ފަހަތުން އަރާ ރާއްޖެއިން ބަންގްލަދޭޝް ބަލިކޮށްފި

ނޭޕާލުގެ ކަތަމަންޑޫގައި މިހާރު ކުރިއަށްދާ ސެންޓްރަލް އޭޝިއަން ވޮލީބޯޅަ އެސޯސިއޭޝަން (ކާވާ) ޗެލެންޖް ކަޕްގެ ރޭންކިންގެ ފަހު މެޗުގައި ފަހަތުން އަރާ ރާއްޖެއިން ބަންގްލަދޭޝް ބަލިކޮށްފިއެވެ.

މެޗަށް ނިކުތްއިރު ރާއްޖެ އާއި ބަންގްލަދޭޝް ވެސް ވަނީ ކުރިން ކުޅުނު ހަތަރު މެޗުން ވެސް ބަލިވެފަ އެވެ. އަށް ޓީމު ވާދަކުރާ މުބާރާތުގެ ހަތް ވަނަ ލިބެނީ މި މެޗުން މޮޅުވާ ޓީމަކަށެވެ. ނޭޕާލުގެ ނެޝަނަލް ސްޕޯޓްސް ކޮމްޕްލެކްސްގެ ވޮލީ ކޯޓުގައި ހޮނިހިރު ދުވަހު ކުޅުނު މެޗު ފަށައިގެން ފުރަތަމަ ސެޓުގައި ލީޑު ކުރަމުން ދިޔައީ ބަންގްލަދޭޝް އެވެ. ނަމަވެސް ރާއްޖެ އިން ވަނީ މަޑު މަޑުން ކުޅުމުގެ ތެރެއަށް ވަދެ ޕޮއިންޓުގެ ފަރަގު ކުޑަކޮށްފަ އެވެ. ބަންގްލަދޭޝް އިން ފަސް ޕޮއިންޓުގެ ލީޑު ނަގައިގެން ކުޅުނު ނަމަވެސް، ރާއްޖެ އިން ދެ ޕޮއިންޓަށް ފަރަގު ކުޑަކުރި އެވެ. ސެޓުގެ ފަހު ވަގުތު ބަންގްލަދޭޝް އިން ކުރި ހޯދީ މުހިންމު ވަގުތެއްގައި ރާއްޖެ އިން ސާވިސް ތަކެއް ގެއްލުވާލައި، ރިސީވް ކުރުމުގެ ގޯސްތަކެއް ހަދައިގެންނެވެ. ފުރަތަމަ ސެޓު ބަންގްލަދޭޝް އިން ކާމިޔާބު ކުރީ 25-21 އިންނެވެ.

ފުރަތަމަ ސެޓާ ޚިލާފަށް ދެ ވަނަ ސެޓުގައި ރާއްޖެ އިން ފެށީ ރަނގަޅަށެވެ. ސެޓު ފަށައިގެން ރާއްޖެ އިން ލީޑު ކުރަމުން ދަނިކޮށް، ބަންގްލަދޭޝް އިން އެއްވަރު ކުރި އެވެ. ނަމަވެސް އަލުން ރާއްޖެ އިން ވަނީ ސެޓުގައި ލީޑު ހޯދައިފަ އެވެ. އަދި ރާއްޖެ އިން ވަނީ ހޯދި ލީޑު ހަތް ޕޮއިންޓަށް ފުޅާ ކޮށްފަ އެވެ. އެއީ ރާއްޖޭގެ އެޓޭކަރު ޙައްވާ ރާޝިދާ (ޙައްވަ) އަދި އައިމިނަތު ޝަހާ ޝާމިންގެ ހަމަލާތަކުންނެވެ. އަނެއްކޮޅުން މި ސެޓުގައި ރާއްޖޭގެ ފާތިމަތު ޖޫޒާން ޒަރީރު އާއި ނަރީމާ އިދުރީސް (ނަންނި)ގެ މޮޅު ބްލޮކު ވެސް ވަނީ ފެނިފަ އެވެ. މި ސެޓުގައި ރާއްޖެ އިން ލީޑު ނެގި ފަހުން ކުޅުންތެރިން ވަނީ ރަނގަޅު ކުޅުމެއް ދައްކައިފަ އެވެ. އެ ލީޑުގައި އޮވެ ރާއްޖެ އިން ދެ ވަނަ ސެޓު ކާމިޔާބު ކުރީ 14-25 އިންނެވެ.

