަށެވެ.

ބްރޭކަށްފަހު ލީގުގައި ކުޅުނު ފުރަތަމަ މެޗުގައި އީގަލްސް އިން ވަނީ ސުޕަ ޔުނައިޓެޑު ސްޕޯޓްސް (ސަސް) އަތުން ބޮޑު މޮޅެއް ހޯދައިފަ އެވެ.