ކުޅިވަރުގެ ޚިދުމަތްތެރިޔާ ޙަސަން އަލީ ނިޔާވެއްޖެ
7 ފެބުރުއަރީ 2026 | ހޮނިހިރު 05:21ޙަސަން އަލީ އަކީ ރާއްޖޭގެ މަޝްހޫރު ދެ ކޯޗުން ކަމަށްވާ އަލީ ސުޒޭން އާއި، މުޙައްމަދު ނަޒީހުގެ ބައްޕަ. މީގެ އިތުރުން މަޝްހޫރު ގޯލް ކީޕަރު ޓްރެއިނަރު އަޙުމަދު ރިޔާޒް އާއި، އިބްރާހީމް ޝިނާޒް އަކީ ވެސް ޙަސަން އަލީގެ ދަރިން.
ޙަސަން އަލީ އާއި، އޭނާގެ ދެ ދަރިން ކަމަށްވާ ސުޒޭން އަދި ނަޒީހު | ނިޝާން އަލީ / މިހާރު
ދިވެހި ރާއްޖޭގެ ކުޅިވަރަށް އެކި އެކި ޚިދުމަތްތައް ކޮށްދެއްވާފައިވާ، ޙަސަން އަލީ ނިޔާވެއްޖެ އެވެ.
އުމުރުން 78 އަހަރުގައި ޙަސަން އަލީ ނިޔާވެފައި ވަނީ ހުކުރު ދުވަހުގެ ރޭގެ ވަގުތެއްގަ އެވެ. ޙަސަން އަލީގެ ޖަނާޒާ ހޮނިހިރު ދުވަހުގެ މެންދުރު ނަމާދަށް ފަހު، އާސަހަރާ މިސްކިތުގައި އޮންނާނެ އެވެ.
ޙަސަން އަލީ އަކީ ރާއްޖޭގެ ކުޅިވަރަށް އެކި އެކި ޚިދުމަތްތައް ކޮށްދެއްވާފައިވާ ބޭފުޅެކެވެ. އެގޮތުން ޙަސަން އަލީ އަކީ ކުލަބު އީގަލަސް އުފެއްދެެވުމުގައި އިސްކޮށް ހުންނެވި، އެ ކުލަބުގެ މަސްއޫލުވެރިޔެކެވެ. މީގެ އިތުރުން ޙަސަން އަލީ އަކީ އެކި އެކި ކުޅިވަރު ތަކުން ޒުވާނުން ބާރުވެރިކޮށް، ޒުވާނުންނަށް ފުރުސަތު ހޯދައި ދިނުމަށް އެތައް މަސައްކަތް ތަކެއް ކުރެއްވި ބޭފުޅެކެވެ.
ޙަސަން އަލީ އަކީ ރާއްޖޭގެ މަޝްހޫރު ދެ ކޯޗުން ކަމަށްވާ އަލީ ސުޒޭން އާއި، މުޙައްމަދު ނަޒީހުގެ ބައްޕަ އެވެ. މީގެ އިތުރުން މަޝްހޫރު ގޯލް ކީޕަރު ޓްރެއިނަރު އަޙުމަދު ރިޔާޒް އާއި، އިބްރާހީމް ޝިނާޒް އަކީ ވެސް ޙަސަން އަލީގެ ދަރިންނެވެ.
ކުޅިވަރުގެ ބޮޑު ޚިދުމަތްތެރިޔެއްގެ ގޮތުގައި ފާހަގަކޮށްލެވޭ ޙަސަން އަލީ ނިޔާާވުމާ ގުޅިގެން، އެތައް ބަޔަކު އަންނަނީ އެ އާއިލާ އަށް ތައުޒިޔާ ފޮނުވަމުންނެވެ.