އެ ރޫހުގައި ނިކުމެ ރާއްޖެ އިން ތިން ވަނަ ސެޓުގެ ފެށުން ވެސް ރަނގަޅު ކުރި އެވެ. ސެޓު ފަށައިގެން މެދާ ހަމަ އަށް ދިޔަ އިރު ރާއްޖެ އިން ވަނީ އަށް ޕޮއިންޓުގެ ލީޑެއް ނަގައިފަ އެވެ. ބޮޑު ލީޑެއްގައި އޮވެ ރާއްޖެ އިން ކުޅެމުން ދިޔަ ނަމަވެސް، ސެޓުގެ ފަހު ވަގުތާ ހަމަ އަށް ދިޔައިރު، ބަންގްލަދޭޝް އިން ވަނީ ފަރަގު ދެ ޕޮއިންޓަށް ކުޑަކޮށްފަ އެވެ. އެއާއެކު ރާއްޖެ އިން ވަނީ ޓައިމް އައުޓެއް ނަގައިފަ އެވެ. ޓައިމް އައުޓަށްފަހު ރާއްޖޭގެ ޙައްވަ ބެކް ކޯޓުން ފޮނުވާލި ހަމަލާ ބޭރަށް ދިޔުމުން ފަރަގު އެއް ޕޮއިންޓަށް ކުޑަވި އެވެ. 22-23 ގައި ނަތީޖާ އޮއްވާ ރާއްޖެ އަށް ގޭމް ޕޮއިންޓު ހޯދައިދިނީ ޝަހާ އެވެ. މި ސެޓުގައި ރާއްޖެއިން މަސައްކަތް ކުރި ބޯޅައެއް ބިމުގައި ޖެހުނު ކަމަށް ފަސްޓް ރެފްރީ ނިންމުމުން ކުޅުންތެރިން ވަނީ ވަރަށް ބޮޑަށް ނުރުހުން ފާޅުކޮށްފަ އެވެ. އެ ޕޮއިންޓު ބަންގްލަދޭޝް އަށް ދިނުމަށް ރެފްރީ ނިންމުމުން ނަތީޖާ 23-24 އަށް ބަދަލުވި އެވެ. ރާއްޖެ އިން ތިން ވަނަ ސެޓު 23-25 އިން ކާމިޔާބު ކުރީ ޝަހާ ފޮނުވާލި ހަމަލާއެއް ބަންގްލަދޭޝް ބްލޮކަރުގެ އަތުގައި ޖެހި ބޭރަށް ދިޔުމުންނެވެ.

ތިން ވަނަ ސެޓުގެ ވާދަވެރި ކުޅުމަށްފަހު ހަތަރު ވަނަ ސެޓު ފަށައިގެން ވެސް ރާއްޖެ އިން ދިޔައީ ލީޑުގައި އޮވެ ކުޅެމުންނެވެ. ބަންގްލަދޭޝް އިން ސެޓުގެ ފުރަތަމަ ޓައިމް އައުޓް ނެގިއިރު ރާއްޖެ އިން ދިޔައީ 3-10 އިން ލީޑު ކުރަމުންނެވެ. މި ސެޓުގައި ބަންގްލަދޭޝް އަށް ރާއްޖެ ކައިރީގައި އެއްވެސް ކަމެއް ކުރެވޭ ގޮތެއް ނުވި އެވެ. ރަނގަޅު ރޫޙުގައި އޮވެ ރާއްޖެ އިން މި ސެޓުގައި ދިޔައީ 4-18 އިން ލީޑު ކުރަމުންނެވެ. މި ސެޓުގައި ބަންގްލަދޭޝް އަށް ގިނައިން ޕޮއިންޓު ލިބިފައި ވަނީ ރާއްޖޭގެ ކުޅުންތެރިންނަށް ރިސީވް އަދި ޑިފެންސްގައި ހެދުނު ގޯސްތަކުންނެވެ. މި ސެޓުގައި ބަންގްލަދޭޝް އިން ޕޮއިންޓު ތަކެއް ހޯދި ނަމަވެސް ރާއްޖެ އިން ލީޑު ހިފަހައްޓައި ސެޓު ނިންމާލީ 15-25 އިންނެވެ.

އަނިޔާގެ ސަބަބުން މި މެޗުގައި ވެސް ރާއްޖޭގެ އެޓޭކަރު އައިޝަތު މާޖިދާ (މާޖީ) އަދި ލިބަރޯ ފައިޙާ މުޙައްމަދު ކުޅެފައެއް ނުވެއެވެ.